konka coffee
KONKA

AMAKURU

UKWEZI

Umunyamakuru Jean Paul Nkundineza yavuye muri gereza aho yigiye amasomo akomeye

Umunyamakuru Jean Paul Nkundineza yavuye muri gereza aho yigiye amasomo akomeye
17-10-2017 saa 10:37' | By Chief Editor | Yasomwe n'abantu 10310 | Ibitekerezo 4

Jean Paul Nkundineza wabaye umunyamakuru ku binyamakuru bitandukanye mu Rwanda nka Radio Ubuntu Butangaje, Voice of Africa ndetse wanandikiraga Umuseke, yavuye muri gereza ya Rwamagana mu masaha y’ijoro ryo kuri uyu wa Mbere tariki 16 Ukwakira 2017, nyuma y’umwaka yari amaze muri gereza. Ibyamubayeho kugirango afungwe, avuga ko yabikuyemo isomo rizamusindagiza mu buzima bwa hano ku isi.

Mu ntangiriro z’ukwezi kwa Mutarama uyu mwaka, byavuzwe ko uyu munyamakuru Jean Paul Nkundineza yaba yaraburiwe irengero maze icyo gihe, mu gushaka kumenya ukuri nyako, ikinyamakuru Ukwezi.com kivugana na CIP Sengabo Hillary, umuvugizi w’amagereza mu Rwanda, yemera ko umunyamakuru Jean Paul Nkundineza afungiwe muri gereza ya Ntsinda mu karere ka Rwamagana, ndetse ko yamaze gukatirwa umwaka umwe w’igifungo.

Icyo gihe, CIP Sengabo Hillary yavuze ko muri dosiye ya Jean Paul Nkundineza handitsemo ko yakatiwe umwaka umwe w’igifungo kubera icyaha cy’ubujura, icyakoze ngo mu mpera z’umwaka ushize mbere y’uko afungwa bigeze kuganira, amubwira ko hari umuntu yatije imodoka akayijyana mu bikorwa by’ubujura, hanyuma bamufata bikarangira bombi bafunzwe.

Ibi ninabyo Jean Paul Nkundineza ubwe yasobanuriye ikinyamakuru Ukwezi.com nyuma yo kuva muri gereza yari amazemo umwaka. Yatangarije ikinyamakuru Ukwezi.com ko yafatiwe i Gatsibo ubwo yari agiye gukurikirana iby’imodoka ye. Mu kubisobanura neza, avuga ko tariki 4 Kamena 2014, yatije umuntu imodoka amubeshya ko ayijyanye i Kanombe agahita ayijyana mu Mutara, maze uwo munsi akaza gufatirwa mu bikorwa by’ubujura.

Ibi bikorwa by’ubujura byaje gutuma tariki 23 Ukwakira 2015, uwo wari watijwe imodoka akatirwa igifungo cy’imyaka ibiri naho nyir’imodoka yakoreshejwe ari we Jean Paul Nkundineza, akatirwa umwaka umwe w’igifungo nk’uko byemejwe n’Urukiko rw’ibanze rwa Kiramuruzi. Icyo gihe ariko urukiko rwari rwategetse ko iyo modoka yari yarafatiriwe yahita irekurwa.

Aya ni amafoto ya Jean Paul Nkundineza nyuma y’umwaka amaze muri gereza

Kuko Jean Paul Nkundineza yari yarakurikiranwe adafunzwe kandi igihe yari yarakatiwe kikaba cyari cyararangiye (iyo aza kuba yaragikoze), yibwiye ko ibijyanye n’isubikagifungo byatuma adafungwa maze ubwo yajyaga i Gatsibo kubaza iby’imodoka ye, ahita atabwa muri yombi arafungwa. Icyo gihe ubwo uwo yari yaratije imodoka we yari yararangije igihano cye cy’imyaka ibiri y’igifungo.

Yabwiye ikinyamakuru Ukwezi.com ko muri gereza haba ubuzima bwihariye atabona uko asobanura, ariko kandi ngo ibyamubayeho muri rusange byakomotse ku buhemu yakorewe n’uwo yatije imodoka, bimuha isomo ry’uko mu buzima umuntu aba akwiye kwitondera abandi akanagira amakenga mu byemezo byose afata.

Jean Paul Nkundineza anenga ariko uburyo yatinze muri gereza kuko yagombaga kuvamo kuwa Gatandatu tariki 14 Ukwakira 2017 ari nawo munsi igihano cye cyarangiye, kuko ubusanzwe ku myaka umuntu yakatiwe muri gereza, buri mwaka ukurwaho iminsi 5. Avuga ko iyo ataza kugira abanyamakuru bamukoreye ubuvugizi mu rwego rw’amagereza, yashoboraga no kumaramo indi minsi, akavuga ko byazakosorwa kuko hari ababirenganiramo.

Uyu munyamakuru avuga ko itangazamakuru kuri we ari umuhamagaro, mu gihe kitarambiranye akaba ateganya kuzasubira mu mwuga we kuko ari impano yumva atabasha kureka.


INKURU ZA :
Tanga Igitekerezo
Ibitekerezo 4
sage Kuya 23-10-2017

mwana WA MA menya ngo umuntu n’umuntu utazongera kwizera umuntu 100/100.u can contact me on ( 256)778665371.nkundineza ndagukunda

Aline Umubyeyi Kuya 18-10-2017

Yoo.... pole mwana w’iwacu karibu mubuzima busanzwe.abana bo mumuhima turanezerewe

Aline Umubyeyi Kuya 18-10-2017

Yoo.... pole mwana w’iwacu karibu mubuzima busanzwe.abana bo mumuhima turanezerewe

tabaro Kuya 17-10-2017

Komeza kwihangana biragaragara ko kubyakira bitakoroheye arko ngo burya ubugira neza bw inkware ngo bwayigonze ijosi arko nizere ko wowe ritazagondama kuko uhita usubira kukazi kawe komeza kwihangana kdi turakwakiye mubuzima busanzwe

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...