konka coffee
KONKA

AMAKURU

UKWEZI

Danny Vumbi na Emma Claudine bahaye abakobwa amakariso yaguzwe hafi miliyoni ebyiri

Danny Vumbi na Emma Claudine bahaye abakobwa amakariso yaguzwe hafi miliyoni ebyiri
13-05-2017 saa 11:13' | By Chief Editor | Yasomwe n'abantu 6169 | Ibitekerezo 2

Mu masaha y’umugoroba wo kuri uyu wa Gatanu tariki 12 Gicurasi 2017, umuhanzi Danny Vumbi ari kumwe na Emma Claudine wamenyekanye nk’umunyamakuru akaba n’impirimbanyi mu kwigisha abanyarwanda iby’ubuzima bw’imyororokere, basuye abanyeshuri bo ku kigo cy’amashuri cya Groupe Scolaire St Dominique giherereye i Gihara mu murenge wa Runda wo mu karere ka Kamonyi, banatanga amakariso ku bana b’abakobwa afite agaciro gakabakaba miliyoni ebyiri z’amafaranga y’u Rwanda.

Igikorwa cyo gutanga amakariso mu bigo by’amashuri atandukanye mu Rwanda, ni igitekerezo cya Danny Vumbi, Emma Claudine n’abandi bagenzi babo batatu babonye ko nk’ababyeyi hari umusanzu bakwiye gutanga mu kwigisha abana b’abakobwa uburyo bakwiye kugira isuku no kwiyitaho by’umwihariko igihe bageze mu kigero cy’ubwangavu. Gutanga amakariso ubwabyo si cyo kiba kigenderewe, ahubwo baba bagamije gutanga ubutumwa bugamije kubigisha iby’isuku igendana n’ubuzima bw’imyororokere.

Abanyeshuri bo muri Groupe Scolaire St Dominique Gihara bari benshi bumva ubutumwa bwa Emma Claudine na Danny Vumbi

Abarimu n’abayobozi b’ikigo nabo bari bahari

Ubwo Danny Vumbi na Emma Claudine bageraga muri iki kigo, babanje kuganiriza abanyeshuri ibijyanye n’isuku ikwiye kugirirwa imyanya myibarukiro n’imyenda bambara imbere, banahabwa impano y’imyenda y’imbere (amakariso) irenga igihumbi, Danny Vumbi akaba yatangarije abanyamakuru bari bahari ko ifite agaciro kari hagati ya 1.500.000 na 2.000.000 z’amafaranga y’u Rwanda. Aba banyeshuri kandi banaririmbiwe na Danny Vumbi byagaragaye ko ari umuhanzi ukunzwe cyane n’urubyiruko.

REBA HANO ABANYESHURI BARIRIMBANA NA DANNY VUMBI:

Nyuma y’iki gikorwa, Danny Vumbi na Emma Claudine basobanuye aho igitekerezo cyo gukora iki gikorwa cyavuye ndetse n’icyo kigamije. Danny Vumbi ati: "Igitekerezo cyaje mu minsi ishize, kiza giturutse mu mitwe y’abantu basanzwe n’ubundi baziranye kandi b’ababyeyi barimo Emma Claudine, barimo nanjye Danny Vumbi harimo n’abandi bagera muri batatu, hanyuma tugira igitekerezo cyo kwegera ibigo by’amashuri cyane cyane mu rwego rwo gukangurira abana b’abakobwa kugira isuku hanyuma duhita dufata icyemezo cyo kubashakira imyenda y’imbere kuko burya iyo idahagije nabyo biba ari ibibazo... Dusanzwe turi ababyeyi, umubyeyi rero burya ntabwo areba abana be gusa ahubwo unyuza akajijo n’ahandi, nkanjye wakoze n’uburezi hari ishusho y’isuku mfite, ntabwo navuga ko isuku iri hasi cyane ariko nanone hari utubazo two gukemura, hari abana bavuka mu miryango itifashije bashobora kuba bafite wenda umwambaro umwe gusa w’imbere, kuwusukura urumva biragora.”

Danny Vumbi na Emma Claudine biyemeje gufasha abangavu kumenya uko bakwiye kwigirira isuku y’imyenda y’imbere

Ku ruhande rwa Emma Claudine, yasobanuye ko n’ubwo hatanzwe iyi mpano y’amakariso atari yo bo baha agaciro cyane, ahubwo icyari kigamijwe ari ugutanga ubutumwa bujyanye n’isuku bakwiye kugirira imyanya myibarukiro yabo. Yagize ati: "Imyambaro twazanye ntabwo ari yo twe duha agaciro cyane ahubwo icyo duha agaciro cyane ni ubutumwa twatanze nyuma yo kuzana iyi myambaro. Twabashije kuganira n’abangavu, burya abangavu ni abantu baba bamaze kugera mu gihe gikomeye cyane, bava mu bwana baba abantu bakuru. Baba basabwa kwigirira isuku ariko rimwe na rimwe ugasanga ababyeyi barareba iyo suku bakayitaho ariko bakita cyane ku y’inyuma... Umwangavu aba yatangiye kwihishahisha no kumenya ko imyambaro y’imbere ari we uyikorera isuku, umubyeyi akabimubwiriza ariko ugasanga ntajya kubireba cyane, hari igihe rero usanga umwana afite nk’imwe gusa cyangwa yaratangiye kumucikana, cyangwa se ugasanga harimo n’abatayigira"

Nyuma yo gutanga ubutumwa banahaye abangavu amakariso arenga 1000

Emma Claudine na Danny Vumbi basobanuye ko bo na bagenzi babo batatu batabashije kuboneka aha, bakoresha ubushobozi bwabo bakabona n’inkunga z’abandi bantu cyane cyane b’ababyeyi bumva agaciro k’iki gikorwa, kandi nabo bakaba bagikora mu rwego rwo gushyigikira ibyakozwe na Leta birimo icyumba cy’umukobwa cyashyizwe mu bigo by’amashuri. Bavuga ko bazakomeza ibikorwa nk’ibi no mu bindi bigo bitandukanye bagamije cyane gutanga ubutumwa bujyanye n’isuku y’imyanya myibarukiro ku bana b’abakobwa bageze mu kigero cy’ubwangavu.

Mu izina ry’ubuyobozi bw’ikigo cya Groupe Scolaire St Dominique Gihara, umuyobozi wungirije ushinzwe amasomo, Nsengiyumva Clement, yashimye cyane igikorwa cya Emma Claudine, Danny Vumbi na bagenzi be batatu batabashije kuhagera, avuga ko ari iby’agaciro kuba batekereje guha impano abakobwa bo muri iki kigo bakanabagenera ubutumwa bugamije kubakangurira kurushaho kugira isuku.


Tanga Igitekerezo
Ibitekerezo 2
amani Kuya 6-06-2017

abahungu nabo barimo cg nabakobwa gusa so bt thx vumbi and cloudine

J Damascene Kuya 13-05-2017

turabashimiye icyogikorwa cyiza bakoze Imana ibahumugisha
ariko mwuzuze iyonkuru neza ababandi batatumuvuga bafatanije mubavuge namazina yabo thx

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA