konka coffee
KONKA

AMAKURU

UKWEZI

Real Madrid yatsinze Barcelona itayibabariye, ibyabaye kuri Cristiano bivugisha benshi

Real Madrid yatsinze Barcelona itayibabariye, ibyabaye kuri Cristiano bivugisha benshi
14-08-2017 saa 08:20' | By Chief Editor | Yasomwe n'abantu 10378 | Ibitekerezo

Mu ijoro ryo kuri iki Cyumweru tariki 13 Kanama 2017, nibwo habaye umukino ukomeye wahuje amakipe y’amakeba muri Espagne, ayo akaba ari Barcelona yari yakiriye Real Madrid mu mikino wa mbere wo guhatanira igikombe kiruta ibindi muri iki gihugu kizwi nka Super Cup, gihuza ikipe iba yaratwaye igikombe cya shampiyona n’iyatwaye igikombe cy’umwami. Real Madrid yatsindiye Barcelona ku kibuga cyayo Camp Nou ariko ibyabaye kuri Cristiano Ronaldo mu minota 3 ikurikirana byo byavugishije benshi ndetse n’ubu bikomeje kugarukwaho cyane.

Uyu mukino wari ukomeye cyane, waranzwe no guhangana bikomeye hagati y’amakipe yombi, dore ko wanatanzwemo amakarita menshi y’umuhondo n’imwe y’umutuku, hakabamo no kwitsinda igitego byagaragazaga igitutu amakipe yashyiranagaho. Ku munota wa 50 w’umukino, Gerard Pique wa FC Barcelona yitsinze igitego nyuma yo kotswa igitutu n’ab’imbere ba Real Madrid.

Ku munota wa 77, Lionel Messi yabashije kwishyura iki gitego, amakipe yombi ahita anganya 1-1. Igihangange Cristiano Ronaldo, nyuma yo kubona Messi atsinze igitego yabaye nk’uriwe n’inzuki, afasha ikipe ye kwizera kubona intsinzi ariko anatuma igira impungenge ku mukino utaha. Mu minota 3 yose ikurikirana, abarebaga uyu mupira bari bahanze amaso ibyaberaga kuri Cristiano.

Ku munota wa 80, Cristiano yatsinze igitego cya kabiri cya Real Madrid, bidatinze ahita akuramo umupira yari yambaye maze agaragariza abafana ba Barcelona ibigango bye mu rwego rwo kibishongoraho, bituma ku munota wa 81 ahabwa ikarita y’umuhondo. Bidatinze kandi ku munota wa 82, yagaragaje ko yakiniwe nabi na myugariro wa FC Barcelona, Samuel Umtiti, umusifuzi abifata nko kwigusha ku bushake bituma ahita ahabwa ikarita ya kabiri y’umuhondo yatumye ahabwa umutuku maze ahita ajyanwa hanze y’ikibuga, Real Madrid basigara bakina ari 10. Cristiano ibi ntiyabyishimiye ndetse yasunitse umusifuzi nk’ikimenyetso cy’uburakari yatewe no kutishimira imisifurire.

Real Madrid ariko ntiyagarukiye aho kuko ku munota wa 90 yaje kubona igitego cya gatatu cyatsinzwe na Marco Asensio, umukino urangira ari ibitego 3 bya Real Madrid kuri 1 cya FC Barcelona, bivuga ko Barcelona isabwa byibuze kuzatsinda 3-0 mu mukino wo kwishyura.

Ikarita y’umutuku yahawe Cristiano Ronaldo, yatumye atazakina umukino wo kwishyura ari nawo uzatangirwamo igikombe, uwo ukazabera ku kibuga cya Real Madrid kizwi nka Santiago Bernabeu kuri uyu wa Gatatu. Zinedine Zidane utoza Real Madrid ariko we yavuze ko yababajwe n’iyi karita yahawe rutahizamu we, avuga ko agomba kujurira mu ishyirahamwe ry’umupira w’amaguru muri Espagne.

Real Madrid isanzwe iri mu bihe byayo byiza, dore ko uretse kuba yaregukanye igikombe cya shampiyona n’icya UEFA Champions League umwaka ushize, inaherutse kwegukana icya European Super Cup itsinze Manchester United yo mu Bwongereza, ikaba ishaka no kwegukana iki gikombe igatangira umwaka wa shampiyona ifite ibikombe bibiri bikomeye.

Ku rundi ruhande, abafana ba FC Barcelona, abakinnyi n’abayobozi bayo, baracyari mu gahinda ko kubura Neymar uherutse kwerekeza muri Paris Saint-Germain yo mu Bufaransa, aguzwe akayabo katigeze gatangwa ku wundi mukinnyi uwo ari we wese mu mateka y’umupira w’amaguru ku isi, dore ko yatanzweho miliyoni 222 z’amayero, uyabaze mu mafaranga y’u Rwanda yarenga 218.000.000.000.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...