konka coffee
KONKA

AMAKURU

UKWEZI

Imyaka 16 irashize umuturirwa wa ’World Trade Center’ urimbuwe mu gitero cyiswe 9/11,ibyo wamenya kuri iki gitero

Imyaka 16 irashize  umuturirwa wa ’World Trade Center’ urimbuwe mu gitero cyiswe 9/11,ibyo wamenya kuri iki gitero
12-09-2017 saa 09:41' | By Akayezu Jean de Dieu | Yasomwe n'abantu 2637 | Ibitekerezo

Igihugu cyose kuri iyi si gifite amateka yihariye, ni kimwe rero n’igihugu cy’igihangange cya Leta zunze ubumwe za America n’abaturage bacyo muri rusange bafite amateka akomeye ariko iyo bigeze ku itariki ya 11 Nzeri muri iki gihugu bibuka abasaga 3000 baburiye ubuzima gitero cyagabwe n’umutwe wa Al Quaeda.

Imyaka 16 irashize iki gitero kibaye aho cyahitanye abantu benshi ku buryo kugeza uyu munsi haba ku ruhande rw’ababuriye ababo muri iki gitero n’isi yose muri rusange, iyo bibutse ibyacyo bashengurwa umutima cyane ko buri mwaka Leta zunze Ubumwe za America zifatanya n’isi yose guha icyubahiro inzirakarengane zaguye muri iki gitero.

Uyu mwaka Perezida Donald Trump uri ku butegetsi niwe wayoboye umuhango wo kuzirikana abaguye muri iki gitero, aho yavuze mu butumwa bwe ko nk’abaturage ba America bakwiye kunga ubumwe bakumva ko bose bagize umuturage umwe.Aha yanabasabye ko badakwiye kwibagirwa ibyabaye kuri uyu munsi ubwo Abanyamerica bagenzi babo, abavandimwe n’inshuti baburaga ubuzima.

Perezida Trump ubwo yari mu muhango wo guha icyubahiro Abanyamerica baguye mu gitero cyo ku wa 11 Nzeri mu mwaka wa 2001

Ibyo wamenya ku bitero byo ku wa 11 Nzeri 2001

Hari ku wa Kabiri mu masaha ya saa mbili z’igitondo, abantu barimo kugera mu biro aho bakorera, nibwo indege ya Boeing 767 y’isosiyete American Airlines yiroshye ku nzu imwe ya World Trade Center, i New York. Iyo ndege yari yanyoye litiro zisaga ibihumbi 80 za benzine yahise yaka umuriro, inacukura umwenge munini mu igorofa rya 80 ry’iyo nyubako. Abantu amagana n’amagana bahise bapfa badasambye, abandi batabarika bahera hagati y’iryo gorofa n’andi magorofa 31 yari hejuru yaryo.

Ubwo abashinzwe umutekano no gutabara abantu bahise batangira gusohora abakozi n’abandi bantu bari muri iyo nyubako mu magorofa yo hasi. Muri ako kanya kandi za televiziyo na zo zari zatangiye kwerekana amashusho y’iyo ndege yiroha ku igorofa rya 80 ariko bari bagikeka ko ari impanuka ibaye.

Nyuma y’iminota 18 gusa indege ya mbere igonze inzu imwe ya World Trade Center, indi Boeing 767 y’isosiyete United Airlines na yo yahise yiroha ku nyubako ya kabiri ya World Trade Center, ku igorofa rya 60. Iyo ndege na yo yahise isandara, umuyonga n’ivu byiroha ku zindi nzu zari hafi aho, no hasi mu muhanda. Iby’impanuka byari birangiye, Amerika yari yatewe.

Mu gihe miliyoni z’Abanyamerika zari zikireba kuri televiziyo amarorerwa yari amaze kubera i New York, indi Boeing 757 y’isosiyete American Airlines yarimo izenguruka umurwa mukuru, Washington D.C., nayo yiroshye ku nyubako ya Departement y’Ingabo, Pentagon. Umuriro iyo ndege yateje watumye igipande kimwe cy’iyo nyubako gihirima. Abakozi 125 b’iyo Departement bahasize ubuzima, hamwe n’abagenzi 64 bari muri iyo ndege.

Ibyihebe by’Abayisiramu 19 byo muri Arabia Saoudite n’ibindi bihugu by’Abarabu byakoreraga umutwe Al Qaida w’Umunyarabia-Saoudite, Osama Bin Laden ngo byihimuraga inkunga Amerika itera Israel, uruhare rw’Amerika mu Ntambara yo muri Koweit mu ntangiriro ya za 1990, n’ingabo zayo zikiri mu Burasirazuba bwo Hagati.

Bimwe muri ibyo byihebe byari bimaze umwaka usaga biba muri Leta Zunze Ubumwe z’Amerika, byaranafashe amasomo yo gutwara indege mu mashuri y’abadereva yo muri Amerika. Ibindi byari byinjiye muri Amerika hasigaye amezi makeya gusa ngo bikore ibara.

Ni ibihe Abanyamerica bazirikana kuko byabahekuye inshuti n’abavandimwe babarirwa mu bihumbi bitatu

Ibyo byihebe uko ari 19 byari byashoboye kwinjirana ibyuma muri izo ndege ku bibuga 3 bitandukanye byo mu burasirazuba bwa Leta Zunze Ubumwe z’Amerika. Byari byahisemo indege zigiye muri Leta ya California, mu burengerazuba, kuko ari zo zari kuba zuzuye benzine kubera indeshyo y’urwo rugendo. Izo ndege zose zikimara kuguruka, ibyihebe byahise bizigarurira, maze indege zari zisanzwe zitwara abagenzi zihinduka ibisasu bya karahabutaka.

Hatarashira iminota 15 indege ya 3 yituye kuri Pentagon i Washington D.C. Inzu imwe ya World Trade Center ihita isandara yose maze ivumbi n’umwotsi bikwira ikirere cyo mu mujyi wa New York.

Iyo nzu ubundi yari ikomeye ku buryo n’inkubi y’umuyaga yari kuba ifite umuvuduko w’ibirometero bisaga 400 ku isaha nta cyo yari kuyikoraho. Nyamara ntiyashoboye kwihanganira ubushyuhe bw’iyo ndege yari imaze kuyiturikiramo, ihita ishonga mu kanya nk’ako guhumbya.

Abantu bagera hafi ku bihumbi bitatu baguye mu nzu za World Trade Center no hafi yazo, harimo n’abazimya inkongi z’umuriro 343, n’abapolisi 23 barimo bagerageza guhungisha abantu bari mu magorofa yo hejuru. Abantu 6 gusa ni bo barokotse muri izo nzu zombi zimaze guhirima. Abandi bagera hafi ku bihumbi 10 barakomeretse.

Hagati aho, indi ndege ya 4 yagombaga na yo kujya i California iturutse ku kibuga cy’i Newark, muri leta ya New Jersey, hafi y’i New York, na yo yari imaze kwigarurirwa n’ibyehebe 4. Kubera ko iyo ndege yari yatinze kuguruka ariko, abagenzi bari bayirimo bari bamenye amarorerwa yari amaze kubera i New York n’i Washington D.C. kuri telefoni zigendanwa maze banga ko ikomeza urugendo, abagenzi barwanya ibyihebe byarimo maze indege irahanuka 45 bahita bahagwa.

Kugeza ubu ariko aho ibyihebe byari muri iyi ndege byashakaga ntiharamenyekana neza gusa harimo abemeza ko yari kugwa ku biro bya perezida – White House -, ku nteko ishinga amategeko – Kongere -, n’aho perezida w’Amerika yaruhukiraga muri leta ya Maryland, hafi y’i Washington – Camp David.


Umunyamabanga ushinzwe umutekano, Donald Rumsfeld ari kumwe na George W. Bush wari Perezida wa America muri icyo gihe ubwo yagezaga ku baturage ijambo ryo kubahumuriza

Kubera ibibazo by’umutekano, indege ya Perezida George Walker Bush yari yiriwe izerera Amerika yose. Saa moya nimugoroba ariko yari ageze ku biro bye. Saa tatu ageza ijambo ku baturage kuri televiziyo na radio by’igihugu.

Muri iryo jambo, Perezida Bush yagize ati “Ibyihebe bishobora kudusenyera amazu, ariko ntibishobora gusenya Amerika. Ntituzatandukanya ibyihebe byakoze aya marorerwa n’ababiha indaro.”

Ntibyatinze, ku itariki ya 7 Ukwakira, 2001, intambara n’ibyihebe iba iratangiye muri Afghanistan, iyobowe na Leta Zunze Ubumwe z’Amerika. Iyo ntambara yari igamije kuvanaho ubutegetsi bw’Abatalibani bwari bucumbikiye ibyihebe bya Al Qaida, no gusenya uwo mutwe wa Al Qaida.

Imbere y’abagize Kongere ya Amerika, Perezida Bush yabumvishije ko ari ngombwa gutera ibyo bihugu bicumbikira bikanashyigikira abakora iterabwoba. Imbere ya kongere y’iki gihugu yababwiye inkuru y’umwana muto w’umuhungu waburiye se muri ibyo bitero yandikiye se I New York mu kumwibuka.

Osama Bin Laden w’imyaka 54 wari uyoboye uyu mutwe yaje gupfa tariki ya 2 Gicurasi 2011 ahitanwe n’ingabo zidasanzwe za Amerika(commandos de l’US Navy- SEAL), mu gitero cyamaze iminota 40. Bivugwa ko umurambo we washyinguwe mu nyanja ariko itaratangazwa.

Ibi bitero byatumye Leta Zunze Ubumwe za America ihaguruka, ikaza umutekano mu rwego rwo guhangana n’iterabwoba. Kugeza ubu iki gihugu gikora ibishoboka byose mu gushyira imbaraga mu bikorwa byo kurinda umutekano w’igihugu n’abagituye.

Amafoto y’umwihariko yaranze iki gitero na n’ubu agitera benshi agahinda no kwibuka ibyabaye kuri uyu munsi


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...