konka coffee
KONKA

AMAKURU

UKWEZI

VIDEO: Ubu mu Rwanda abarwayi bivuriza kuri telefone hakoreshejwe ikoranabuhanga

VIDEO: Ubu mu Rwanda abarwayi bivuriza kuri telefone hakoreshejwe ikoranabuhanga
3-04-2017 saa 08:20' | By Chief Editor | Yasomwe n'abantu 7456 | Ibitekerezo 5

Uko iterambere rigenda rikataza, ninako rigenda rikoreshwa mu nzego zitandukanye z’imirimo mu rwego rwo kunoza imikorera no gukoresha ikoranabuhanga mu koroshya no kwihutisha akazi. Ubu ikoranabuhanga rimaze igihe ritangiye gukoreshwa mu Rwanda, rifasha abaganga kuvura abarwayi kuri telefone ntaho bahuriye n’abaganga, ndetse umuganga akaba ashobora kuvura umurwayi atigeze abona amaso ku yandi akanamwandikira imiti abinyujije kuri telefone.

Guhera muri Nzeri umwaka ushize, ikigo cyatangiriye mu Bwongereza cyirwa Babyl cyatangiye gukorera mu Rwanda. Ni ikigo gifite inzobere z’abaganga bemewe na Minisiteri y’Ubuzima kandi nacyo gikora mu buryo bwemewe n’iyi minisiteri. Muri Babyl bavura abarwayi bakoresheje uburyo bugezweho bw’ikoranabuhanga aho umurwayi yifashisha telefone ye igendanwa akabasha kuvugana n’umuganga, akamusuzuma (consultation) ndetse akanamwandikira imiti byose bikorewe kuri telefone. Ubu abarenga 376.000 mu Rwanda bamaze kwiyandikisha ngo bajye bakoresha ubu buryo bivuza.

Mu kiganiro kirambuye Ikinyamakuru Ukwezi.com cyagiranye na Nahimana Nadege ushinzwe ibijyanye n’itumanaho n’iyamamazabikorwa muri Babyl, yadutangarije ko ubu buryo bumaze igihe butangijwe mu Rwanda, bwatangirijwe mu Bwongereza ariko u Rwanda nk’igihugu cyateye imbere mu by’ikoranabuhanga, rukaba ari rwo rwa mbere muri Afurika bwatangijwemo. Avuga ko kubasha kwivuza ukoresheje telefone yawe, nta kindi bisaba uretse kuba ufite telefone isanzwe.

Nahimana Nadège ushinzwe ibijyanye n’itumanaho muri Babyl

Nahimana Nadège ati: "Babyl ni ikoranabuhanga, ni uburyo bushyashya bwabonetse bwo gushobora kwivuza ukoresheje telefone. Bwatangiriye mu Bwongereza nyuma batangira gukorerera no mu bihugu byo muri Afurika, bahera ku Rwanda kuko murazi ko mu ikoranabuhanga ruri ku rwego rwo hejuru, noneho baratekereza ngo byaba byiza guhera ku gihugu nka kiriya cyabaye icyitegererezo muri Afurika by’umwihariko muri Afurika y’Uburasirazuba... Ni uburyo rero bufasha buri munyarwanda wese aho yaba ari hose mu gihugu, kwivuza akoresheje telefone ye igendanwa. Ntabwo bisaba ibintu byinshi cyane, bisaba ko umuntu aba afite telefone isanzwe, hanyuma agakanda *811# akiyandikisha kuri serivisi za Babyl hanyuma agahamagarwa n’abaganga bacu. Abaganga dukoresha ni abaganga basanzwe bemewe na Minisiteri y’Ubuzima basanzwe bakora mu Rwanda, hari n’abasanzwe bakora mu bindi bigo."

Nk’uko yakomeje abisobanura, uwiyandikisha asabwa no kuba afite indangamuntu kandi telefone akoresha akaba yarayibarujeho akoresheje iyo nimero y’indangamuntu, telefone ikaba igomba kuba iya Tigo cyangwa iya MTN. Kumara gukanda *811# ugakurikiza amabwiriza ukiyandikisha, bikorwa ku buntu kandi bihita biguha uburenganzira bwo kujya wivuza ugakurikiranwa n’abaganga ba Babyl. Iyo wamaze kwiyandikisha hanyuma ugakenera kwivuza, wongera gukanda *811# ugasaba gahunda ya muganga. Bahita baguha ubutumwa bukumenyesha isaha uza kubonanira na muganga ndetse n’izina rya muganga uza kugukurikirana.

Uwo muganga arakwihamagarira igihe cyose agukurikirana, kuko iyo uciye ku *811# bo bahita babona ubutumwa bubamenyesha ko ubashaka, bisobanura ko ibyo byose kubikora nta mafaranga yawe agenda, icyakoze gahunda yo kuvugana na muganga akagusuzuma yo yishyurwa amafaranga y’u Rwanda 500. Muganga araguhamagara akakubaza ibijyanye n’uburwayi bwawe ukamusobanurira, hanyuma akakwandikira imiti nabyo binyuze mu ikoranabuhanga. Mu kukwandikira imiti, muganga akoherereza imibare muri telefone yawe, ukayijyana muri farumasi (Pharmacy) zikorana na Babyl hanyuma bashyira iyo mibare mu buryo bw’ikoranabuhanga ryabo, bagahita babona urutonde rw’imiti wandikiwe kuburyo baguha n’urupapuro ruyigaragaza neza.

REBA HANO VIDEO Y’IKIRANIRO CYOSE TWAGIRANYE N’ABAKOZI BA BABYL:

Ikinyamakuru Ukwezi.com kandi cyaganiriye na Dr Franklin, umuganga ushinzwe ibikorwa by’ubuvuzi muri Babyl. Yadusobanuriye ko uretse kuba umuganga yavura umurwayi batari kumwe akanamwandikira imiti batabonanye, ngo hari n’uburyo bw’ikoranabuhanga (software) ishobora gukoreshwa umuganga agahamagara umurwayi barebana, kuburyo abafite telefone zigezweho (Smartphones) bo byoroshye kuba umurwayi yakwereka umuganga uburwayi bwe nk’igihe ari uburwayi bw’uruhu cyangwa ubundi bubonwa n’amaso. Abadafite izo telefone nabo, hirya no hino mu gihugu hari ahantu abarwayi bashobora kujya muri Farumasi zikorana na Babyl bagakoresha ubwo buryo bwo kuvugana n’abaganga barebana kandi nabyo ubwabyo bikorwa ku buntu, umuganga akishyura gusa amafaranga 500.

Dr Franklin, umuganga ushinzwe ibikorwa by’ubuvuzi muri Babyl

Dr Franklin asobanura ko hari indwara bemeranyijwe na Minisiteri y’Ubuzima ko bashobora kuvura abarwayi bitabaye ngombwa ko babakoraho cyangwa ko babonana amaso ku maso, kandi ubu buryo buhendutse bufasha abarwayi kwivuza batiriwe bava iwabo bukaba bufasha cyane abarwaye byoroheje bashaka gufatirana uburwayi butarakomera, icyakoze abafite uburwayi busaba ko bakorerwa ibizamini bakaba bahabwa inama n’abaganga ba Babyl.

Babyl kandi iteganya gukorana n’amalaboratwari (Laboratories) kuburyo bazajya babasha no gupima abarwayi ariko basuzumwe kuri telefone bakanandikirwa imiti kuri telefone, ibyo byose bikaba biri mu mushinga wabo urambye wo gufasha abanyarwanda kwivuza kuri macye kandi biboroheye. Uramutse ukeneye ibisobanuro birenzeho ushobora no kubahamagara kuri 811.

UMVA NEZA VIDEO Y’IKIGANIRO CYOSE URASOBANUKIRWA BIGEZEHO:


INKURU ZA :
Tanga Igitekerezo
Ibitekerezo 5
paco Kuya 7-04-2017

Nizihe ndimi wakoresha mukwivuza

paco Kuya 7-04-2017

Nizihe ndimi wakoresha mukwivuza

Ingabire Kuya 3-04-2017

Safari and joan ubu Babyl ntiratangira gukorana na insurance ariko birimunzira harizo batangiye kuvugana nazo
Joan bavuga ikinyarwanda jyewe baramvuye twaravuganye mworohereze ababafasha kujya muri system za Babyl kuko nuburyo bwiza cyane ni harambe HE we udahwema kutugezaho ibyiza
Thanks Babyl Keep it up

safari Kuya 3-04-2017

nimudosobanurire ese mukorana na RAMA, MMI, Nubundi bwishingizi mudusobanuriye bya dufasha
Murakoze

joan Kuya 3-04-2017

ESE BAKORESHA IKINYARWANDA CG UTAZI ICYONGEREZA NTIYAVUGA UBURWAYI BWE?

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...