konka coffee
KONKA

AMAKURU

UKWEZI

Ibintu 10 bitangaje ku nyubako ya White House ikoreramo ikanatuzwamo Perezida wa Amerika

Ibintu 10 bitangaje ku nyubako ya White House ikoreramo ikanatuzwamo Perezida wa Amerika
19-08-2017 saa 13:54' | By Akayezu Jean de Dieu | Yasomwe n'abantu 14692 | Ibitekerezo 2

Inyubako ikoreramo Perezida wa Leta Zunze ubumwe za Amerika ndetse akanayituramo we n’umuryango we, izwi nka ‘White House’ n’ubwo hari benshi bakunze kuyitiranya n’inzu yitwa ‘United States Capitol’ ariyo nzu Inteko Ishinga Amategeko ya Leta zunze ubumwe za Amerika ikoreramo. Iyi White House ni imwe mu nyubako zubashywe cyane kuri iyi Si kandi umuntu uyituramo aba arinzwe cyane ugereranyije n’uburinzi buba buri ku zindi nyubako zikomeye ku Isi.

Iyi nyubako yubatse i Washington Dc, Umurwa mukuru wa USA (United States of America) hagati ya Virginia na Maryland. White House yubatswe na James Hoban ayubaka mu myaka 8, iyo uyirebeye inyuma nk’uko izina ryayo rivuga Inzu y’umweru nayo isize irangi ry’umweru ariko si ibyo gusa kuko iyi nyubako ifite ibintu byinshi bitangaje ari nabyo tugiye kugarukaho muri iyi nkuru. Twifashishije imbuga zirimo Thrillist, Yahoo, List25 ndetse na BBC.

1. Perezida wubakishije White House ntiyigeze abona amahirwe yo kuyituramo

Inyubako ya White House ifite ibyumba 132 yubakishijwe na George Washington gusa ntiyigeze agira amahirwe yo gutura muri iyi nyubako. Uwitwa John Adams ari kumwe n’umufasha we Abigael niwe wa mbere wabashije gutura muri iyi nyubako ya White House ari nayo Perezidansi ya Leta zunze ubumwe za Amerika.

White House yaje gutwikwa ijya hasi mu mwaka w’1814 mu gihe cy’intambara, gusa nyuma yaho yaje kuvugururwa. Ntibigeze basenya inyubako ahubwo inkuta zari zarabaye umukara kubera umwotsi zongeye gusigwa irangi maze ibyari byaraguye biba aribyo byongera kubakwa bundi bushya, nyuma y’aho yasaga naho ibaye nshya hahise hajyamo uwitwa Monroe mu mwaka wa 1817. Nyuma mu mwaka w’1901 nibwo yiswe White House ibyiswe n’uwitwa Theodore Roosevelt wabaye Perezida wa 26 w’iki gihugu.

2. White house ifite impanga

White House ifite inyubako y’impanga yayo izwi ku izina rya ‘The Leinster House’ yubatswe kuva mu mwaka w’1745 kugeza muri 1747, ikaba iri mu gihugu cya Ireland. Iyi nyubako yahimbwe White House ntoya (Mini White House), bivugwa cyane na benshi ko James Hoban wubatse White House ashobora kuba yarabanje kureba ku gishushanyo mbonera cya Leinster house kuko uyu mugabo yakuriye muri Ireland aba ari naho yigira amashuri ye. Ariko ibi byose nta kibihamya na kimwe uretse kuba amazu agaragara kimwe hanze, ariko ni bake bazi neza ko White house ifite impanga yayo.

3. Ni Inyubako ikundwa n’imbaga

Inyubako ya White House igendererwa n’ingeri nyinshi z’abantu aho byibuza yakira abaje gusura iyi nyubako babarurirwa mu 30.000, ukongeraho amabaruwa asaga 65.000, abahamagara kuri Telefone basaga 3.500 ndetse na Emails zirenga 100.000 mu gihe gito gishoboka. Aba bose biyongera ku bantu baba bateganijwe gusura iyi nyubako aho ugomba kubisaba ndetse ukazemererwa hagendeye ku mategeko n’amabwiriza.

4.Ifite ubwogero budasanzwe, uwabwubatse byamugejeje no mu bitaro

Umwe mu ba Perezida Leta zunze ubumwe za Amerika zagize witwa Lyndon B. Johnson, ibintu yakoze ntibizibagirana kubera ukuntu bitangaje. Nyuma y’uko ageze muri White House yahise atekereza ibyo guhindura ubwogero bwaho, niko guhita azana umuntu wari ushinzwe guhindura ubwogero akabugira neza nk’uko yabyifuzaga. Uwahawe akazi yakoresheje imbaraga ze zose ariko amara imyaka 5 atarabigeraho kugera ubwo yagiye mu bitaro kubera umunaniro w’ubwonko, gusa bimaze kumenyekana ibibazo byose yabazwaga ku bijyanye n’ubwo bwogero yangaga kugira icyo atangaza. Ikizwi cyo ni uko ubwo bwogero bwihariye kandi bukaba ari igitangaza kugeza n’uyu munsi

5. Muri White house amafunguro yaho aba ahambaye, harimo n’akarima k’igikoni

Igikoni cyo muri White House kiri mu bintu byitaweho cyane kurusha ibindi, iki gikoni gishobora kwakira umuryango wa Perezida n’ábandi bayobozi bakorera muri White House hamwe n’abashyitsi bagera ku 140, kandi bose bakarya neza. Ibintu byose biba biteguye neza ku rwego rwo hejuru ku buryo amafunguro anezeza buri wese uyakiriye. Aha muri iki gikoni harimo abayobozi batanu b’igikoni bahoraho kugira ngo ibintu byose bihore ari bizima. Perezida John Adams n’umugore we Abigael bageze muri White house bahise bahinga akarima k’igikoni kugira ngo bajye birira ibyo bo ubwabo bisaruriye.

Hari n’ábandi bakomeje kugira uyu muco wo kwihingira imboga muri White house ariko Michelle Obama niwe waciye agahigo kuko yashyizemo akarima k’igikoni kagutse kugirango abana be bajye barya imboga n’imbuto bategetswe na muganga wabo. Ubuki barya muri white House ntabwo buva ahandi ahubwo ni ubwo bitunganyiriza ubwabo, aha hari abantu bize kandi bazi neza ibijyanye n’ubuhinzi, aba nibo bahora bita ku bihingwa biri aha hantu.

6. Imyubakire ya White house yagezweho habanje kubaho ihatana ridasanzwe

Perezida wa mbere wa Leta Zunze Ubumwe za Amerika, George Washington, ntiyigeze yishimira umwubatsi wa mbere wari utangiye kubaka White House bitaga Pierre Charles L’Enfant, uyu yari Umufaransa. Uyu ngo yashakaga kubaka White House nka za ngoro z’abami bo mu Bufaransa ba kera, yanashakaga kuyigira nini bidasanzwe, George Washington abonye ibyo ahita amwirukana maze abigiriweho inama na Thomas Jefferson wari Umunyamabanga wa Leta (Secretary of State), ashyiraho amarushanwa yo guhatana ngo hashakwe umuntu uzubaka White House.

Abubatsi benshi bahise bitabira ayo marushanwa maze abemerewe guhatana baratumizwa kugirango bazane inyubako zabo maze bazarebe ukwiye gutwara iryo soko ryo kubaka inzu idasanzwe, aha byaje kurangira uwitwa James Hoban ari we wegukanye iri soko, igitangaje kirimo aha ni uko muri abo bantu 9 bari bageze ku rwego rwo kwemererwa kuzana inyubako harimo na Thomas Jefferson wari umuyobozi ukomeye muri iki gihugu, gusa ntiyagize amahirwe yo gutsinda. Uyu akaba yaranaje kuba Perezida wa gatatu w’iki gihugu nyuma ya John Adams wabaye Perezida wa kabiri wa Leta Zunze Ubumwe za Amerika.

7. White House yatwaye akayabo k’amafaranga ngo yubakwe

White House yagiwemo bwa mbere na John Adams n’umugore we Abigael ihagaze amadolari 232,372, aya asa nk’aho ari make ariko muri icyo gihe kari akayabo, ariko ubu iyi nyubako yaba ihagaze amadolari 389,000,000 ubaze agaciro ifite ubu, gusa n’aya asa naho atari menshi cyane ugereranyije n’ibintu biri muri iyi nyubako. Irimo ikibuga cya tennis, ibyumba byo kuraramo 16 biteguwe neza, ubwogero 35 n’ibiro byinshi n’ibindi byumba byinshi ibizwi n’ibitazwi na bose, iyi ni inyubako ubwayo imeze nk’umujyi ubwawo kuko yashobora gukomeza kubaho n’ubwo yaba iri yonyine, kandi ifite ibyiza byose ikiremwamuntu cyakenera.

8. Inkongi y’umuriro muri White House yatangaje benshi

Biragoye kumva uburyo inyubako nk’iyi irinzwe cyane kandi ikoramo abantu bafite ubumenyi buhambaye buri wese ku kintu akora yafatwa n’inkongi y’umuriro. Byatangaza uwo ariwe wese kubona Perezida n’abandi bayobozi bakuru n’umuryango we basohoka biruka bava muri White House kubera inkongi y’umuriro cyangwa ikindi icyo aricyo cyose, nyamara ibi byarabaye abantu barumirwa.

Mu mwaka w’ 1929 ubwo isi yose yari iryohewe n’ijoro rya Noheli, kuri uyu munsi tariki ya 24 Ukuboza ibyari ibyishimo muri White House, ariko ibyo byishimo byaje kuvamo agahinda kuko batunguwe n’inkongi y’umuriro, nyuma yo kubimenya barwana ku mukuru w’igihugu n’umuryango we kugirango batagira icyo batwarwa n’umuriro maze banagerageza kwita ku biro bye kugira ngo atagira icyo abura, banagerageza gusohora abandi bayobozi bakomeye bari bari muri White House.

Ibi byabakozeho cyane kuko muri icyo gihe nta bwishingizi White House yari ifite, kuburyo bwakwishyura ibyangijwe ngo hanasanwe ahangijwe n’inkongi, ibi byateye igihombo gikomeye kuko banabuze bimwe mu byangombwa bikomeye kandi bikenewe na Leta.

9. Umuzimu wa Perezida Lincoln muri White House

Nta kintu kigoye kumva nk’iki, kumva ko umuzimu wa Perezida Lincoln waba waraje kugaruka muri White House byatangaje benshi! Winston Churchill wari Minisitiri w’intebe w’u Bwongereza kuva mu 1940 kugeza mu 1945 akongera mu 1951 kugeza 1955, yigeze kurara muri White House maze nk’umuntu bubashye bamuha icyumba cyari icya Perezida Abraham Lincoln. Ni uko arara neza ku gitanda Lincoln yararagaho, ariko ngo bwacyeye Churchill asohoka mu cyumba yiruka avuga ko yabonye Lincoln muri iryo joro, ku munsi ukurikiyeho bamubwiye kongera kurara aho yaraye aranga neza neza.

Ibi siwe wenyine wabihamije kuko Lady Grace Coolidge na Mary Eben bari abanyamabanga muri White House bavuze ko Perezida Lincoln wari umaze igihe atabarutse, bamubonye muri White House, ndetse Mary Eben we yivugiye ko yabonye Lincoln yicaye ku buriri bwe arimo kwambara inkweto niko gusohoka yiruka ataka.

10. Umutekano muri White house

Iyi ni imwe mu nyubako zirinzwe mu buryo butangaje, cyane ko ari ahantu hatuwe n’umuntu urinzwe cyane kurusha abandi ku isi. Icya mbere kivugwa cyo ni uko uburinzi bw’iyi nyubako bwinshi butazwi, ibizwi bifatwa nk’ibikomeye ni bike cyane ugereranyije n’ibihari. Mu bizwi twavuga nk’ubuhungiro bukomeye buri mu buvumo bw’iyi nyubako, amadirishya arenga 147 atabasha kwinjirwa n’isasu, hejuru haba hahagaze abantu bo muri SWAT (Special Weapons And Tactics) bashinzwe umutekano baba bareba ibibera mu gipangu byose, bashobora no guhanura indege yose yateza umutekano muke mu kirere cya White House kandi uburinzi bubaho mu buryo buhoraho. Ibyo kuharinda amasaha yose y’umunsi byaje nyuma yuko hishwe uwo bitaga William McKinley umwe mu ba Perezida bane ba Leta Zunze Ubumwe za Amerika bishwe barashwe, barimo Abraham Lincoln (Perezida wa 16), James A. Garfield (Perezida wa 20), William McKinley (Perezida wa 25) and John F. Kennedy (Perezida wa 35).


INKURU ZA :
Tanga Igitekerezo
Ibitekerezo 2
-xxxx- Kuya 19-09-2017

Ono musajja bamusibile ddala teli okumusonyiwa

Oliver Kuya 19-08-2017

wabuze gushyiraho n’amafoto wowe

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...