konka coffee
KONKA

AMAKURU

UKWEZI

Nyamagabe: Umugabo yishwe azira kwiba amateke, aba uwa 5 wishwe uko mu kwezi kumwe

Nyamagabe: Umugabo yishwe azira kwiba amateke, aba uwa 5 wishwe uko mu kwezi kumwe
10-04-2017 saa 09:18' | By Chief Editor | Yasomwe n'abantu 4957 | Ibitekerezo 8

Mu masaha ya saa kumi n’igice z’urukerera rwo kuri iki Cyumweru tariki 9 Mata 2017, nibwo umugabo w’imyaka 50 y’amavuko witwa Butera Frederic yishwe n’abari bamufatiye mu murima w’amateke bakamukubita bikomeye bamushinja kuyiba, bakaba baramubitanye na bagenzi be babiri barimo undi wakomerekejwe bikomeye. Uyu mugabo, abaye umuntu wa 5 mu kwezi kumwe wishwe nyuma yo gushinjwa kwiba ibintu byo kurya byoroheje.

Umuvugizi wa Polisi mu ntara y’Amajyepfo, CIP André Hakizimana, yatangarije ikinyamakuru Ukwezi.com ko uyu mugabo wishwe yari kumwe na bagenzi be babiri bakaza gufatirwa mu gishanga cya Rukarara kiri mu murenge wa Mbazi mu karere ka Nyamagabe, babakekaho kwiba amateke maze abantu batanu babafashe barabakubita bikomeye biviramo uyu Butera Frederic gupfa naho uwitwa Rushogoro John akaba yarakomerekejwe bikomeye. Ubu umwe mu bishe Butera bagakomeretsa mugenzi we yatawe muri yombi mu gihe abandi bane bakirimo gushakishwa.

Umuvugizi wa Polisi mu ntara y’Amajyepfo, CIP André Hakizimana, yamaganye ibi byakozwe n’aba baturage, avuga ko bagomba kumenya ko kwihanira bihanwa n’amategeko, anasaba abaturage gucika ku muco wo kwihanira, ahubwo abafitanye ibibazo n’amakimbirane bakihutira kubimenyesha inzego z’ibanze cyangwa iza Polisi, byananirana bakitabaza ubutabera ngo ibibazo byabo bishakirwe umuti.

Mu byumweru bicye bishize, uwitwa Nyamuyumbu Jean Damascene yishwe akubiswe n’abantu bamukekagaho kwiba inkoko z’uwitwa Umubyeyi Mary utuye mu kagari ka Bicumbi, mu murenge wa Mwurire mu karere ka Rwamagana mu Burasirazuba bw’u Rwanda.

Mu ntangiriro z’ukwezi kwa Werurwe, hari undi mugabo wakubiswe bimuviramo urupfu witwa Bikorimana Jean, nawe wari utuye mu murenge wa Mbazi mu karere ka Nyamagabe, akaba yarakubiswe n’abaturage bari barangajwe imbere n’abantu 4, bamuzizaga kwiba inkwavu eshanu.

Ibi kandi nabyo byabaye nyuma y’uko mu ijoro ryo kuwa Gatandatu tariki 4 Werurwe rishyira ku Cyumweru tariki 5 Werurwe 2017, umukuru w’umudugudu wa Karuhura mu kagari ka Gakoni mu murenge wa Kiramuruzi mu karere ka Gatsibo, yishe umuturage wari uraye irondo mu mudugudu we amushinja kumwiba igitoki cyari kibonywe ku gasozi n’abari baraye irondo barimo n’uyu wishwe. Uyu mukuru w’umudugudu yahise atabwa muri yombi.

Mbere yaho gato nabwo, no mu karere ka Rwamagana hari umukozi ushinzwe ibijyanye n’imisoro na we wishe umuntu amuziza igitoki, na we akaba yarabyukijwe n’abantu bamubwira ko bamwibye agahita atangira gukubita umuntu wakekwaga kugeza amwishe, uyu muyobozi na we ubu akaba afunzwe.

Ingingo ya 151 yo mu gitabo cy’amategeko ahana ibyaha mu Rwanda ivuga ko gukubita cyangwa gukomeretsa umuntu ku bushake bigatera urupfu, uwakoze icyaha ahanishwa igifungo kuva ku myaka icumi (10) kugeza ku myaka cumi n’itanu (15). Naho iyo uwakoze urwo rugomo yabigambiriye cyangwa yabanje gutega igico, ahanishwa igifungo cya burundu.


INKURU ZA :
Tanga Igitekerezo
Ibitekerezo 8
Nina Kuya 15-04-2017

Nimwongereho n’uwishwe Kicukiro mu gitondo cyo kuwa gatatu. Ahubwo jye ndibaza nti umutekano birirwa baririmba urihe? ? POLICE yawe itananiwe cyane, ikwiye guhindurirwa abayobozi kuko icyo ishinzwe cyayinaniye. Birababaje kumva umuntu azira ibiryo. C’est vraiment triste.

Bimenyimana Kuya 11-04-2017

Ndongore umwishywa iyinzara nidafatirwa umwanzuro ngo badutabarize amahanga iratumaraho abantu pe, ndumva leta yakerura ikemeza ko NZARAMBA iriho rwose kuko ujyagukira uburwayi araburata

Mimi Kuya 11-04-2017

Inzara byo iriho twabyemera tutabyemera, None se ko mutavuze babana 2 bo mu murenge wa Mukarange bishwe n’imyumbati bari bibye kubera inzara?

Kamana Kuya 11-04-2017

Nyamara tuvugishe ukuri inzara iratumaze.kuri abo ba nyakwigendera ndongeraho 2 b’Gisagara kibilizi. Umwe yashyinguwe ejo afatanywe igitoki cy’umunyagara yarakubitswe ijoro ryose mpaka apfuye. Undi nawe mbere yaho yishwe n’imyumbati.Leta n’itabare or itabarize abana bayo.Or ifate k’umafaranga y’agaciro igoboke abashonje twiteguye kuyasubimo vuba ariko rwose aya mezi aratwara benshi.

-xxxx- Kuya 10-04-2017

murwanda inzara irahari ariko tubivuge dusabe inkunga baduseke nanonese kotubihisha tugapfamo umwumwe niyonyungu nanonese uwakagombye kubivuga ntaho y ahuri rani y on Zara kandi bimuteye isoni kubivuga ngobatamwirukana kuko yabayivuguruje kuriyamihigo ntacyotu umusaza wacu tuzitorera nejo azajya abavumbura buhorobuhoro

pasi Kuya 10-04-2017

Kuri aba batanu ndongeraho batandatu barimo 2 bazize imyumbati i Musanze 2 bazize inyama z’akamasa kipfishije i Huye na 2 bishwe n’imyumbati ejo hashize i Gicumbi ababose icyo bahuriyeho ni uko ibyabishe babyibye ndetse abishwe ninyama zakamasa bo baribanagataburiye nyirako yagatabye ndibuka umusaza umwe yaravuze ati"nisambaza zipfushije barazirya hanswe inka"

Leta ishaka yakwemera ko hari inzara ikadutabariza amahanga akadufasha turashira niba itabiri inyuma

NELI Kuya 10-04-2017

Nyamara inzara iratumaraho abantu leta nitagira icyo ikora ngo irengere aba bantu, niba hamaze kwicwa abantu bangana gutya kandi bazira ikintu kimwe bivuze ko ari inzara

joriji pirate Kuya 10-04-2017

Ibi ibimenyetso by’inzara kbs kuko aba bicwa biba byabayobeye nta yandi mahitamo uretse kwiba !

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...