konka coffee
KONKA

AMAKURU

UKWEZI

Esther wabaye umunyarwandakazi wa mbere utwara indege agiye kurushinga n’umunyamuziki

Esther wabaye umunyarwandakazi wa mbere utwara indege agiye kurushinga n’umunyamuziki
22-12-2016 saa 12:10' | By Chief Editor | Yasomwe n'abantu 20505 | Ibitekerezo 7

Esther Mbabazi, umunyarwandakazi wa mbere wabashije kuba umupilote w’indege z’ubucuruzi akanabigeraho akiri umwana muto, agiye kurushinga n’umusore ukora ibijyanye n’umuziki, mu gihe cya vuba bakaba bateganya gukora ubukwe bakereka ibirori ababyeyi n’inshuti n’abavandimwe.

Mu mwaka utaha wa 2017, nibwo biteganyijwe ko Esther Mbabazi azambikana impeta y’urudashira n’umusore witwa Olivier Habiyaremye nk’uko amakuru dukesha inshuti z’imiryango yabo abihamya. Gusa hashize igihe gito uyu musore na we abitangaje, ahamya ko arambiwe kuba wenyine kandi agiye kurongora uyu mupilote bakibanira ubuziraherezo.

Tariki 13 Ugushyingo 2016, nibwo Olivier yambitse impeta Mbabazi Esther ihamya urukundo amukunda, bijyana n’uko yahise atangaza ko bagiye gukora ubukwe mu gihe cya vuba. Abinyujije kuri Instagram yahise ashyira hanze ifoto amwambika impeta, maze yandikaho amagambo agira ati: "Umukunzi wanjye yambwiye YEGO. Ndumva mu by’ukuri ndimo kurushaho kumukunda, iyi myaka itatu tumaranye yabaye urugendo rw’agatangaza mu rukundo rwacu. Ndambiwe kujya ntaha mu rugo njyenyine, ndambiwe za telefone z’umwanya munini tuvugana igicuku cyose. Esther Mbabazi ndagukunda kandi nshaka kugukunda kurushaho by’iteka... Ku mugaragaro mvuye ku isoko..."

Ku ruhande rwa Esther, icyo gihe nawe yashyize kuri Instagram ifoto y’ikiganza cye agaragaza impeta yambitswe, maze avuga ko yemereye Olivier kuzamubera umugore, bityo akaba yavuye ku isoko yasohotse mu mubare w’abagishakisha abakunzi kuko yamaze kwemeranywa kubana n’uwo Imana yamugeneye.

Nyuma yo kwemeranywa kubana, amakuru yizewe agera ku kinyamakuru Ukwezi.com avuga ko ubukwe bwabo buri mu mwaka utaha wa 2017, ariko impapuro z’ubutumire zikaba zitaratangira gutangwa ngo amatariki nyayo amenyekane.

Olivier ni umunyamuziki ucuranga ibikoresho bya muzika bitandukanye nka gitari, akaba anatunganya muzika akanakora ibindi byinshi bijyanye nawo, ibirenze kuri ibyo akaba akora amafilime akanafata amashusho agezweho nk’uko abigaragaza mu myirondoro ye ku rubuga rwe rwa Instagram.

Esther Mbabazi we ni muntu ki?

Esther Mbabazi watangiye kumenyekana cyane muri 2014, ni we munyarwandakazi wa mbere wabashije gutwara indege ubwo yari afite imyaka 24 gusa y’amavuko, ndetse akaba kugeza n’ubu ari we munyarwandakazi rukumbi ukora aka kazi ko gutwara indege z’ubucuruzi. Uyu mukobwa ufite imyaka 27 y’amavuko kugeza ubu, amaze kwamamara no kuba umuntu benshi bafatiraho urugero.

JPEG - 48.7 kb

Urukundo rw’akazi ko gutwara indege kuri Mbabazi Esther, byakabaye byarakomwe mu nkokora n’urupfu rwa se kuko yazize impanuka y’indege yabereye muri Kongo Kinshasa ubwo uyu mukobwa yari afite imyaka 8 gusa y’amavuko, nyamara kudacika intege no gushikama ku ntego byatumye uyu munyarwandakazi ashyira imbaraga mu bijyanye no kuba yagera ku nzozi ze zo gutwara indege, n’ubwo umuryango we wabanje kumubera ibamba kuko yari agiye kwihatira gukora akazi gatuma azajya ahora mu ndege yatumye aba impfubyi akabura se akiri muto. Gusa nawe yaberetse ko ibyabaye ari impanuka, arushaho gukunda no kwihatira ibyo kuzatwara indege.

JPEG - 94.8 kb

Inzozi zo kuzatwara indege yazigize akiri umwana muto w’imyaka 4 gusa y’amavuko, aho yarebaga indege mu kirere agatekereza ko itwarwa n’umuntu kandi nawe akumva yifuza kuzagera kuri iyo ntambwe, akaba yarakuze abyihatira agaterwa imbaraga na se wari umuvugabutumwa, gusa uyu wamushyigikiraga akaba yarazize impanuka y’indege Mbabazi akiri muto, ntibyamuca intege kuko yumvaga impanuka ari impanuka.

JPEG - 36.5 kb

Aganira na CNN mu bihe byashize, Mbabazi yagize ati: “Impanuka ni impanuka, ntabwo wareka gutwara imodoka ngo ni uko uzi umuntu wahitanwe n’impanuka y’imodoka. Ntabwo wabaho utagira ikintu runaka kigutera ubwoba, ariko burya iyo ikintu kigomba kubaho ntiwakibuza kubaho”.

Nyuma Mbabazi Esther yakomeje guharanira kugera ku ntego ze, abasha kugera ku ntambwe itaragerwaho n’undi munyarwandakazi n’umwe. Asobanura ko ibyo gutwara indege kuri we byabaye icyemezo ntakuka ubwo yari arangije amashuri yisumbuye, agahita apakira utwe twose akajya gushaka ikigo kigisha iby’indege muri Uganda, ahaguruka yiyemeje ko nibamwangira azemera akagaruka mu Rwanda ariko byo kubura uko agira, ariko nyuma biramuhira. Nyuma y’umwaka yaje kubona amahirwe yo gufashwa kubona amahugurwa y’ibyo gutwara indege abifashijwemo na RwandAir, ajya kwiga i Miami muri Leta Zunze Ubumwe za Amerika maze iby’ubuzima bw’abapilote abitangira ubwo.

JPEG - 50.2 kb

Kugeza ubu uyu mukobwa akora ingendo zitandukanye hirya no hino muri Afrika aho aba atwaye indege za RwandAir, gutinyuka no kudacika intege bikaba bimaze gutuma aba icyamamare ndetse akunze no gushyirwa kenshi ku rutonde rw’abagore bo ku mugabane wa Afrika bateye intambwe idasanzwe bakiri bato, rumwe mu ntonde nyinshi yagaragayeho rukaba ari urwakozwe na Youth Village Africa rwamushyize ku mwanya wa kabiri w’urutonde rw’abanyafurikakazi bazamutse bakiri bato.

Muri aka kazi benshi batiyumvisha ko kakorwa n’abakobwa n’abagore, Mbabazi Esther nawe ajya ahuririmo n’imbogamizi z’abataragira imyumvire y’ubushobozi bw’abagore n’abakobwa, dore ko yigeze kuvuga ko atazigera yibagirwa igihe umwe mu bagenzi yari agiye kugenda mu ndeye yagombaga gutwarwa na Mbabazi, hanyuma uwo mugenzi yabona ko indege igiye gutwarwa n’umugore akanga kugenda kandi yari yamaze kwishyura itike y’indege, akemera akayihomba.


INKURU ZA :
Tanga Igitekerezo
Ibitekerezo 7
Nyiranduhuye celine Kuya 4-02-2017

Mbabazi rwose nakomereze aho pe! kandi ajye asenga pe!

Nyiranduhuye celine Kuya 4-02-2017

yooh!cyokoze Mbabazi ararenze

Ndjina Kuya 6-01-2017

Ni byiza muri Esther Ko yabashije kubera Ku nzozi ze.
Gusa uyu munyamakuru ajye ashakisha amakuru neze,kuri ubu Rwandair imaze kugira Aba pilotes batwara indege z’ubucuruzi bagera kuri 4,harimo umwana Muto witwa Petite ufite munsi ya 24yrs.
Mukomere!

Ndjina Kuya 6-01-2017

Ni byiza muri Esther Ko yabashije kubera Ku nzozi ze.
Gusa uyu munyamakuru ajye ashakisha amakuru neze,kuri ubu Rwandair imaze kugira Aba pilotes batwara indege z’ubucuruzi bagera kuri 4,harimo umwana Muto witwa Petite ufite munsi ya 24yrs.
Mukomere!

TUYIRINGIRE EMMANUEL Kuya 24-12-2016

Iryokorana Buhanga Ryogupima Sida Hakoreshejwe Fone Nisawa

Rugali Kuya 23-12-2016

Komera mukobwa wacu urasobanutse pe! Kuba umubyeyi we yarazize impanuka yindege ntibivuze ko agomba gutinya indege ahubwo bigomba kun
Kumutinyura akazagera nubwo avuga ati indege yahitanye data iyo nza kuba arojye uyitwaye ntiba yarantwariye Data. Komeza ube icyamamare iyo ni imigisha papa wawe atabonye isigaye mubamukomokaho.

Papa wa Esther nimuntu ki ese nawe yaratwaye indege nkumukobwa we???

Oya, Mbabazi ni umukobwa wa Pasteur DAVID Ndaruhutse watangije itorero "Eglise Vivante" itorero rimwe mumatorero akomeye i Bujumbura mu Burundi na Kigali mu Rwanda rikaba ryaratangiye kumugaragaro muri 1993 ariryo ryabyaye Umuhanzi ukomeye akaba na Pasteur APPOLINAIRE uzwi mundirimbo zo guhimbaza Imana. Nyakwigendera Pasteur David yazize impanuka y’indege yaguye muminembwe "Imurenge" agiye migiterane gikomeye mu

matsiko friday Kuya 22-12-2016

Woow!!!Very nice!!!Mbega umukobwa w’inyamibwa!!!Uru ni urugero rwiza!!!

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA