konka coffee
KONKA

AMAKURU

UKWEZI

Ikipe ya Mukura VS ishobora kuba igiye kwikura muri shampiyona y’u Rwanda

Ikipe ya Mukura VS ishobora kuba igiye kwikura muri shampiyona y’u Rwanda
26-09-2017 saa 09:33' | By Chief Editor | Yasomwe n'abantu 2763 | Ibitekerezo

Ikipe ya Mukura Victory Sports yo mu karere ka Huye, ishobora kuba igiye kwikura muri shampiyona y’u Rwanda, Azam Rwanda Premier League ya 2017/2018 yenda gutangira mu mpera z’iki cyumweru, bitewe n’uko amakonti yayo yafatiriwe ikaba itabasha kubona amafaranga na macye yayifasha kwitabira shampiyona.

Konti za Mukura Victory Sports, zafatiriwe n’Ikigo cy’igihugu gishinzwe kwinjiza imisoro n’amahoro, Rwanda Revenue Authority, kubera umwenda w’imisoro iyi kipe itigeze yishyura kuva 2010, iyo ikaba ikubiyemo imisoro ku mushahara w’abakinnyi n’abandi bakozi byose bibarirwa mu mafaranga y’u Rwanda 165.000.000.

Mu nama y’Inteko rusange ya Mukura yabaye ku Cyumweru tariki 24 Nzeri 2017, muri Hotel Galileo yo mu mujyi wa Huye, Perezida w’iyi kipe, Olivier Nzeyimana, nyiri kompanyi itwara abantu ya Volcano Express akaba n’umuterankunga wa Mukura Victory Sports, yatangaje ko bishoboka cyane ko batazigera bitabira shampiyona y’uyu mwaka.

Olivier ati: "Birashoboka cyane ko tuzikura muri shampiyona ya 2017/2018 niba amakonti yacu badahagaritse kuyafatira, kuko ikipe ntacyo ishobora gukora idafite amafaranga."

Avuga ko bemera uwo mwenda w’imisoro ndetse bakaba bari baratangiye kugenda bishyura ibirarane, bityo akumva bakwiye guhabwa uburenganzira bwo gukomeza gukoresha konti zabo. Avuga ko imisoro yose basabwa, badashobora guhita bayishyurira icyarimwe bityo mu gihe batadohorerwa bakaba bahita bikura muri shampiyona.

Muri iyi nteko rusange ya Mukura, ninaho hatangarijwe ingengo y’imari iyi kipe izakoresha muri uyu mwaka w’imikino ugiye gutangira, bakaba bazakoresha amafaranga y’u Rwanda 196.123.390. Muri aya harimo azatangwa n’akarere ka Huye nk’umuterankunga wayo mukuru angana n’amafaranga y’u Rwanda 104.000.000 mu gihe undi muterankunga wabo, Volcano Express, azatanga amafaranga y’u Rwanda 46.000.000, hanyuma abarirwa muri 9.000.000 akazakurwa mu mikino iyi kipe izakira kuri sitade ya Huye, abafana bakazishakamo 2.000.000 naho Azam Rwanda nk’umuterankunga wa shampiyona ikazatanga amafaranga y’u Rwanda 10.000.000.

Biteranyijwe ko iyi kipe yo mu karere ka Huye, niramuka ibashije kuguma muri shampiyona, izatangira ikina na Kirehe FC mu mukino uzaba kuwa Gatandatu tariki 30 Nzeri 2017.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...