konka coffee
KONKA

AMAKURU

UKWEZI

Ibisigazwa bya Top Tower byabaye imari ishyushye, umutekano wakajijwe n’inkoni irarisha

Ibisigazwa bya Top Tower byabaye imari ishyushye, umutekano wakajijwe n’inkoni irarisha
8-08-2017 saa 06:52' | | Yasomwe n'abantu 18227 | Ibitekerezo

Nyuma y’imirimo y’isenywa ry’inyubako Top Tower hotel yakoreragamo ku Kacyiru, ubu imirimo yo gukora isuku no gutwara ibyasenywe bivanwa aho iyi nyubako yari yubatse irarimbanyije , imvange ya sima n’ibyuma bizwi nka ferabeto biri gutwarwa bijyanwa kumenwa mu murenge wa Gisozi , umudugudu wa Byimana mu kagali ka Musezero, ni munsi y’ishuli ryisumbuye Fawe Girls School.Ibi bisigazwa biri kumenwa muri aka gace byateje akaduruvayo n’imirwano ku baza gutoragura inyuma ndetse n’abashinzwe imirimo yo gusenya iyi nyubako bamaze gutahura ko ari imari ikomeye.

HABIYAKARE Celestin uhagarariye inyungu za nyir’ubutaka buri kumenwaho ibisigazwa by’inyubako ya Top Tower Hotel yasobanuriye Ukwezi.com, ko abashinzwe imirimo yo gusenya iyi nyubako, baje kumena ibisigazwa ku butaka acunga batabimumenyesheje kandi byarasabaga kumwishyura, ibi byatumye ibi bisigazwa birimo ibyuma abitegeza abaturage maze babyiraramo barabisahuranwa kugeza n’aho biteje imirwano ikomeye.

Ibi bisigazwa by’iyi nzu ya Top Tower byaje kuvamo imalri ishyushye ku buryo nta n’iyonka mu baturage bahaturiye wasigaye ataje kwiyorera, babanza gutandukanya sima na ferabeto, ubundi bakirukankana ibyo byuma.

Nyuma y’uko ikompanyi ishinzwe isenywa ry’inyubako Top Tower Hotel imaze kumenyera ko iyi mari ishakishwa n’abahaturiye, yahise ishyiraho amabwiriza y’uko nta muturage ugomba kongera kugira icyuma akuraho maze biza kuba inkomoko y’ugushamirana gukomeye.

REBA IYI NKURU MU MASHUSHO (VIDEO) HANO:

Mu gitondo cyo kuri uyu wa mbere tariki 7 Kanama 2017, habyukiye igisa n’imirwano hagati y’ubuyobozi bw’abashinzwe kumena imyanda muri ako gace, ba nyirubutaka n’abaturage bagizwe n’uruvange rw’abana n’abakuru batuye mu murenge wa Gisozi aho uru ruvange rw’ibisigazwa rumenwa, birukankana ibyuma bahamya ko ku isoko bigurishwa amafaranga 200 ku kiro kimwe cyangwa akaba yanarenga.

Muri iki gisa n’akavuyo abaturage basabaga kurekerwa uburenganzira bagakomeza kwitwarira ibyuma bafata nk’umwanda, bigera n’aho bakoresha ingufu, ibyatumye hitabazwa imbaraga z’umutekano w’igihugu, polisi y’umurenge wa gisozi irahagera ndetse bamwe bambikwa amapingu.

Habiyakare Celestin uhagarariye inyungu za nyirubutaka yagize ati ” Abaturage ba hano bafite igisa n’ubukene ku buryo kubashyira ibyuma nk’ibi imbere batabyorohera, muri iki gitondo nabonaga abaturage ari benshi imodoka ziri hafi kumena ibitaka bivanze n’ibyuma hejuru y’abagore batwite n’abana benshi bari aha , nitabaza imbaraga z’ubuyobozi, urebye abashinzwe kumena uyu mwanda barantengushye kuko bari banyijeje ko bazarinda umutekano w’abantu bahaturiye, iki kintu nicyo bari bateshutseho”

Mu gihe abaturage bavuga ko bifuza kwijyanira ibi byuma, ushinzwe kubihamena utashatse ko amazina ye amenyekana yavuze ko yahisemo gukoresha abafite imyaka y’ubukure bakabimutandukanyiriza na sima akabahemba ku munsi, nyamara ngo ntabasha kumenya aho umubare w’abana benshi uva uje kwiba ibi byuma.

Ubu umutekano kuri iki kirombe wakajijwe ngo hatagira utorokana ibisigazwa by’ibyuma byari byubatse iyi nyubako Top Tower Hotel yamaze kuba amateka ku bari bayizi, n’ubwo basabwa kubizibukira kandi bikaba bigoranye kuvana icyuma aha hantu abaturage baho bo babifata nka manu iturutse mu ijuru, kuko ubusanzwe birirwaga birukanka bashakisha ibi byuma mu ngo z’abaturage , igikorwa kizwi nko gusyaga [gutoragura ibyuma bishaje].

Abantu benshi biganjemo abana birirwa ahamenwa ibisigazwa by’inzu ya Top Tower bishakiramo ibyuma Ibi ni bimwe mu byuma byavuye ku nyubako ya Top Tower


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...