konka coffee
KONKA

AMAKURU

UKWEZI

Imyaka 50 irashize ikirangirire Che Guevara atabarutse. Ese yari muntu ki?

Imyaka 50 irashize ikirangirire Che Guevara atabarutse. Ese yari muntu ki?
9-10-2017 saa 12:01' | By Akayezu Jean de Dieu | Yasomwe n'abantu 3271 | Ibitekerezo 3

Imyaka 50 uhereye tariki 09 Ukwakira 1967 irashize Ernesto Guevara, umwe mu ntwari isi igifataho urugero atabarutse akaba yaravutse kuri se witwaga Ernesto Guevara Lynch na nyina Celia de la Serna y Llosa, tariki 14 Kamena 1928, mu gace ka Rosario mu gihugu cya Argentina. Benshi mu bakurikiranye amateka y’uyu munyepolitiki w’umuganga bemeza ko yari intwari idasanzwe uretse ko hari n’abandi bakunze kumunenga bavuga ko yategekanye igitugu.

Ernesto "Che" Guevara ni umugabo ufatwa nk’intwali mpuzamahanga bitewe n’uko yarwanye intambara nyinshi zigamije gushaka impinduramatwara mu bihugu bitandukanye byo ku isi, ibi kandi yabikoraga atitaye ku gihugu cyangwa ubwoko bw’abantu arwanirira. Kugeza ubu amatwara ya gisirikare n’ibitekerezo biri ku mitima ya benshi by’umwihariko ku bakiri bato bafite indoto zo kuzaba intwali nka Che Guevara.

Ernesto Che Guevara yikundiraga umukino wo koga ndetse no gukina Rugbby, ariko nyuma se umubyara yaje no kumwigisha umukino wa chess ndetse atangira no kujya mu marushanwa atandukanye. Ubusanzwe uyu mukino wa Chess ukundwa n’abantu bakuze, abahanga muri uyu mukino bavuga ko ufasha umuntu gutekereza cyane bityo akaba yafata icyemezo yatekerejeho . Che Guevara yakundaga gusoma ibitabo cyane kuburyo nk’aho yabaga bahasanze ibitabo birenga ibihumbi 3 byanditswe n’abantu batundukanye b’abahanga babayeho kuri iyi isi. Muri ibi bitabo harimo iby ‘umufirozofe Karl Max wari waranditse ibitabo byinshi byibanda ku kugaragaza ibitekerezo bye ku bijyanye n’ubukungu.

Mu bitabo bye, Karl Max yagaragazagamo kunenga uburyo usanga ku isi ubukire buri mu maboko ya bamwe by’umwihariko abari ku butegetsi n’inkoramutima zabo. Ibitabo bya Karl Max ndetse n’iby’abandi banyabwenge batandukanye barimo nka Jean Paul Sartre nibyo byatumye Ernesto Guevara yumva ko agomba kurwanya akarengane atitaye ku gihugu cyangwa ubwoko bw’abantu runaka. Ahari akarengane hose ku isi Ernesto Guevara, yumvaga ari ikibazo kimureba.

Guevara yari umuganga uharanira impinduka Aha Che Guevara yari kumwe na Fidel Castro wari inshuti ye magara

Mu mwaka w’1948, Guevara yagiye kwiga ubuvuzi kuri kaminuza ya Buenos Aires. Yari umuntu ukunda gutembera aho yari afite indoto zo kuzagera mu bihugu byose byo ku isi. Akirangiza amashuri ye, Che Guevara yatangiye gukora ingendo hirya no hino ku mugabane w’Amerika y’Epfo, aho yagiye abona uburyo abaturage babayeho mu bukene, ari naho yabonye ko atakiri umunya Argentine afata icyemezo cy’uko agomba kurwanya ubusumbane mu bantu akoresheje impinduramatwara. Nta kundi yagombaga kubigeraho kitari ugufata intwaro agakuraho ubutegetsi yashinjaga kutita ku buzima n’imibereho by’abaturage.

Che Guevara yatangiye kumvisha abaturage ko hashobora kujyaho ubundi butegetsi bwa gisosiyaliste bubitayeho, ibyo byatumye abasore b’abakane mu burakari bukabije biyemeza kujya inyuma ya Che Guevara. Umugabe wose wa Amerika y’Epfo wahise uhinduka imvururu abaturage birirwa mu myigarangambyo.

Urugendo rwa Guevara muri Politiki

Mu ntangiro z’umwaka w’1954, Che Guevara yahuye n’umunya Cuba Raul Castro murumuna wa Fidel Castro wari umuyobozi w’umutwe wa M-26(Mouvement du 26) warwanyaga ubutegetsi bw’igitugu muri Cuba buyobowe na Fulgencio Baptista. Nyuma y’ibyumweru bike, Che Guevara yabashije kwibonanira imbonankubone na Fidel Castro wari ukiva mu buroko, mu kiganiro cy’ijoro ryose bagiranye, Che Guevara yakunze ibitekerezo by’impinduramatwara bya Castro yiyemeza gufatanya nawe mu kubohora Cuba.

N’ubwo yahise ahabwa inshingano zo kuba umuganga w’abarwanyi ba M-26, Che Guevara nawe yakurikiye imyitozo ya gisirikare, ndetse Col Alberto wabatozaga yavuze ko Che Guevara ari we witwaye neza mu batojwe bose.

Che Guevara ni umwe mu basirikare 82 bafashe ubwato batera Cuba, gusa bahuye n’insanganya bakigerayo kuko barashweho bikomeye n’ingabo za Baptista Fulgencio harokoka mbarwa ndetse abandi nabo bahigwa bukware baricwa. Mu nyandiko ze Che Guevara avuga ko ariho yataye agakapu ke k’ubuganga afata amasasu, kuva ubwo aba abaye umurwanyi. Muri 20 barokotse, 12 nibo bakomeje umugambi wo kubohora Cuba, barimo na Che Guvara. Aba nibo bongeye kwisuganya mu misozi ya Sierra Maestra bayobowe na Fidel Casto. Mu ntambara yo kubohoza Cuba, Che yagiye azamurwa mu ntera na Fidel Castro kugeza ubwo abaye umwe mu bayobozi bakuru b’umutwe wa M-26.

Mu myitwarire ye yaranzwe ahanini no gutoza ikinyabupfura abasirikare, kwigisha gusoma no kwandika abashya, gushinga amavuriro mu duce babaga bafashe ndetse no kugirira impuhwe abasirikare ba Leta yabaga yafashe, dore ko hari n’igihe yabivuriraga ubwe. Gusa nanone ntiyihanganiraga amakosa y’ubugambanyi n’ibyaha by’intambara, ibi bigatuma agira igitinyiro mu bo ayobora. N’ubwo yari afite uburwayi bukomeye mu myanya y’ubuhumekero(Asma), Che Guevara yakomeje kugaragaza kwihangana no kudatezuka muri uru rugamba.

Che Guevara afatwa nk’umwe mu bahanga mu kuyobora intambara z’ishyamba(Guérilla). Ubuhanga bwe bwagaragariye by’umwihariko mu gitero cya Santa Clara, aho ingabo yari ayoboye zitarenze 100 zafashe gari ya moshi yuzuye intwaro za Leta, ndetse bafata uyu mujyi, ibi ari nabyo byabaye urufunguzo rw’intsinzi y’ingabo za M-26. Mu buhanga bwe mu kuyobora urugamba, Che Guevara yabashije gufasha ingabo za Fidel Castro mu gufata igihugu ndetse no guhirika ubutegetsi bw’igitugu bwa Fulgencio Baptista wari ushyigikiwe n’Abanyamerika.

Che Guevara nk’umuturage wa Cuba

Ubutegetsi bwa Cuba bukimara kujya mu maboko y’inshuti ye Fidel Castro, hashyizweho itegeko riha ubwenegihugu abantu bamaze byibuze imyaka 2 mu rugamba rwo kubohora igihugu ari nabwo Che Guevara yahise abona ubwenegihugu bwa Cuba. Muri icyo gihe yahise agirwa umuyobozi mukuru wa gereza nkuru muri iki gihugu ndetse atangira gufungiramo bamwe mu bakoranye n’ubutegetsi bwa Baptista wari umaze guhirikwa ku butegetsi. Abesnhi muri aba basirikare ba Baptista bahawe ibihano byo kwicwa, maze bamwe mu miryango y’aba bahawe ibi bihano batangira kubona ko uyu mugabo ari inkoramaraso idasanzwe ariko we akavuga ko ari ubutabera.

Che Guevara n’ubwo atari Perezida wa Cuba muri icyo gihe ariko niwe wagiraga inama Fidel Castro ndetse ibitekerezo bye nibyo byagenderwagaho mu mitegekere ya Cuba cyane ko yazanaga ibitekerezo bishyira imbere abaturage. Icyo gihe benshi bagannye amashuri ndetse ashyiraho imirimo rusange izamura ubukungu bw’abaturage dore ko nawe yagaragaraga ari gufatanya n’abaturage muri iyi mirimo yo guhinga, icyo gihe kandi Fidel Castro yashyize Che mu mirimo myinshi ya Leta harimo nko kuba umuyobozi mukuru wa gisirikare kandi akaba n’umuganga utibagiwe ko yigeze kuyobora banki nkuru y’iki gihugu.

Ibitekerezo bya Che byakunzwe cyane n’abaturage ariko bikababaza cyane ibihugu bigendera ku mahame ya gikapitalisite. Mu kwezi kwa Gashyantare 1965, nibwo Che Guevara yumvikanye anenga bikomeye ubutegetsi bwo muri Algeria, anenga ubutegetsi bw’abasoviyete ko bukenesha ibihugu bito biburi inyuma, ubwo yari acanye umuriro utazima binatuma ava muri politiki.

Nyuma yo kuba Minisitiri w’imari muri Cuba no gukora imirimo inyuranye ariko ubukungu bwa Cuba bukanga bugasubira hasi, Che yanditse ibaruwa isezera ku mirimo yose ndetse n’ubwenegihugu bwa Cuba arabusubkza, ayishyikiriza Fidel Castro arangije afata umwanzuro wo gukurikiza inzozi ze zo mu bwana zo guhirika ubutegetsi bwa gikapitalisite ari nabwo yahise yegura ibikoresho yerekeza muri Congo (Zaire). Muri iki gihugu yajemo azanywe no guhorera inshuti ye Patrice Lumumba cyane ko yanengaga bikomeye ubutegetsi bwa Mobutu.

Leta Zunze Ubumwe za Amerika zaje kugirana ikibazo gikomeye n’igihugu cya Cuba bigera n’ubwo iki gihugu cya Amerika gishaka kugaba ibitero kuri Cuba inshuro nyinshi ariko ingabo ziyobowe na Che zikababera ibamba bituma basubira inyuma kuburyo Amerika yageze ubwo ibona ko Cuba atari igihugu cyo kwisukira., bituma Abanyamerika bashaka uburyo bashobora kwikiza uyu mugabo wari indwanyi ikomeye.

Che Guevara yaje kongera gutegura ibikoresho n’ingabo ze nk’uko yari asanzwe abigenza berekeza mu gihugu cya Bolvia aho yari agiye guhirika ubutegetsi bwa gikapitalisisite nk’uko yari asanzwe abigenza ariko nirwo rwari urugendo rwe rwa nyuma kuko abanyamerika bari bamutegereje, maze bamuhigisha uruhindu baramufata arafungwa aricwa umurambo we werekwa abanyamakuru.

Source:BBC, Wikipedia, Dail Mail


INKURU ZA :
Tanga Igitekerezo
Ibitekerezo 3
Nsapa Kuya 14-10-2017

Che nange ni umu idol wange kbsa R. I. P

Hassan Ally Kuya 10-10-2017

Che, Azahora mu mitima y’abarwanyi b’ukuri. R.I.P M’zee Guevara.

Amani Kuya 10-10-2017

Turabashimira Amakuru Mezankayo Mutugezaho Murakoze!!

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...