konka coffee
KONKA

AMAKURU

UKWEZI

Kimironko: Abajura bajujubije abaturage, hari n’abibwa bataka bakabwirwa ko bazicwa

Kimironko: Abajura bajujubije abaturage, hari n’abibwa bataka bakabwirwa ko bazicwa
17-10-2017 saa 05:39' | By Akayezu Jean de Dieu | Yasomwe n'abantu 6660 | Ibitekerezo 4

Abaturage batuye mu tugari twa Nyagatovu na Kibagabaga ahari igishanga cy’ahazwi nko mu Myembe mu murenge wa Kimironko, akarere ka Gasabo, barashyira mu majwi inzego z’ibanze gukingira ikibaba abajura kabuhariwe mu kwiba imyaka no konesha ndetse benshi muri aba bajura bakaba banywa ibiyobyabwenge bakajujubya abatuye muri utu tugari mu gihe bamwe muri aba baturage bagerageza gukumira ubujura bagaterwa ubwoba ko bazicwa.

Aba baturage bashyira inzego z’umutekano muri iyi midugudu gutiza umurindi aba bajura cyane ko n’iyo aba bashinzwe umutekano bafashe umujura wibye bagerageza kumukingira ikibaba. Urugero rw’umwe mu bavugwa ko bakingiwe ikibaba ni umushumba uragira inka z’uwitwa Claver ziherereye mu mudugudu wa Karongi

Kugeza ubu umwe muri aba bakurikiranyweho ubujura, ni uwitwa Jacques usanzwe aragira inka, akaba yarafashwe kuwa Gatandatu tariki 14 Ukwakira 2017, ubu afungiye kuri Sitasiyo ya Polisi ya Kimironko muri aka karere ka Gasabo. Abaturage bavuga ko ubuyobozi bw’inzego z’umutekano mu mudugudu wa Karongi bwagerageje kumukingira ikibaba kugeza n’aho bwimanye dosiye yakozwe mu ijoro uyu Jacques yafashwemo nk’uko nyir’ukwibwa yabitangarije Ikinyamakuru Ukwezi.com.

Abaturage bafite impungenge

Ikinyamakuru Ukwezi.com cyagiranye ikiganiro na bamwe mu baturage bafite ibikorwa by’ubuhinzi bw’ibisheke, ibijumba, ibigori n’imyumbati muri iki gishanga gihuriweho n’utugari twa Nyagatovu na Kibagabaga. Bavuga ko batewe ubwoba cyane n’ibikorwa by’urugomo bakorerwa birimo konesherezwa imyaka ndetse no kwibwa bya hato na hato dore ko hari n’ababwirwa ko bazicwa n’ibisambo.

Umwe muri aba baturage witwa Kanyemera Daniel, wo mu Mudugudu w’Ibuhoro, akagari ka Nyagatovu, yabwiye Ikinyamakuru Ukwezi.com ko aba bajura b’ingufu bamuzengereje cyane kugeza n’ubwo uwitwa Jacques ubusanzwe w’umushumba yamubwiye ko azamwica

Yagize ati “Muri iki gishanga mpinga amateke, ibijumba, ibisheke, n’izindi mbuto zinyuranye ariko abashumba barimo Jaques bamereye nabi rwose dore ejo bundi we aherutse kuza ajya mu bisheke byanjye aca ibigera kuri 6 kandi ubwo si ubwambere, noneho nagerageje kumubaza nti ko waciye ibisheke mu murima wanjye nta burenganzira, ahita ambwira ko azanyica dore ko icyo gihe yari afite n’ibyuma

Undi mukecuru uri mu kigero cy’imyaka 65 nawe ugira ibikorwa muri iki gishanga yagize ati “Bariya bashumba ba Claver njyewe bambwiye ko ngira umunwa muremure ngo bazanyica, rwose ubuyobozi nabwo ntacyo bukora (…….) urumva se bakora iki ko uwo turega ari we turegera nyine?”

UMVA UKO BABYIVUGIRA HANO

Ubuyobozi bw’ibanze bushyirwa mu majwi mu kuba ku isonga mu gutiza umurindi ubujura

Aba baturage bakomeje kandi babwira ikinyamakuru Ukwezi.com ko iyo babwiye inzego z’umutekano ahari amakuru ajyanye n’abacuruza ibiyobyabwenge cyane ko hari umusore muri aka gace uzwiho gucuruza urumogi ndetse n’ubuyobozi bukaba bumuzi ariko butamufata.

Uwitwa Elyse ushinzwe umutekano mu mudugudu wa Karongi ho mu kagari ka Kibagabagaa ashyirwa mu majwi nk’umwe mu baza ku isonga mu gukingira ikibaba aba bakora ibikorwa by’urugomo ahanini baba banyoye ibiyobyabwenge nk’uko abaduhaye amakuru bahiduhamirije. Gusa mu gukurikirana iyi nkuru twagerageje kumusanga mu rugo iwe aho atuye dusanga adahari ndetse ubwo twatunganyaga iyi nkuru twakomeje kujya tumuhamagara numero ye igendanwa tukumva itari ku murongo.

Mu gushaka kumenya icyo ubuyobozi bw’umurenge wa Kimironko buvuga kuri uru rugomo n’ubugizi bwa nabi biri muri uyu murenge, umunyamakuru wa Ukwezi.com yagiye kuri uyu murenge ahagera ahagana saa kumi n’igice z’umugoroba, agerageza gushaka ubuyobozi bwamufasha arabububura kuko Umunyamabanga Nshingwabikorwa w’uyu murenge yatubwiye ko ari mu kiruhuko.

Mu kiganiro yagiranye n’Ikinyamakuru Ukwezi.com, ubwo twateguraga iyi nkuru, umukozi wumurenge wa Kimironko ushinzwe irangamimerere yatubwiye ko nabo iki kibazo batari bakizi ndetse atwizeza ko mu nama ya JOK yo mu gitondo cyo ku wa Kabiri tariki 17 Ukwakira 2017 baza kugaruka kuri icyo kibazo bagashaka uburyo bamanuka hasi kuganira n’abaturage Uyu musaza Daniel avuga ko yajujubijwe n’ibitera by’abajura bamubwora ko bazamugirira nabo Uyu mukecuru nawe ni umwe mu bafite ibikorwa by’ubuhinzi muri iki gishanga, aha yatwerekaga aho aba bajura baza kurira ibisheke baba basaruye mu mirima y’abandi ati ’Ni ibisuma baraza bakicara hano bakabirya nta wabavuga bamugirira nabi’
Umurima w’ibisheke iyo aba bajura bawugezemo bawusiga wangabaye


INKURU ZA :
Tanga Igitekerezo
Ibitekerezo 4
MUDA Kuya 26-10-2017

umva ubujura bwo buragwiriye murikigihe muzaze i karama mukagali ka Ruli ho mumurenge was shyogwe mukarere ka Muhanga mwiyumvire aho umujura aherutse kwiba inka akayibaga inyama akazimanika munzu ye

MUDA Kuya 26-10-2017

umva ubujura bwo buragwiriye murikigihe muzaze i karama mukagali ka Ruli ho mumurenge was shyogwe mukarere ka Muhanga mwiyumvire aho umujura aherutse kwiba inka akayibaga inyama akazimanika munzu ye

Jane Kuya 17-10-2017

Ibyo bisambo bifatwe bifungwe buriya bishaka kumara abantu.

Ibintu bigendana ibyuma ni ibisazi

Jane Kuya 17-10-2017

Ibyo bisambo bifatwe bifungwe buriya bishaka kumara abantu.

Ibintu bigendana ibyuma ni ibisazi

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...