konka coffee
KONKA

AMAKURU

UKWEZI

Ubuhamya bw’ubuzima busharira, ishavu n’agahinda by’umu ’Metis’ w’umunyarwanda

Ubuhamya bw’ubuzima busharira, ishavu n’agahinda by’umu ’Metis’ w’umunyarwanda
27-04-2017 saa 16:06' | By Chief Editor | Yasomwe n'abantu 15196 | Ibitekerezo 3

Mu gihe abakoloni b’Ababiligi bageraga mu Rwanda kimwe no mu bindi bihugu byo mu karere nk’u Burundi na Kongo Kinshasa, abagabo benshi b’abazungu bagiye babenguka abiraburakazi ndetse bakanabyarana na bo, ariko abo bana b’ibisusirane (Metis) babyaranye bagiye bafatwa nabi, barahohoterwa, babuzwa uburenganzira bwabo ndetse babaho imyaka myinshi mu marira n’agahinda. Ibyabaye kuri aba ba ’Metis’ ariko ubu Kiliziya Gatolika mu Bubiligi yabisabiye imbabazi n’ubwo bitoroshye.

Muri iyi nkuru, turagaruka by’umwihariko ku rugero rw’umu Metis w’umunyarwanda Georges Kamanayo wanyuze mu nzira y’inzitane i Burayi ariko ubu akaba yibera i Kabgayi ya Muhanga kubera urukundo yakomeje gukunda u Rwanda n’ubwo yarukuwemo agasiga ababyeyi akajya kurererwa mu kigo cy’impfubyi aho yabanye agahinda n’intimba imyaka myinshi.

Kuri uyu wa Kabiri tariki 25 Mata 2017, Musenyeri Johann Bonny wo muri Kiliziya Gatolika mu Bubiligi, yasabiye imbabazi muri SENA y’iki gihugu, ku ruhare rwa Kiliziya n’imiryango iyishamikiyeho mu bikorwa byo guhohotera, gutesha agaciro no gutera agahinda abana bavutse ku bazungu b’ababiligi n’abiraburakazi b’Abanyarwandakazi, Abarundikazi n’abakobwa bo muri Kongo Kinshasa mu gihe cy’ubukoroni, dore ko ubu mu Bubiligi hari aba ’Metis’ benshi bajyanywe muri iki gihugu mu myaka y’1950 ari abana bato, bagafatwa nk’impfubyi ndetse bagahungisha ba nyina ariko ntibanashyirwe mu miryango ya ba Se, ahubwo bakarerwa nk’abatagira ababyeyi. Ibi byari ku mpamvu z’inyungu bwite z’abo bazungu n’imiryango yabo, bumvaga ko ari igisebo kubyarana n’abiraburakazi.

Ubu mu Bubiligi, haba abasaza n’abakecuru b’aba Metis baturuka mu Rwanda, mu Burundi no muri Kongo Kinshasa, bari hagati y’imyaka 60 na 70, bajyanywe i Burayi mu myaka y’1950 mbere y’uko u Bubiligi buha ibyo bihugu ubwigenge, bakaba barakuriye mu bigo by’impfubyi bahungishwa imiryango yabo bayifite ndetse bakura batazi abo bakomokaho, kugeza n’ubu bakaba bashaje batazi benewabo bahuje amaraso, baba abo mu miryango ya ba se b’abazungu n’abo mu miryango ya ba nyina b’abiraburakazi. Ibi byaje gutuma umuryango w’aba Metis b’Ababiligi basaba Leta kuzirikana ivangura n’ihohoterwa bakorewe, ari nabyo byaje gutuma Kiliziya Gatolika isaba imbabazi kuri uyu wa Kabiri.

Musenyeri Johann Bonny yasabye imbabazi avuga ko Kiliziya Gatolika mu Bubiligi, muri Afurika n’i Rome mu Butaliyani, bakwiye gufatanya mu gushakisha impapuro n’ibindi byangombwa bishobora kwifashishwa nk’ibimenyetso by’amateka yafasha abo ba Metis kubona imiryango yabo.

Inkuru mpano y’umu ’metis’ w’umunyarwanda Georges Kamanayo Gengoux n’intimba yakuranye kugeza ashaje

Georges Kamanayo Gengoux yavukiye i Nyabikenke mu cyahoze ari Komine Nyabikenye muri Gitarama, ubu ni mu karere ka Muhanga mu Ntara y’Amajyepfo. Yavutse mu 1947, bivuga ko ubu afite imyaka 70 y’amavuko. Se wa Georges Kamanayo Gengoux witwaga Gengoux Raphael yari umubiligi wakoraga ubucukuzi bw’amabuye y’agaciro muri Nyabikenke, Mukingi na Byimana, ubundi agacuruza amagare yaranguraga mu Bushinwa akayagurisha mu Rwanda no mu Burundi. Uyu muzungu kandi ngo yari umujyanama wihariye w’umwami Mutara III Rudahigwa ndetse ubu hari n’isambu nini iri i Shyogwe muri Muhanga, Raphael Gengoux yakebewe n’umwami ubwe. Nyina wa Kamanayo we yari umunyarwandakazi ukomoka i Nyabikenke, ariko nyuma yo kubyarana ntabwo uwo muzungu yakunze kwikoza uyu mwana we, yabwiraga na nyina ko azamufasha ariko akamwereka ko adatewe ishema na gato no kuba yarabyaranye na we. Abo mu muryango wa nyina wa Kamanayo bari abakozi mu birombe by’amabuye y’agaciro by’i Nyabikenke byari umutungo w’uyu muzungu.

Georges Kamanayo Gengoux, umunyarwanda wavutse ku mubiligi n’umunyarwandakazi

Twifashishije ibyo Georges Kamanayo Gengoux yatangaje byanyuze mu kiganiro "Inyanja twogamo" gikorwa n’umunyamakuru Gentil Gideon, yavuye mu Rwanda acishwa muri Kongo hanyuma ajyanwa i Burayi kurererwa mu kigo cy’impubyi, akura atari kumwe na nyina ndetse n’umuryango wa se ntiyari awuzi, abavandimwe bahuje nyina nabo baburanye cyera, bongeye kubonana nyuma y’imyaka irenga 40.

Ku myaka 12 y’amavuko, abihaye Imana bari bacumbikiye Georges Kamanayo basabye umuryango we ko bareka umwana we akajya muri Kongo Kinshasa aho bari bafite umugambi wo kuzamuvana bamujyana mu Bubiligi kurerwa mu bigo by’impfubyi.

Georges Kamanayo ati: "Nigaga ku ishuri ribanza rya Kanyanza, maze umunsi umwe umuyobozi arambwira ngo wowe Georges ugomba kugenda ukajya mu ishuri ry’abazungu. Njyewe sinabyumvaga neza, kuko mu by’ukuri nari nzi ko ndi umunyarwanda, kubera ko njyewe naragiye inka nk’abandi bana bose bo mu kigero cyanjye, nari nzi amazina y’inka nzi no kuririmbira inka, iyo imvura yagwaga turi mu misozi nitwikiraga isinde nk’abandi... Njyewe numvaga ndi umunyarwanda, ariko noneho bakambwira ngo ndi umuzungu. Hari akazina bari barampimbye, banyitaga Kazungu, nabyo byatumaga nibaza cyane kuri iryo zina. Hari abandi bahimbaga ba Kazungu nabo bari inzobe twiganaga, ariko icyanteye impungenge cyane ni uko abo bandi bo tutajyanye."

Kamanayo ariko asobanura uburyo yabonaga na mbere atarajyanwa muri Kongo ngo ahave anajyanwa i Burayi, n’ubundi Se yabonaga atamwikoza. Ibi akiri umwana ntiyari abisobanukiwe ariko amaze gukura yamenye impamvu yabyo n’impamvu y’ivangura yakorewe na Se umubyara.

Aha agira ati: "Ndi muto nari mbizi ko ndi umuhungu wa Gengoux, uwo Gengoux baramuvugaga naranamubonaga rimwe na rimwe yaje no kureba mama. Ariko yarageragezaga akaza ntari hafi aho, namuboneraga kure. Ariko wabonaga hari utwo bankinga, kugirango ntazamenya ukuri kose, bishoboke ko hari ibyo bari barumvikanye hagati yabo, ikindi data yari afite umugore basezeranye byemewe n’amategeko, abwira mama ko azakomeza kumufasha ariko akarenzaho akamubwira ati ntuzigere uzana uwo mwana mu rugo... Mu mateka y’aba ’Metis’, guhera cyera mu Bugereki, bumva ko Metis bifite igisobanuro kibi. Kuko bumva ko umu metis ari umuntu uzamara gukura agatwara ubutware n’ubushobozi bwa Se, ubundi akajya kubugabana n’abo mu muryango wa nyina... "

Mu gusobanura ibice by’ingenzi by’ubuzima yanyuzemo, Georges Kamanayo Gengoux agira ati: "Hari igihe cyo mu bwana namaze mu Rwanda kwa mama i Nyabikenke, hakaba igihe cy’amashuri abanza i Nyangezi muri Kongo, nyuma nza mu Byimana hanyuma nyuma y’1959 navuye mu Rwanda njya mu Bubiligi. Ngeze mu Bubiligi najyanywe mu bigo by’impfubyi, nyuma njya mu muryango wanyakiriye (adoption), niga amashuri yisumbuye, niga na Kaminuza mu ishami ry’ubunyamakuru bwa sinema. Uretse iby’ubumisiyoneri, ibyo kwiga sinema nibyo numvaga bishobora kuzamfasha kugaruka mu Rwanda kuko nicyo gihugu cyanjye cyari cyaragumye mu mutima wanjye."

Georges Kamanayo asobanura ko nyuma yo kwiga ibya sinema ndetse akaza no gukorera amafilime mbarankuru ibitangazamakuru bikomeye i Burayi, yaje kugira igitekerezo cyo gusaba abo yakoreraga ko yaza mu Rwanda gukora filime mbarankuru kuri Diana Fossey mu birunga byo mu Rwanda, ariko ngo yari agamije kwiyizira kureba nyina yaherukaga ari umwana muto wiga mu mashuri abanza.

Georges Kamanayo azobereye mu byo gukora filime mbarankuru

Ubwo yari afite imyaka 45 y’amavuko, yaje kugaruka mu Rwanda ndetse abasha no kubona nyina i Nyabikenke ariko yari ashaje yaranahumye, kuburyo atigeze abasha kwibonera umuhungu we uretse kumukabakaba. Mu mwaka w’2000, ubwo Georges Kamanayo yari agize imyaka 53 y’amavuko, nibwo yabashije kubona Se umubyara, amusanze i Nice mu gihugu cy’u BUfaransa, ariko yari ashaje cyane kuburyo nyuma y’igihe gito babonanye yahise apfa.

Ubu Georges Kamanayo amaze imyaka 8 atuye mu Rwanda, akaba yibera mu isambu n’inyubako biri i Shyogwe ahahoze hatuye Se umubyara Raphael Gengoux. Iyi sambu nini irimo imirima ikorerwamo ubuhinzi, ikabamo ubusitani, urutoki, indabo n’ibindi bihingwa bitandukanye ikabamo n’ikibuga cy’umupira w’amaguru yubakiye abana bo muri ako gace, ni imwe se yakebewe n’umwami Mutara III Rudahigwa. Hafi y’aho atuye, aturanye n’umuvandimwe we umwe bahuje nyina, ni murumuna we witwa Rubayiza Augustin naho abandi bavandimwe be babiri batuye i Nyabikenke, kandi bose avuga ko abakunda cyane.

Nyuma y’imyaka myinshi, Georges Kamanayo yagarutse kwibera mu Rwanda anahura n’abavandimwe be

Ubu Georges Kamanayo yikozeho filime mbarankuru yise "Kazungu Le Metis" asobanuramo ingorane yahuye nazo mu gukura kwe no mu ntambara y’ubuzima bwo guhiga inkomoko ye, agashakisha umuryango wa nyina akaza no kubona se nyuma y’imyaka myinshi, kandi yararezwe nk’impfubyi.

NIBA WUMVA IGIFARANSA, REBA IYI VIDEO URAMENYA BYINSHI:


INKURU ZA :
Tanga Igitekerezo
Ibitekerezo 3
Nsengimana Constantin Pedro Kuya 5-05-2017

njye nibwo nsobanikiwe ibyuwo mumetisi wumunyarwanda aho hantu ndahazi twahitaga kwa jangwe kuko nabyirutse numva ariko bahita none nyina aracyariho????????

soso Kuya 4-05-2017

kbx muzadukurikiranire ibyuriya mwana batwitse

alice Kuya 27-04-2017

yooo birababaje pe, i am speechless!

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...