konka coffee
KONKA

AMAKURU

UKWEZI

Bumwe mu bwicanyi karundura bwahitanye benshi mu mateka y’isi dutuye

Bumwe mu bwicanyi karundura bwahitanye benshi mu mateka y’isi dutuye
14-04-2017 saa 17:07' | By Akayezu Jean de Dieu | Yasomwe n'abantu 8024 | Ibitekerezo 2

Abashakashatsi , abahanga n’impuguke mu mibereho ya muntu bagiye bagaragaza ko kuva muntu yabaho ndetse n’iyi si atuyeho nta mahoro arabaho arambye kuko ubuzima bwacu nk’abantu buhora iteka ari uruhurirane rw’ibyiza n’ibibi, gusa iyo urebye usanga ibi byose biteza ikiremwa muntu imihangayiko n’imiruho bikomoka ku cyaha twarazwe n’abakurambere bacu, tugiye mu myemerere itandukanye ya muntu, ikindi kintu usanga kiba kibabaje ku kiremwa muntu ni uko usanga n’umuntu afata mugenzi we akamwivugana n’inyamaswa zitabikora, ndetse ibi byo si ibyanone byatangiriye kuri Gahini na Abeli bavugwa muri Bibiriya kuri babandi bemera ibyo iki gitabo kivuga. Ku isi habaho ubwicanyi bwinshi, ariko hari ubwabaye indengakamere buyobowe n’ubwabaye mu Rwanda ari nabwo tugarukaho muri iyi nkuru.

Kugeza ubu bizwi ku isi ko Jenoside zemewe n’Umuryango w’Abibumbye muri iyi si ari eshatu zirimo Jenoside yakorewe Abayahudi (Holocaust 1939-1945), iyakorewe Abanyarumeniya (1915-1923) ndetse na Jenoside karundura yakorewe Abatutsi bo mu Rwanda mu mwaka w’1994. Hari ubundi bwicanyi ndengakamere (massacres ) bwagiye bwibasira inyoko muntu, bugahitana imbaga y’abantu benshi. Muri iyi nkuru turakugezeho bumwe mu bwicanyi ndengakamere bwabayeho hirya no hino ku isi, burimo Jenoside n’ubundi butemejwe nka yo.

7. Ubwicanyi bwakorewe Abashinwa mu mwaka w’ 1949-1976.

Byose byatangiye ku ngoma y’umunyagitugu wahoboye u Bushinwa, Mao Zedong, mu kiswe “Great Leap Forward” . Icyo gihe Mao yazanye ubuhinzi yise ko bujyanye n’igihe, ninabwo amamiliyoni y’abashinwa yishwe n’inzara n’umwuma. Bivugwa ko kuri iki gihe hapfuye Abashinwa bari hagati ya miliyoni 45 na 70, ariko uretse abo bishwe n’inzara hari n’abandi bishwe rubi. Mao ntiyigeze ahagarika ubwo buhinzi n’ubwo byagaragaraga ko abantu barushaho kuhashirira. Indi nkubiri yahitanye abantu ku gihe cya Mao, ni ikiswe “Cultural Revolution. Kuva yatangira mu w’1966, abantu barwanyaga Guverinoma batikiriye mu magereza, miliyoni nyinshi z’abantu zarafunzwe zamagana imitegekere ya Mao Zedong , bamwe baricwa abandi bapfira mu magereza bishwe n’inzara, kugeza ubwo abantu benshi bagiye bahamya ko umuntu mu Bushinwa yabonye agahenge Mao Zedong amaze gupfa.

6. Ubwicanyi bukorerwa abanya Korea ya ruguru kugeza n’ubu

Ubwo Kim II Sung yafataga ubutegetsi, imiryango iharanira uburenganzira bwa muntu yateye hejuru ivuga ko Korea yicisha inzara abagororwa ba Politike cyane cyane abatavuga rumwe n’ubutegetsi ariko kandi ngo ubu bwicanyi ntibwigeze buhagarara kugeza uyu munsi. Gusa ibi ntacyo byatanze kuko imbaga y’abaturage yakomeje kuhatikitira ,ngo abamaze kwicwa kuva icyo gihe barenga miliyoni utabariyemo abagore n’abana babo bagiye batikirira mu magereza ya politike ari mu majyepfo ya Korea y’amajyaruguru. Umwanditsi akaba n’umushushanyi Pablo Picassa byaramurenze maze akora igitabo kigaragaza agahomamunwa gakorwa na guvernoma ,igakorera abaturage bayo maze akita “Massacre in Korea”

5. Ubwicanyi bushingiye ku madini hagati y’Abahindu, Islam,S ikhs (partition India)

Ubu ni bumwe mu bwicanyi bushingiye ku madini bwibasiye rubanda nyamwishi ku isi, hari ahagana mu mwaka w’1947,ubwo icyahoze ari igihugu cyakoronizwaga n’Abongereza, kigabanyijemo ibice bibiri, Pakistan n’u Buhinde. Muri icyo gihe insoresore z’abahindu n’iz’aba Sikhs zirukanye bikomeye uwitwa umuyoboke w’idini ya islam wabarizwaga ku butaka bw’u Buhinde, ku rundi ruhande nanone niko insoresore z’idini ya Islam zamaganiye kure uwari umuhindu cyangwa umu Sikhs maze ava mu gace kitwa Pakstan y’iki gihe, ahunga atazi iyo ajya,… Abarenga miliyoni y’abantu barapfuye icyo gihe, abagore bamwe bafatwaga ku ngufu ndetse bigakorwa n’abana babo bareba.

Nk’uko IBT ibitangaza, ngo abagore bamburwaga ubusa maze bagashyirwa mu muhanda, bazira ukwemera kwabo. Ngo hari n’abahitagamo kwiyahura aho gufatwa ku ngufu imbere y’ibibondo byabo. Ni uko itegeko rivuye ibukuru ryategekaga ko abahindu batura igice kimwe n’abayisilamu bagatura ukwabo, ryateye ubunyamaswa mu bantu maze baramarana.

4. Ubwicanyi bwakozwe na Joseph Stalin (Stalinist Era/URSS 1929-1953)

N’ubwo abenshi babanza ku isonga Adolf Hitler nk’umwicanyi ruharwa w’ikinyejana cya 20, uyu mwanya awuhanganiyeho na Joseph Stalin kuko na we amaraso yakarabye utayashyira mu ngunguru ngo ubashe kuzibona nk’uko amateka abigaragaza.

Ntiwabara abantu bishwe n’amategeko ya Stalin yo guhutiraho ndetse ntiwabara abishwe n’ingaruka z’ivugurura ry’ubuhinzi yazanye, ndetse umwishywa we Alexandre Allilouiev yavuze ko nyirarume yari inyamaswa yuzuye. Abenshi bagereranya abantu bapfuye ku bwa Stalin ariko biragoye kumenya umubare nyawo ariko kandi Toptenz ivuga ko abasaga miliyoni 9 bahatikiriye. Nyamara aba bose bapfuye mu gihe cy’imyaka 10 gusa yamaze ayobora Leta Zunze Ubumwe z’Abasoviyete (URSS), ubu ni igihugu cy’u Burusiya.

3. Jenoside yakorewe Abanye Arumenia (1915-1923)

N’ubwo AbanyaTurikiya b’iki gihe batabikozwa, nib o babanjirije undi muntu wese wagambiriye gutsemba burundu muntu amuziza aho aherereye. Hari mu kinyejana cya 20 ubwo Empire Ottman yari iyobowe na Enver Pasha (1881-1922) yishe kandi yicisha umwuma n’inzara abanya Armenia bagera kuri miliyoni 1 n’ibihumbi magana inani (1.800.000), harimo n’ibihumbi by’abatari abanya Armenia kavukire. Abanya Ottman ari yo Turikiya ya none, bishe urw’abashinyaguro abaturage benshi bari batuye muriArmenia, bakazizwa gusa ko ngo bahaga icyuho ingabo z’Abarusiya zazaga gutera Empire Ottman.

2. Jenoside yakorewe Abayahudi (The Holocaust 1939-1945)

Adolf Hitler, ni umwicanyi ruharwa mu mateka ya muntu wateruye akavuga ko Abayahudi atari ubwoko bw’Imana ari na yo mpamvu yafashe umugambi wo kubarimbura ku isi bose afatanije n’Abanazi. Uwavuga kuri ubu bugome bwa Hitler yakwandika ibitabo cyane ko hari benshi mu banditsi bakomeje kugaruka kuri uyu mugabo wahinyuje Imana yaremye abayahudi akavuga ko batari ubwoko bwayo.

N’ubwo byose byaje kurangira uyu Hitler yirashe mu mutwe mu kwezi kwa Mata 1945, yasize agaritse ingogo kuko abayahudi basaga miliyoni 11 harimo miliyoni imwe n’igice by’abana bato. Aba bose bishwe mu buryo bugayitse burimo gukoreshwa imirimo y’ingufu, kwicishwa umwuma n’inzara, gushinyagurirwa no kuraswa no kwimurirwa aho muntu atabasha kubona ibimutunga.

1. Jenoside yakorwe Abatutsi mu Rwanda (Mata/1994).

Iyi ni yo Jenoside iheruka kuba mu mateka ya muntu, ikindi kandi iyi ni yo Jenoside yihariye aho Abaturage bo mu gihugu kimwe bahindukiranye abandi bagenzi babo basangiye igihugu n’ubwenegihugu, hanyuma bakabicisha imihoro, ubuhiri, udufuni n’izindi ntwaro gakondo, hamwe n’imbunda, amagerenade ndetse n’ibindi bikoresho byakoreshwaga n’Abashyize mu bikorwa iyi Jenoside dore ko bari barangajwe imbere n’ubwari ubuyobozi bwabo kuko ari bwo bwari bwarateguye iyi Jenoside.

Hashize imyaka 23 iyi Jenoside ibaye, ari nayo twibuka kuva tariki ya 7 Mata wa buri mwaka, ikaba imara iminsi ijana, ingana n’amezi asaga atatu iyi jenoside yamaze ariko muri icyo gihe gito yatwaye ubuzima bw’Abatutsi basaga miliyoni n’abandi banze kwitandukanya na bo. Aba bose kandi nk’uko amateka abigaragaza, bishwe amahanga arebera ndetse na Leta ibigizemo uruhare kuko ari yo yari yarateguye aya mahano nk’uko ubushakashatsi n’ubuhamya bwa bamwe mu bagize uruhare mu itegurwa ry’iyi Jenoside bubigaragaza.


INKURU ZA :
Tanga Igitekerezo
Ibitekerezo 2
Aime Kuya 16-04-2017

Jenocide yakorewe abatutsi yo yaje ari karundura

Denis Kuya 14-04-2017

Iyi si yagwiriwe n’amahano kuva ikiremwa muntu cyayigeraho gusa Imana nidutabare kuko ubunyamaswa mu bantu burarushaho kwiyongera

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...