konka coffee
KONKA

AMAKURU

UKWEZI

VIDEO: Imodoka ya mbere yakorewe mu Rwanda ikoresha imirasire y’izuba yatangiye kugenda

VIDEO: Imodoka ya mbere yakorewe mu Rwanda ikoresha imirasire y’izuba yatangiye kugenda
28-04-2017 saa 17:14' | By Chief Editor | Yasomwe n'abantu 25754 | Ibitekerezo 15

U Rwanda ni kimwe mu bihugu bishyigikira iterambere ry’Ikoranabuhanga n’ubumenyingiro, kandi umunsi ku wundi bigenda bigaragaza umusaruro ufatika. Ubu abanyeshuri bo muri Kaminuza ya Singhad Technical Education Society-Rwanda (STES-Rwanda) ihereye mu Kagarama mu karere ka Kicukiro mu mujyi wa Kigali, bamaze gukora imodoka ikoreshwa n’imirasire y’izuba, ndetse bafite gahunda yo kuzakora imodoka nyinshi zitandukanye abanyarwanda bakazajya bibonera imodoka bagendamo bitabasabye guhendwa na lisansi cyangwa mazutu.

Ubu abanyeshuri bo muri Kaminuza ya Singhad Technical Education Society-Rwanda (STES-Rwanda), bageze kure bakora imodoka ikoreshwa n’imirasire y’izuba ikaba ari nayo ya mbere ikorewe mu Rwanda kandi ikozwe n’abanyarwanda. Ni imodoka ibasha kugenda, itwara abantu batatu ariko kugeza ubu iracyanononsorwa kugirango irusheho kugaragara neza no gukora neza biruseho, ndetse izamurikwa ku munsi w’umurimo uzizihizwa kuwa Mbere tariki ya Mbere Gicurasi 2017.

Igitekerezo cyo gukora iyi modoka, cyaturutse ku marushanwa abanyeshuri 10 muri iyi Kaminuza ya Singhad Technical Education Society-Rwanda (STES-Rwanda) baherutse kwitabira mu gihugu cy’u Buhinde, aho begukanye igikombe n’ubundi mu gukora imodoka ikoresha imirasire y’izuba. Aya marushanwa bagiyemo mu kwezi gushize kwa Werurwe uyu mwaka, ahahatanaga abanyeshuri bo mu bihugu bitandukanye, itsinda ry’Abanyarwanda ryahembewe ko ryagize imikoranire myiza (best coordination) mu gukora iyo modoka mu gihe cy’iminsi 5 gusa.

JPEG - 176.7 kb
JPEG - 180.3 kb

Aha bari mu Buhinde aho bitwaye neza mu marushanwa

Kugirango aba banyeshuri babashe kujya guhatana mu Buhinde, babanje guhugurwa ndetse baterwa inkunga n’ibigo bitandukanye mu Rwanda. Bagarukanye intsinzi, bageze mu gihugu batekereza uko bakorera iyi modoka mu Rwanda kugirango n’uwumvise ko bayikoreye mu Buhinde atazagirango ni umugani. Bahise bayitangira, mu byumweru bicye bakaba bayigeze kure ndetse ikaba ibasha kugenda, ikaba ishobora gutwara abantu batatu, ifite ubushobozi bwo kwikorera ibiro 500 kandi ibasha kwiruka ibirometero 50 ku isaha, ikaba yagenda amasaha ane idahagaze.

Iyi modoka ikomeje gutunganywa neza ngo igire ishusho n’isura binogeye amaso ariko iragenda

Nzitonda Kiyengo uyobora Kaminuza ya STES-Rwanda, akaba ari n’umwe mu bayishinze, yatangarije abanyamakuru kuri uyu wa Gatanu tariki 28 Mata 2017 ko batangajwe n’ubuhanga bw’abanyeshuri babo ariko kandi bagashimishwa n’intera bagezeho, kuburyo hari gahunda no kunoza imikorere y’iyi modoka hakananononsorwa ibindi byinshi bizatuma bakora uruganda rukomeye rw’imodoka zikoresha imirasire y’izuba.

Icyo uyu muyobozi ahuriraho n’abanyeshuri bo muri iyi Kaminuza, ni uko hari imbogamizi bahura na zo mu gukora iyo modoka, zirimo nko kuba mu Rwanda haboneka ibikoresho bikurura imirasire y’izuba (Solar Panel) zifite ishusho imwe, bakaba bakeneye ubundi bwoko buba bukozwe mu buryo bushobora guhinwa no guhindurirwa ishusho bikajyana n’ishusho bashaka guha imodoka zabo.

Bashimangira ko bafite gahunda yo gukomeza kwihugura no gukora ubundi bushakashatsi buzatuma bakora izindi modoka zikoranywe ikoranabuhanga rihambaye, bagashaka n’ibikoresho bigezweho bazifashisha mu gukora izo modoka. Basobanura ko umwihariko w’iyi modoka, ari uko itarushya isaba umuntu lisansi kugirango igende, dore ko ikoreshwa gusa n’imirasire y’izuba. Bagaragaza kandi ko ari kimwe mu byagabanya iyangirika ry’isi dutuye bitewe n’ibyuka bihumanya ikirere byoherezwa n’amamodoka akoresha lisansi na mazutu.

Ubuyobozi bwa Kaminuza ya Singhad Technical Education Society-Rwanda (STES-Rwanda) kimwe n’abanyeshuri biga muri iyi Kaminuza, bavuga ko imbogamizi bafite ari ubushobozi buhagije bwo kubona ibikoresho biri ku rwego rwiza bizatuma bakora n’izindi modoka nziza kurushaho kandi zikora neza byisumbuyeho, ikindi bakaba bakeneye no kubona amasomo n’amahugurwa birenze ku byo bafite kugirango bazabashe gukora ibifite ubuziranenge.

REBA VIDEO Y’IYI MODOKA IGENDA HANO:


INKURU ZA :
Tanga Igitekerezo
Ibitekerezo 15
kabano Kuya 15-05-2017

Ese wenda ko aribwo mu rwanda bagerageje gukora ikintu nkiki ubundi abantu mwize ibya Electronic nkanjye mubona iriya modoka yazamuka ahantu hangana iki ? ubundi design yayo yo imeze ite wowe iri nimodoka ch ningorofani y’umuriro gusa ntawaveba ariko ntiwavuga bakoze imodoka bgute se imodoka ntiyagendera ku mirasire y’izuba ngo izagende

ibi nibyiza cyane urwanda rufite icyerekezo Kuya 14-05-2017

mukomereze ago

kakaka Kuya 14-05-2017

Kabana, ntugace intege abantu batangira. Urabona abantu bafite ibitekerezo bingana kuriya icyo ubuziranenge barakibagirwa. Ahubwo ministere ibafite mu nshingano ibafashe kbsa. Njye bariya banyeshuri baranshimishije kbsa

gisa Kuya 13-05-2017

harimo abacantege babi, nimukomerezaho ahubwo niyo kaminuza yafunzwe ifungurwe, bareke ibiba byihishe inyuma kinyungu zumuntu umwe gusa, indi kaminuza yabikoze niyihe??? congs basore

umwanankundi jean damascene Kuya 13-05-2017

biranshimishize izatajyirakunjyendaryari

lamar Kuya 4-05-2017

Ndibaza nti :"Ese mubihe byimvura ugenda ITE? Ahubwo se nta kuntu bafata imodoka usanzwe bakayisubiramo bakayiha panel solaire Aho kugira moteur?

ntambara fred Kuya 1-05-2017

Nonese iyontazubarihari irakora?

ishimwe jonathan Kuya 1-05-2017

mbega ibintu byiza!!!! nukuri nibakomerezaho turabashyigikiye, bagire batubwire nibiciro byayo kuko birakenewe.

Augustin Kuya 29-04-2017

Iyi ndayiguze tu!

David Musenge Kuya 29-04-2017

Wow, ibintu nkibi bibabyiza, aba bantu bAhawe ubwo bushobozi bubura bavuga bakora ibirenze. Nibashyigikirwe cyanee nka Leta cg ibigo byiMali bagaragaze ubwo bubasha. Ibi byazamura izina ryacu nku RWANDA kurushaho cyane muguhanga Udushya. Nibyiza cyanee. Birashimishije.

Xxxxxx Kuya 29-04-2017

Courage basore.ejo mwazadusubiza icyubahiro mugakora nizizajya zijyamo carburat yo muri Robinet ndavuga amazi.

Umusaza Kuya 28-04-2017

Petit àpetit l’oiseau fait son nid

kabana Kuya 28-04-2017

Ubuziranenge bwayo burihe kugirango abantu bayizere ?
Usanga bashoramo amafranga menshi ugasanga biheze ahooooo. Mukore ibintu bikenewe nabantu benshi. Iyi modoka muyihorere.

kabana Kuya 28-04-2017

Ndabona aribyiza, arikose ubuziranenge bwayo burizewe ?
RBS ibe maso kubintu bimwe nabimwe bishobora gushyira abantu mukaga aho kubazanira iterambere.

kabana Kuya 28-04-2017

Ndabona aribyiza, arikose ubuziranenge bwayo burizewe ?
RBS ibe maso kubintu bimwe nabimwe bishobora gushyira abantu mukaga aho kubazanira iterambere.

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA