konka coffee
KONKA

AMAKURU

UKWEZI

Ibaruwa ifunguye Joriji Baneti yandikiye Minisitiri w’Umuco na Siporo

Ibaruwa ifunguye Joriji Baneti yandikiye Minisitiri w’Umuco na Siporo
16-05-2016 saa 00:01' | By Chief Editor | Yasomwe n'abantu 17506 | Ibitekerezo 12

Madamu Minisitiri w’Umuco na Siporo, mbanje kubashimira uburyo mwitanga ngo umuco wacu ukomeze kubungwabungwa, n’ubwo mbona hari bimwe by’ingutu byirengagizwa nkana, ari nacyo cyatumye nshaka kubandikira kugirango mbagaragarize bimwe mu binshengura umutima.

Joriji Baneti sinkunda kwirata nahoze mu bujiji, ariko nyuma yo kujijuka numva nkwiye gutambutsa ubutumwa buvuganira rubanda bukanagira uruhare mu kubaka igihugu cyacu. Ibyiza ndabishima ariko kandi sinzemera kurya indimi mbona hari ibyo kunengwa.

Madamu Minisitiri, uburyo Ikinyarwanda gihonyorwa kandi bikajyana no kwereka abanyarwanda bacyubaha ko nta gaciro kigifite ahubwo cyasimbujwe uruzungu, mbona bibabaje kandi biteye agahinda. Niba se abayobozi ari bo batanga urugero mu gutesha agaciro nkana ururimi rwacu, ubwo abaturage bandi bo bazabyumva ryari?

Mu minsi micye ishize ubwo hirya no hino mu Rwanda twibasirwaga n’imvura yangije byinshi, nashavujwe n’umuyobozi umwe wagiye imbere y’abaturage bibabariye, akababwira ibintu byinshi ariko akagenda ntacyo batoyemo. Yarateruye ati: "Turihanganisha imiryango yabaye vigitimuzi, tunashimira bamwe mu baturage bagaragaje umutima mwiza bagaha sapoti bagenzi babo, ni ubutwari cyane gusapotinga abari mu kaga bakabona solushoni. Gavumenti nayo igomba gufasha vigitimuzi guhangana n’izi calenjizi. Gusa ibi bikwiye kuduha isomo, iyi sizoni yaratunguranye cyane ariko kandi kuba hari benshi bagumye muri hayi risiki zone byatumye hangirika byinshi n’abantu barapfa. Tugomba kugirana solidariti na loko gavumenti otoritizi hagashakwa solushoni zihamye".

Ibi byarambabaje, kuko n’ubwo njyewe Joriji nagobotswe na gahunda y’uburezi kuri bose nkabasha kujijuka, sinakwirengagiza abasaza n’abakecuru bazi neza ikinyarwanda cyacu kandi bacyubaha ariko batabasha kumva urwo ruzungu. Uzi ukuntu bateze amatwi ariko ukabona ntacyo bumvise ahubwo nabo bararebana? Nashatse kwidumbukiza ngo mpite nigira imbere mbasobanurire kuko njye nabyumvaga, ariko nsanga nanone naba nkoze ikosa ryo gusuzuguza umuyobozi, ndaceceka nshiriramo. Ese ubundi abo bayobozi bagiye bavuga mu ruzungu rwonyine ariko bagashaka n’umusemuzi ubwira abaturage, aho gukandagira nkana ururimi rwacu?

Ese Madamu Minisitiri, muribuka ko indirimbo y’igihugu ivuga ko umuco dusangiye ari wo uturanga naho ururimi rwacu rukaduhuza? Nonese mwe mushinzwe umuco no kwimakaza urwo rurimi kuki mudasaba abayobozi ngo bajye bavuga ikinyarwanda kizima mu gihe bavugana n’abaturage baciriritse koko? Ese kuki ibigo bitanga serivisi ku banyarwanda usanga kenshi amatangazo bitanga aba ari mu ruzungu, kandi abo aba agenewe ari abanyarwanda, harya nicyo cyerekana ko abanyarwanda twaminuje tukamenya uruzungu? Mbona ibi byaba ari ubukoroni bukomeje, ikinyarwanda cyacu gikwiye kubahwa cyane, kuko niba tutavuga ikinyarwanda, twaba turimo no gutakaza umwimerere wo kwitwa abanyarwanda.

Madamu Minisitiri, reka nsoze mbashimira ubwitange muzagira mu gukemura iki kibazo, ariko kandi hari n’ibindi bishyigikira ko umuco wacu ukomeza gucika nzagarukaho ubutaha, ikinyamakuru Ukwezi.com nicyongera kumpa akanya ngo mbagezeho ubutumwa bwanjye.


INKURU ZA :
Tanga Igitekerezo
Ibitekerezo 12
ki Kuya 4-12-2016

Jorji wibagiwe nikindi ntabaruwa yakwandikwa mu kinyarwanda usaba akazi ngo uzakabone ikinyarwanda nicyo murugo ntabwo ari icyo mukazi ahubwo kiri gutuma abana biga nabi ntawe uzavuga nkuwo muyobozi kuko uruzungu ntarwo

MUSERUKA J.BAPTISTE Kuya 23-11-2016

ESE UBU UYU NI JORIJI CYANGWA NIN UMUFILOZOFE. ICYAKORA ARANSEKEJE KW’IJAMBO RYURIYA MUYOBOZI.

kuku Kuya 13-10-2016

Joriji ibyo avuga ni ukuri.ahubwo nibaza niba abo yandikiye babisoma bakabiha agaciro kugirango bikosorwe,kuko ururimi rwacu ntabwo tugomba kuruvangira ni umwimerere w’abanyarwanda.

Jean bosco Kuya 25-09-2016

mwikorana buhanga .nurubyiruko .nibamuke mubyaro .erega mwese nubwo mutuyobora mwaturutse mucyaro ,buriya mayor warutsiro mboneyeho kumushimira mubyo akora iyo kuri tere azirikana hahantu yakuriye numugabo!

Christine Kuya 20-09-2016

biragoye ariko abanyarwanda twese twikosore

TUYISENGE Kuya 16-09-2016

joriji rwose ibyavuga bifite ishingiro kuko abayubozi bamwe baraducanga mundimi pe,nibatange amahugurwa cg bakoreshe abazanye ibyo abaturage bumva kd bibafasha.

pu Kuya 10-09-2016

huuu

Dominique Kuya 17-08-2016

NTA MUNTU WITWA JORIJI WAGIRA IBITEKEREZO NK’IBI RWOSE IRI ZINA NARYO RIMUVEHO AHUBWO ASHAKE IRINDI KUKO IZI NAMA Z’UBWENGE ATANGA NDAZIKUNDA PE.joriji rwose nanjye nibaza nkawe reka twese abanyarwanda dufatanye tugarure umuco wacu kuko ngo n’ubundi agahugu katagira umuco karacika.Ni uruhare rwa buri munyarwanda kugira ngo twimakaze iby’iwacu .Urugero rworoshye kandi rwiza mwese ntekereza ko ntawe utarajya mu bukwe bwo gusaba no gukwa ,iyo abasaza bari kuganira batebya mu kinyarwanda biryohera amatwi kandi bikanarusha izo ndimi z’amahanga kuryoha.

Jane Kuya 12-08-2016

Sha Jori... Ni ukuri njye ndakwemera cyane. Ahubwo abantu nkawe bari baragiye he ko bakenewe cyane mu kujijura abitwa ko bajijutse kandi bakanahumura abitwa ko babona. Njye ndemezanya nawe ko ururimi rwacu ruri gucika turebera kandi rwagakwiye gukomera rukazakwira amahanga kubera umwimerere n’ubudahangarwa byarwo. Nihagire igikorwa amazi atararenga inkombe ngo twibagirwe nabo turibo. Turacyategereje ibindi bitekerezo byubaka utuzanira.

Elysée Kuya 11-06-2016

icyo nkundira uyu mugabo witwa Joliji Ni uko ataripfana kandi ibyo avuga aba ari ukuri. ikibazo Ni uko bene kubwirwa batabyumwa kandi niba babyumva ntacyo bakosora.

MUNYAMPETA Kuya 23-05-2016

SIPORO SE YO KO JORIJI NTACYO AYITUBWIYEHO. AYIBONA GUTE?

Andrew Kaggua Kuya 19-05-2016

Jori uvuze ukuri gusa nuko wowe ikinyamakuru ukwezi.com kiguhaye akanya twe tuzi byinshi bipfa mu muco nyarwanda, ngo ni iterambere ubu uzakura umugeni kuri watsapu,fesibuki,insitagaramu,tuwita....ngo muramarana kabiri jori guma wigishe ntucike intege tukurinyuma

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA