konka coffee
KONKA

AMAKURU

UKWEZI

AMAFOTO: Ibintu 10 bitangaje kuri Robert Mugabe n’umugore bafunganywe iwabo mu rugo

AMAFOTO: Ibintu 10 bitangaje kuri Robert Mugabe n’umugore bafunganywe iwabo mu rugo
16-11-2017 saa 09:24' | By Akayezu Jean de Dieu | Yasomwe n'abantu 15968 | Ibitekerezo 2

Robert Mugabe umaze imyaka 37 ayobora igihugu cya Zimbabwe, ni umwe mu bakuru b’ibihugu badasanzwe ku isi, haba mu byo akora, mu mateka ye, mu mibereho ye, imivugire n’uko yigaragaza mu ruhando rw’abandi bayobozi. Uyu muyobozi wa Zimbabwe w’imyaka 93 y’amavuko, afite udushya twinshi dutandukanye ari natwo tugarukaho muri iyi nkuru mu gihe kuri ubu inkuru ikomeje kuvugwa cyane ari iy’ihirikwa rye ku butegetsi. Turagaruka cyane kandi ku mugore we Grace Mugabe bivugwa ko ari nawe ntandaro yo gutuma igisirikare gishaka kumuhirika ku butegetsi.

Kugeza ubu, hirya no hino ku isi inkuru ya Robert Mugabe n’umugore we Grace Mugabe iri mu zikomeje kutavugwaho rumwe. Amakuru adashidikanywaho na Robert Mugabe ubwe yemereye Jacob Zuma wa Afurika y’Epfo ku murongo wa telefone, ni uko we n’umugore we bafungiwe iwabo mu rugo ariko ngo baratekanye nta kindi kibazo bafite.

Mbere yo kuvugwa byinshi kuri Robert Mugabe, twagaruka ku mugore we Grace Mugabe w’imyaka 52 y’amavuko, ni ukuvuga ko umugabo we amurusha imyaka 41 yose. Uyu mugore kugeza ubu niwe zingiro ry’imvururu ziri muri Zimbabwe zishobora no gutuma Perezida Mugabe ahirikwa burundu ku butegetsi. Urubuga rwa Wikipedia, rwo rwamaze kugaragaza ko Robert Mugabe abarwa mu bahoze ari abakuru b’ibihugu ariko atakiri we.

Kuvugwa cyane kwa Grace Mugabe, byatangiye kuva ubwo yatangiraga kugaragaza ko ashaka kuzasimbura umugabe we ku butegetsi, cyane ko bigaragara ko ageze mu myaka ye ya nyuma.

Muri 2014, ubwo yamaraga kugirwa umuyobozi w’ihuriro ry’abagore bo mu ishyaka rya Zanu-PF riri ku butegetsi, yahise atangaza ko ashaka kuzasimbura umugabo we ku butegetsi. Icyo gihe yagize ati: "Rimwe na rimwe abantu bajya bavuga ngo ndashaka kuzaba Perezida. Kuki se ntamuba? Sindi umuturage wa Zimbabwe se?"

Kuba Perezida Mugabe yarirukanye Emmerson Mnangagwa mu cyumweru gishize akamukura ku mwanya wa Visi Perezida, byagaragaye nko kurushaho kwegereza Grace Mugabe intebe y’ubutegetsi kuko byari biteganyijwe ko mu minsi micye azamusimbura akaba Visi Perezida yungirije umugabo we, ari nabyo byarakaje cyane igisirikare cyabifashe nko kurushaho kumunga ubukungu n’imitegekere ya Zimbabwe ndetse n’agasuzuguro k’uyu mugore.

Bimwe mu bintu bitangaje wamenya kuri Perezida Robert Mugabe:

1. Robert Mugabe niwe mukuru w’igihugu ukuze kurusha abandi ku isi kandi ateganya gukomeza akayobora

Perezida Robert Mugabe wa Zimbabwe, ku myaka ye 93 y’amavuko yujuje kuwa Kabiri tariki 21 Gashyantare 2017, ni we mukuru w’igihugu ukuze kurusha abandi ku isi yose, kandi yari yaramaze gutangaza ko mu mwaka wa 2018 azongera akiyamamariza kuyobora iki gihugu. Amaze imyaka 30 ari Perezida w’iki gihugu, kuko yabaye Perezida mu 1987 ariko na mbere yaho yabanje kuba Minisitiri w’Intebe mu gihe iki gihugu cyari kitarahabwa ubwigenge busesuye, bisobanuye ko amaze imyaka 37 ku butegetsi. Ni we mukuru w’igihugu cyo muri Afrika kandi uriho mu baharaniye ubwigenge bw’ibihugu byabo bakabivana mu maboko y’abakoloni.

2. Robert Mugabe afite impamyabumenyi nyinshi ariko hafi ya zose yazikoreye ari muri gereza

Perezida Robert Mugabe, afite impamyabumenyi zirindwi, harimo iyo yakuye muri Kaminuza ya For Hare muri Afrika y’Epfo ari naho Nelson Mandela yize, aha Mugabe akaba yarahakuye impamyabumenyi y’icyiciro cya kabiri cya Kaminuza mu by’ubugeni. Izindi mpamyabumenyi z’ikirenga yagiye azibona yize muri gahunda y’iya kure (Distance Learning), muri izi hakaba harimo izo yigiye ari muri gereza, aho yize ibijyanye n’imitegekere, uburezi, amategeko n’ibindi bitandukanye.

3. Niwe mukuru w’igihugu wabyaye ashaje kurusha abandi

Perezida Robert Mugabe afitanye abana batatu n’umugore we wa kabiri Grace Marufu. Umwana wabo wa gatatu witwa Chatunga, yavutse mu mwaka w’1997, nyuma y’umwaka umwe ababyeyi be bakoze ubukwe. Icyo gihe Perezida Robert Mugabe yari afite imyaka 73 y’amavuko, bivuga ko n’ubukwe bwe n’uyu mugore bwabaye afite imyaka 72 y’amavuko. Nta wundi mukuru w’igihugu uzwi wabyaye afite iyi myaka.

4. Perezida Mugabe ahamya ko yazutse kenshi kurusha Yesu Kristu

Perezida Mugabe wagiye anyura mu bihe bikomeye guhera mu bwana bwe, ahamya ko hari igihe cyagiye kigera agapfa ariko nyuma akaza kuzuka. Urubuga rwa Wikileaks rukunda gushyira hanze amabanga y’ibihugu bitandukanye, rwahamije ko uyu musaza yagiye ahangana kenshi na kanseri y’udusabo tw’intanga, ndetse ikaba ijya imuzahaza akajya muri Koma n’ubwo umubiri we ufite ubudahangarwa butuma yongera kumererwa neza abantu ntibabimenye. Ubwo yagiranga imyaka 88, Robert Mugabe mu ijambo yavuze na we ubwe yarabihamije, aho yagize ati: “Napfuye inshuro nyinshi, aho ninaho naciye kuri Yesu kuko we yapfuye rimwe azuka rimwe ariko njye nagiye mpfa kenshi nkazuka.”

5. Umugore wa Robert Mugabe yabanje kuba umunyamabanga we, aza no kuba ihabara rye

Grace Marufu yahoze ari umunyamabanga wa Perezida Robert Mugabe, ndetse aza no kuba ihabara rye mu ibanga rikomeye, mu gihe undi mugore wa Robert Mugabe yari arembejwe na Kanseri naho undi mugabo w’umupilote wari warashakanye na Grace we yakoreraga hanze ya Zimbabwe, biza kurangira Perezida yegukanye umugore w’abandi. Nyuma umugore wa mbere wa Perezida Mugabe yaje gupfa, hanyuma Robert Mugabe yishakanira n’uyu wari umunyamabanga be ndetse ahita afata izina rya Grace Mugabe, ninawe babana kugeza ubu.

6. Robert Mugabe yafashije umugore we kubona impamyabumenyi y’ikirenga (PHD) mu mezi 2 gusa

Muri Nzeri 2014, Grace Mugabe; umufasha wa Perezida Robert Mugabe, yabonye impamyabumenyi y’ikirenga (PHD) muri Kaminuza ya Zimbabwe, mu gihe yari amaze amezi abiri gusa atangiye kwiga aya masomo. Ibi yabigezeho abishyigikiwemo n’umugabo we akaba na Perezida w’igihugu cya Zimbabwe; Robert Mugabe, kuko uretse kuba Perezida ninawe muyobozi w’ikirenga wa Kaminuza ya Zimbabwe. Ibi ntibyavuzweho rumwe, kuko abenshi mu bakurikiranira hafi iby’uburezi bavuga ko byatesheje agaciro iyi Kaminuza ubusanzwe bizwi ko iyo mpamyabumenyi iba igomba gutangwa hashize igihe kirekire umunyeshuri akurikirana amasomo ye.

7. Robert Mugabe byari byitezwe ko yashoboraga kuzasimburwa ku butegetsi n’umugore we wavuze ko umugabo we nanapfa aziyamamaza

Grace Marufu wahawe izina rya Grace Mugabe bamaze gushakana, yagiye azamurwa mu ntera na Robert Mugabe, n’ubwo byagaragaye ko yamuzamuraga cyane kandi mu gihe gito hari ikindi kibyihishe inyuma, kuko yabanje kuba ihabara rye. Kuzamurwa mu ntera nini muri Politiki ya Zimbabwe mu gihe gito, byatumye benshi bavuga ko uyu mugore ari na we uzamusimbura mu gihe azaba atabarutse dore ko ageze mu zabukuru. Uyu mugore abibajijwe nawe yagize ati: “Baravuga ngo ndashaka kuzaba Perezida. Nabuzwa n’iki se? Sindi umunya Zimbabwe se?”.

Gusa uyu mugore aherutse gutangaza ko n’iyo umugabo we Robert Mugabe yapfa, aziyamamaza abaturage bakamutora kuko bamukunda cyane. Yagize ati “Abenegihugu ba Zimbabwe bakomeje kugaragaza ko bakunda kandi bashyigikiye Perezida wabo. Niyo mpamvu rero bazamutora kabone n’ubwo yaba yarapfuye.”

8. Robert Mugabe yanyazwe impamyabumenyi yari yaragiye ahabwa n’abantu batandukanye

Robert Mugabe agitangira kwinjira muri Politiki, yagiye ashimwa cyane ndetse ahemberwa guharanira uburenganzira bwa muntu, guharanira iterambere, kurwanya inzara n’ibindi. Ibi byatumye ahabwa impamyamumenyi z’icyubahiro (Honorary Degrees) ariko nyuma Kaminuza zitandukanye zagiye zizimuha kimwe n’indi miryango ikomeye, baza kubimunyaga ndetse babitesha agaciro bamushinja guhonyora uburenganzira bw’ikiremwamuntu.

9. Kuri we, abaryamana bahuje igitsina barutwa n’imbwa n’ingurube

Perezida Robert Mugabe, ni we mukuru w’igihugu cyo muri Afrika ugaragaza ko arwanya yivuye inyuma iby’abaryamana bahuje igitsina, ndetse ntawahirahira muri Zimbabwe anagerageza kwerekana ko ari umutinganyi. Mugabe yavuze ko abaryamana bahuje igitsina, kuri we abona barutwa n’imbwa ndetse n’ingurube, bakaba bakwiye guhabwa akato no kwamaganwa. Aherutse kandi gutegeka ko abagabo babiri bavumbuweho ubutinganyi, bafunganwa muri gereza bakazafungurwa ari uko umwe muri bo yabashije gusama, kuko n’ubusanzwe biyita ko umwe ari umugabo undi akaba umugore.

10. Perezida Robert Mugabe yasabye Barack Obama ko bashyingiranwa bakabana

Perezida Robert Mugabe yasabye Perezida Barack Obama wayoboraga Leya Zunze Ubumwe za Amerika ko bashyingiranwa, ibi akaba yarabivuze nyuma y’uko urukiko rw’ikirenga muri Amerika rwari rwemeye guha uburenganzira abashaka gushyingiranwa bahuje igitsina.

Perezida Mugabe uzwiho kwanga urunuka no kurwanya yivuye inyuma abaryamana bahuje igitsina (abagabo ku bagabo cyangwa abagore ku bagore), yatangarije ibi kuri Radio y’igihugu cya Zimbabwe, maze asobanura impamvu yavuze aya magambo, agira ati: "Nafashe icyemezo nyuma y’uko Perezida Obama yemeye guha uburenganzira abahuje igitsina ngo babe bashyingiranwa, agashyigikira ubutinganyi... Nzajya i Washington mpfukame imbere ya Obama musabe kumbera umugeni."

Robert Mugabe w’umukiristu avuga ko atiyumvisha uburyo abantu bakora urukozasoni rw’ibyangwa n’amaso y’Imana, bagatatira igihango cya Kristu bakora nk’ibyabaga muri Sodoma. Avuga ko Amerika iyobowe n’abasenga Satani ari nabo bazanira isi umuvumo.

Ibinyamakuru binyuranye bivuga ko Perezida Robert Mugabe yafotowe inshuro zigera ku 8 zose yasinziriye mu ruhame ibintu bitakunze kuvugwaho rumwe dore ko hari n’abavugaga ko uyu mukambwe afite ubushobozi bwo gukurikirana inama asinziriye hanyuma ukaba waza kumubaza ibyavugiwemo byose akabikubwira.

Muri 2013, Ubwo Perezida Robert Mugabe yarahiriraga kuyobora iki gihugu muri manda ye ya 7

Iyi foto yafaswe muri 1974 ubwo Mugabe yari i Geneve ari gukina n’umunyamakuru wamufotoraga

Aha ni muri 1978 Robert Mugabe yari kumwe na Josua Nkomo washinze ZANU PF

Aha ni mu 1980, Robert Mugabe yari kumwe n’umugore we wa mbere Sally Mugabe

Aha hari muw’1980 nabwo Mugabe yari yahuye n’abayobozi bahaagarariye Ibinyamakuru nka NBC, Newsday, The Chicago SunTimes; mu cyari cyiswe ’Meet The Press’

Aha ni muri 1982, Mugabe yari yahuyeb na Perezida Mitterand wayoboraga Ubufaransa

Aha ni muri 1983 ubwo Mugabe yari i New Delhi yahuye na Minisitiri w’Intebe w’Ubuhinde

Muri 1986 aha Mugabe yari kumwe n’abandi bayobozi bari bitabiriye inama ya Commonwealth

Aha ni ejo bundi muri 2005, R Mugabe yari kumwe na Fidel Castro wahoze ayobora Cuba, i Havana

Muri Nzeri 2010, Mugabe yagezaga ijambo kubari bari mu nama ya 65 y’Ubumwe bw’Ibihugu i New York

Aha ni muri 2011, Mugabe n’umugore we wa kabiri Grace Mugabe n’umuhungu wabo Bellarmine Chatunga hano bakataga umutsima ku isabukuru ya 89

I Vatican agaragiwe n’umugore we Grace Mugabe bitabiriye irahira rya Papa Francis muri Werurwe 2013

Muri 2014, Mugabe na Perezida Xi Jiping w’Ubushinwa bamaze gusinya amasezerano y’inkunga iki gihugu cyari gihaye Zimbabwe

Aha ni muri 2015, Mugabe yarimo asoza ku mugaragaro inama yaberaga i Jakarta muri Indonesia

Ejo bundi muri 2016, Ubwo Mugabe yagezaga ijambo ku barwanashyaka ba ZANU PF bamaze kumwemeza nk’umukandida uzabahagarira mu matora ya 2018

Umwaka ushize ubwo Zimabwe yizihizaga isabukuru y’imyaka 37 y’Ubwigenge, Aha Mugabe yarimo areba imyiyereko y’Ingabo

Aha nabwo ni muri 2017 Ubwo Mugabe yasomeraga mu ruhame umugore we abantu bakumirwa

Kanda hano usome inkuru ivuga ibyo guhirika Robert Mugabe :Ibyo guhirika Robert Mugabe no gufunga umugore we Grace Mugabe ntibivugwaho rumwe

Amafoto Mugabe asinziriye mu kazi no mu ruhame


INKURU ZA :
Tanga Igitekerezo
Ibitekerezo 2
john Kuya 17-11-2017

abasirikare bamukanguye nimwongera kubona asinzira uko yishakiye muzangaye

dada Kuya 16-11-2017

Nareke nabandi bayobore igihe cye cyokuyobora cyararenze.Abe yirira kumagugu yazigamye

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...