konka coffee
KONKA

AMAKURU

UKWEZI

Umwarimu wa Kenyatta mu ishuri ry’inshuke yavuze bimwe mu byamuranze mu bwana

Umwarimu wa Kenyatta mu ishuri ry’inshuke yavuze bimwe mu byamuranze mu bwana
8-11-2017 saa 08:08' | | Yasomwe n'abantu 2707 | Ibitekerezo

Umukecuru wigishije mu ishuri ry’inshuke Perezida Uhuru Kenyatta, uherutse kongera gutorerwa kuyobora igihugu cya Kenya yavuze bimwe mu byaranze uyu Kenyatta mu bwana bwe birimo kuba mu myitwarire ye yaragaraga nk’umuyobozi n’ubwo yari akiri umwana w’igitambambuga

Uyu mukecuru w’imyaka 75 witwa Lorna Kageriza Chayuga, avuga ko yari umwarimu wa Uhuru Kenyatta muri 1965 mu ishuri ry’inshuke ryitwaga Lady Northey Nursery School ryigagamo abana b’abazungu benshi dore ko Uhuru yari umwe mu bana bake b’abirabura bigaga muri iri shuri ryari riherereye mu Mujyi wa Nairobi ku muhanda ugana hafi y’ahari Perezidansi ya Kenya.

Uyu mukecuru waganiriye n’ikinyamakuru Tuko dukesha iyi nkuru yavuze ko nk’umwarimu wari warize kandi watojwe kurera abana bakiri bato yageragezaga kureba imyitwarire ya Kenyatta akabona itandukanye n’iy’abandi bana bari mu kigero kimwe ndetse ngo Kenyatta yari afite imyitwarire n’impano yo kuyobora abandi muri we.

Yagize ati “Yari afite amaraso y’ubuyobozi muri we. Nk’umwarimu watojwe kurera no kwita ku bana bakiri bato mba nshobora kureba nkamenya umwana uzaba umuhanga n’utazaba umuhanga (…..) Yashoboraga kuvugana nange ngahita mbona ko afite imyitwarire y’ubuyobozi nka Papa umubyara kandi nari nziko umunsi umwe azaba Umuyobozi w’iki gihugu”

Uyu mukecuru wigishije Kenyatta amezi agera ku munani avuga ko yamwigishije kuvuga neza Igiswahili n’Icyongereza, kuri ubu uyu mwarimu ari mu kiruhuko cy’izabukuru avuga ko mu bindi yibuka ari uko Kenyatta yari umuhanga cyane akunda uyu mwarimu ndetse yazaga ku ishuri atwawe na mukuru we mu modoka ya Mercedes Benz y’umukara avuga kandi ko batari bafite ububasha bwo guhana uyu mwana igihe yakoze amakosa kuko yari umuhungu wa Perezida

Chayuga ati “Ntabwo twashoboraga ku muhana kuko yari umwana wa Perezida. Twaramutinyaga n’iyo yariraga abana b’abazungu barazaga bakatubwira bati dore umwana wa Perezida wanyu arimo kurira"

Uyu mukecuru utarakomeje kwigisha muri iri shuri ry’inshuke dore ko yahise ajya gukomeza amasomo ye mu gihugu cy’Ubuyapani nyuma akaza kuhava agaruka kwigisha muri All Saints Cadethedral Nursery School aho yahembwaga akayabo k’amashilingi 300 ku kwezi. Uyu mwarimu kuri ubu ufite imyaka 75 kandi yabwiye iki kinyamakuru ko mu bandi bantu bakomeye yigishije harimo impirimbanyi y’ubwigenge, Paul Ngei na Achieng Oneko n’abandi benshi bari mu buyobozi bwo hejuru muri Kenya


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...