konka coffee
KONKA

AMAKURU

UKWEZI

Buri mudepite muri Uganda yahawe 29.000.000 yo kwiga ibyo guhindura Itegeko Nshinga

Buri mudepite muri Uganda yahawe 29.000.000 yo kwiga ibyo guhindura Itegeko Nshinga
25-10-2017 saa 06:52' | By Chief Editor | Yasomwe n'abantu 1862 | Ibitekerezo 1

Buri mudepite mu Nteko Ishinga Amategeko ya Uganda, yahawe na Leta akayabo ka miliyoni 29 z’amashilingi ya Uganda angana n’amafaranga y’u Rwanda akabakaba miliyoni zirindwi (7.000.000 Frw), nk’igihembo kidasanzwe kitari umushahara, cyo kubafasha kwiga neza no gusuzuma umushinga wo guhindura Itegeko Nshinga rya Uganda, ibi bamwe mu batavuga rumwe na Leta bakaba babifata nka ruswa bahawe n’Ubutegetsi bwa Museveni ngo bashyigikire ko azongera akiyamamaza muri 2021.

Mu gihugu cya Uganda, hashize igihe havugwa cyane umushinga utavugwaho rumwe wo kwiga uko hahindurwa ingingo y’102 mu Itegeko Nshinga, ivuga ko urengeje imyaka 75 atemerewe kwiyamamariza kuba Perezida, mu gihe Perezida Museveni umaze imyaka 31 ayobora iki gihugu we afite imyaka 73 y’amavuko, bisobanura ko muri 2021 atazemererwa kwiyamamaza kuko azaba agize imyaka 77.

Impaka z’urudaca zagiye zivuka mu bagize Inteko Ishinga amategeko ndetse bamwe banarwanira mu ngoro y’Inteko bitewe no kutavuga rumwe kuri iki cyemezo, bamwe babona nko gushaka gukomeza kugundira ubutegetsi, Perezida Museveni akazayobora Uganda igihe cy’ubuzima bwe bwose asigaje ku isi.

Umuvugizi w’Inteko Ishinga Amategeko ya Uganda, Chris Obore, kuri uyu wa Kabiri yabwiye ibiro ntaramakuru by’Abongereza, Reuters, ko mu ntangiriro z’iki cyumweru buri mudepite wa Uganda yabonye kuri konti ye miliyoni 29 z’amashilingi ya Uganda, yagenwe nk’azabafasha kwiga neza umushinga wo kuba hahindurwa Itegeko Nshinga ry’iki gihugu. Ubaze abadepite 445 Uganda ifite, bivuze ko batanzweho akayabo k’amashilingi ya Uganda 12.905.000.000, ni ukuvuga akabakaba miliyari eshatu uyabaze mu mafaranga y’u Rwanda.

Abatavuga rumwe n’ubutegetsi bavuga ko ibi ari ugusesagura umutungo w’igihugu ndetse no guha ruswa abadepite ngo bazarengere Perezida Museveni, kandi ngo aya mafaranga yagakoreshejwe ibindi dore ko abadepite ba Uganda basanzwe bari mu bakozi ba Leta bahembwa neza, dore ko buri kwezi buri umwe agenerwa amadolari 5.900, ni ukuvuga arenga gato miliyoni eshanu uyabaze mu mafaranga y’u Rwanda (5.000.000 Frw).

Nyamara muri Uganda hari ikibazo cy’abandi bakozi bahembwa macye nk’abarimu, abapolisi n’abaganga, bahora banataka ko badahabwa ku gihe umushahara wabo bita iyanga, dore ko akenshi bavuga ko bagira ibirarane by’imishahara bigera mu mezi atatu. Ibitaro byinshi byo muri Uganda kandi muri iyi minsi bikunze gutaka kubura imiti ihagije yo kuvura abarwayi, abatavuga rumwe na Museveni bakavuga ko ayo mafaranga yari gukemura icyo kibazo.

Ubu muri Uganda hakomeje imyigaragambyo y’abaturage binubira ruswa no gusesagura umutungo w’igihugu, bavuga ko hagamijwe kwimakaza ubutegetsi bita ubw’igitugu bwa Perezida Yoweri Kaguta Museveni. Buri munsi mu bigo, mu mijyi no mu mihanda, usanga abashinzwe umutekano barwana n’abigaragambya bafite ibyapa byamagana ko Itegeko Nshinga rya Uganda ryahindurwa.


INKURU ZA :
Tanga Igitekerezo
Ibitekerezo 1
Mahire Kuya 25-10-2017

Rwose museveni afatwe afungwe kuko yatanze ruswa kumugaragaro iyi ni ruswa pe

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...