konka coffee
KONKA

AMAKURU

UKWEZI

Ishusho y’imikino mu Rwanda nyuma ya Jenoside aho abakinnyi basohokaga bakitwa abicanyi

Ishusho y’imikino mu Rwanda nyuma ya Jenoside aho abakinnyi basohokaga bakitwa abicanyi
11-04-2017 saa 17:41' | By Muhizi Olivier | Yasomwe n'abantu 3396 | Ibitekerezo

Mu gihe Abanyarwanda n’inshuti z’u Rwanda twibuka Jenoside yakorewe abatutsi muri Mata 1994, ikinyamakuru Ukwezi.com twaganire n’abakinnyi bakinnye mu gihe Jenoside yari ikirangira ndetse n’abayirokotse maze badusobanurira uruhare rw’imikino mu kongera kunga Abanyarwanda nyuma ya Jenoside. Olivier Karekezi na Eric Nshimiyimana ni bo twaganiriye baduha ubuhamya bwabo.

Eric Nshimiyimana yavukiye i Burundi ku babyeyi b’Abanyarwanda bahungiye i Burundi mu 1959, atangira gukina umupira i Burundi, nyuma ya Jenoside aratahuka nk’abandi banyarwanda, ndetse ari mu batangiye gukinira APR FC mu 1994, ubu ni umutoza wa AS Kigali. Karekezi Olivier we yavukiye mu Rwanda arokokera i Gikondo mu mujyi wa Kigali, by’umwihariko we gukina mu ikipe y’abana biri mu byatumye arokoka, ndetse nyuma yo kurokoka yakinnye umupira w’amaguru afite ibikomere ku mutima yatewe na Jenoside yakorewe abatutsi.

Duhereye kuri Eric Nsimiyimana wabaye mu buzima bw’impunzi ariko agakina n’umupira, ibyo gukina yabitangiriye muri Prince Louis mu ikipe y’abana, aho amariye gukura ajya mu ikipe y’abakuru. Bamwe mu bo babanaga i Burundi b’Abanyarwanda bagiye ku rugamba rwo kubohora u Rwanda ariko we asigara i Burundi. Jenoside irangiye na we yatahutse nk’abandi banyarwanda ariko iby’umupira yumvaga yarabiretse agiye gushaka ubundi buzima, inshuti ze zari zaragiye ku rugamba nka Rudifu ni bo bamusabye gusubira gukina umupira ahita ajya muri APR FC yari yaratangiye imyitozo ku Murindi, batangira gukina imikino ya gishuti na Kiyovu n’andi makipe atandukanye batangira guhuza Abanyarwanda.

Eric Nshimiyimana, hari ishusho yibuka icyo gihe nk’uko abisobanura agira ati”Ndibuka icyo gihe abantu ni ubwa mbere bari bahuye, umwe azi ko runaka yapfuye yajya kubona akabona barahuye... Abantu wabonaga bishimye ariko banafite n’ubwoba kuko batiyumvishaga ibiri kuba, mu 1995 nibwo batangiye gukina imikino mpuzamahanga ndetse basohoka hanze y’igihugu, ibintu byababereye imbogamizi ikomeye cyane kuko babitaga interahamwe n’abicanyi".

Nk’uko akomeza abisobanura, mu bihugu byinshi bitandukanye nta makuru nyayo bari bafite ku Rwanda, bari bazi ko abanyarwanda bose ari abicanyi. Mu bihugu nka Uganda, Tanzaniya na Congo, Abanyarwanda bari barahungiye muri ibyo bihugu nta makuru ya nyayo bari bafite ku Rwanda.

Eric Nshimiyimana ati: "Abenshi bari bazi ko iyo uje mu Rwanda uhungutse bakwica, abandi bazi ko ibintu byabo babitwaye, bazi ko nta muhutu ukiba mu gihugu kuko biyumvishaga ko ubwo ari abatutsi bafashe igihugu ari bo bari mu Rwanda gusa, hari nk’abazaga kuri Hotel twabaga turiho ubona bafite ubwoba bakabona ndimo gusangira n’umukinnyi mugenzi wanjye wenda w’umuhutu bikabatangaza cyane, bakibaza ukuntu umuhutu akinira ikipe y’igihugu ariko twebwe mu bakinnyi twari tubanye neza cyane tukabasobanurira ukabona baratunguwe”.

Igihe kimwe bagiye gukina muri Congo Brazzaville, mu mwaka w’ 1998 maze bahura n’abasirikare b’Abanyarwanda bari barahungiyeyo bagakorerayo n’igisirikare mu ngabo za Congo, babasobanurira uko mu Rwanda ibintu biteye. Abo basirikare bagiye guhamagara abanyarwanda bari barahungiyeyo batari abasirikare babaha amakuru, bahita babasaba kubakorera ubuvugizi kugirango bagaruke mu Rwanda.

Ikindi gihe bari mu ndege bajya muri Tunisia bagiye kunyura mu Bufaransa, bari mu ndege Eric aganira na mugenzi we maze umuzungu bari bicaranye aramubaza ngo "Muvuye hehe?" Undi ati tuvuye mu Rwanda! Umuzungu abisamira hejuru ati: "Mu Rwanda habaye Jenoside?"... Uwo muzungu kubyiyumvisha byaramunaniye kuko yari azi ko Abanyarwanda bose ari abicanyi ariko nyuma baramusobanurira aratuza! Eric Nshimiyimana avuga ko abakinnyi bageragezaga kwigengesera cyane kugirango batange isura nziza mu mahanga.

Eric kandi ashimira Imana kuba u Rwanda rwarabonye itike yo gukina igikombe cya Africa muri 2004 ndetse by’akarusho bagakina n’umukino wo gutangiza igikombe cya Africa, kuko ngo hari ubutumwa batanze. Avuga ko byagize akamaro ku isura y’abanyarwanda, kuko ngo ikibazo cyo kubura amakuru ku Rwanda ndetse no kwita abakinnyi interahamwe byaragabanutse cyane.

Eric Nshimiyimana yatangiye gukina muri APR FC mu 1994 aza no gukina muri Kiyovu imyaka 2, yahagaritse gukina umupira w’amaguru muri 2004, ndetse ni umwe mu bakinnyi bakinnye igikombe cya Africa muri 2004. Yatoje Amavubi ari umutoza mukuru, ubu atoza AS Kigali.

Olivier Karekezi we yatangiye gukina muri APR FC mu 1998 nyuma yo kurokoka Jenoside aho yaburiyemo umubyeyi we na mukuru we na benshi bo mu muryango we. Na we asanga Sport (imikino) yaragize uruhare mu kunga Abanyarwanda. Aganira n’ikinyamakuru Ukwezi.com yagize ati: ”Sport yagize uruhare runini mu kunga Abanyarwanda kuko mu by’ukuri mbona twarabifashijwemo n’abayobozi b’igihugu cyacu kuko bakunda imikino myinshi, kandi imikino igiye itandukanye. Nkubu nguhe urugero nakinanye n’umwana iwabo bagize uruhare muri jenoside yakorewe abatutsi, byabaga ngombwa ko hari ibyo ngomba kwibagirwa, cyane cyane ko ikipe nakiniraga kugeza n’ubu abayobozi bayo bari bashishikajwe no kubona Abanyarwanda babana mu mahoro, n’uwakosheje akabisabira imbabazi ku wo yagiriye nabi, kandi twaje kubigeraho dukora ibishoboka tubasha no kugera mu rwego rushimishije tujya gukina no hanze, byari byiza cyane”.

JPEG - 39.9 kb

Karekezi kandi yasobanuye uko babanaga n’uwo mukinnyi iwabo bakoze Jenoside kandi bakabana neza. Ati”Twari tubanye neza kuko ni ikipe irangwa na Discipline (ikinyabupfura) kugeza no muri iyi myaka kuko twayikinagamo harimo abakinnyi b’abasirikare barimo ba Captain Ntagwabira Jean Marie, ba Rudifu ba Popidou n’abandi benshi, ni ikipe yari irimo abantu bazi icyo gukora”.

Gusa avuga ko hari ibintu byamugoraga mu kibuga bigatuma yongera gutekereza ku mubyeyi we wari warapfuye muri Jenoside yakorewe abatutsi. Yagize ati”Hari ibintu byangoraga cyane, nk’igihe natsindaga igitego mbona buri wese yishimye, nkibaza impamvu mama wanjye n’abavandimwe banjye bapfuye, badahari ngo nabo bishimane natwe twese”.

JPEG - 207.6 kb

Mu bumwa yahaye Abanyarwanda muri iki gihe cyo kwibuka ku nshuro ya 23 Jenoside yakorewe abatutsi, Olivier Karekezi yabasabye guharanira kusa ikivi cy’inzirakarengane zishwe muri Jenoside, bakabaho ku bwabo no ku bw’abishwe kandi bakarushaho guharanira kwiyubakira igihugu.

Karekezi Olivier na Eric Nshimiyimana bose babaye abakinnyi ba APR FC n’ikipe y’igihugu Amavubi, ndetse bombi banabaye ba kapiteni b’ikipe y’Igihugu mu bihe bitandukanye, ariko ubu bombi ni abatoza .


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...