konka coffee
KONKA

AMAKURU

UKWEZI

Nyiragicali n’umuhungu we bafungiwe kwica ihene z’abandi urw’agashinyaguro

Nyiragicali n’umuhungu we bafungiwe kwica ihene z’abandi urw’agashinyaguro
26-08-2016 saa 04:17' | By Chief Editor | Yasomwe n'abantu 7995 | Ibitekerezo 7

Polisi y’u Rwanda mu karere ka Nyagatare ifunze umwana na nyina bashinjwa ubufatanyacyaha mu kwica urw’agashinyaguro ihene 33, igikorwa Polisi yafashe nk’aho atari icyaha gusa ahubwo ari ubunyamaswa.

Abakekwa gukora iki cyaha ari bo Nyiragicali Ruth ufite imyaka 57 n’umuhungu we witwa Murisa Frank w’imyaka 32, ubu bombi bafungiye kuri sitasiyo ya Polisi ya Rwimiyaga.

Asobanura uko ubu bugizi bwa nabi bwakozwe, Umuvugizi wa Polisi y’u Rwanda mu Ntara y’Uburasirazuba, Inspector of Police (IP) Emmanuel Kayigi yamaganye ubu bugizi bwa nabi n’ubuhubutsi, aho yagize ati:”Ku itariki ya 24 Kanama 2016, ihene 33 zarenze imbibi z’urwuri rwazo zijya mu rwuri rwa Nyiragicali gushaka ubwasi. Afatanyije n’umuhungu we, Nyiragicali afata izo hene azifungirana mu kazu gato kari mu rwuri rwe baziciramo.”

Yakomeje avuga ko ihene zimwe zishwe zinizwe izindi zicwa zikubiswe bikomeye. Muri izo hene 33 zapfuye, 16 muri zo zikaba zarahakaga, abazishe bakaba baragiye bazijombagura ibyuma munda kugira ngo bice ihene n’iyo yari kuzabyara.

Izi hene bivugwa ko zari iza Muzungu Frank na Mugenyi Ernest bafite urwuri rubangikanye n’urw’uyu Nyiragicali.

IP Kayigi yavuze at:”Iki ni igikorwa cy’ubupfapfa, turacyakora iperereza ngo tumenye neza icyateye ubu bugizi bwa nabi ariko nyuma twaje kumenya ko uyu Nyiragicali yari afitanye ubwumvikane buke na bagenzi be ari nabo ba nyiri izi hene zishwe, gusa nta muntu n’umwe wemerewe kwihanira kuko niba ihene zararenze uruzitiro zikaza kurisha mu rwuri rwe, yagombaga kuregera inzego zibishinzwe cyangwa akamenyesha Polisi cyangwa inzego z’ibanze bimwegereye”.

Yakomeje avuga ko aba bombi nibahamwa n’icyaha bazahanwa hakurikijwe Ingingo ya 436 mu gitabo cy’amategeko ahana ivuga ku ihanwa ry’icyaha cyo gufata nabi amatungo yororerwa mu rugo, kuyakomeretsa cyangwa kuyica.

Iyi ngingo igira iti:”Umuntu wese ufata nabi amatungo cyangwa inyamaswa zororerwa mu rugo, ku buryo bubangamira ubuzima bwayo, ahanishwa igifungo kuva ku minsi umunani (8) ariko kitarenze amezi atandatu (6) n’ihazabu y’amafaranga y’u Rwanda kuva ku bihumbi makumyabiri (20.000) kugeza ku bihumbi magana atanu (500.000) cyangwa kimwe gusa muri ibyo bihano."

Iyi ngingo kandi ikomeza ivuga ko, Umuntu wese, ku bw’inabi kandi nta mpamvu, wica cyangwa ukomeretsa bikomeye amatungo y’undi, ahanishwa igifungo kuva ku mezi atandatu (6) kugeza ku mwaka umwe (1) n’ihazabu y’amafaranga y’u Rwanda kuva ku bihumbi magana abiri (200.000) kugeza kuri miliyoni ebyiri (2.000.000) cyangwa kimwe gusa muri ibyo bihano.


INKURU ZA :
Tanga Igitekerezo
Ibitekerezo 7
najeda Kuya 31-08-2016

ibyo ntibikwiriye mumuco nyarwanda itegeko ribahana rizakurikizwe

Christine Kuya 29-08-2016

ariko rwose ubugome abantu bamwe bagira bumva buzabageza kuki? aba banyibukije ukuntu muminsi ishize umuntu yammpamagaye ati ko nshaka kubaka muruzitiro rwawe urabyemera cg ntubyemera ndaseka cyane ngirango ariganirira..ntihashize iminsi ngiye kureba ikibanza cyange aho ngifite nsanga koko yubatsemo. agahinda karanyica mbura icyo nkora mbajije abaturage nabo bati natwe nikuriya tumutunze nti se ni muntu ki? ati yabaya umupolice akivamo none ni umumotari. none ndabona naba aribene wabo bafite ubugome butoshye pe!

jea Kuya 27-08-2016

rwose birenze kumva ,icyo nigikorwa cyubunyamaswa pe.

joan Kuya 26-08-2016

uyu mu jama ko mbona ari umjyambere kweli ibi bitekerezo biramugeza he???? gsa babababarire nabo bigaye kbsa basabe imbabazi banatange indishyi kuko bakeneye kwegerwa kurusha guhanwa kuko si byumvikana kbsa .basuzumwe...........

rwanda Kuya 26-08-2016

ntabwo nemererwanywa haba IP KAYIGI cg KOFFY watanze comment. Kiriya ntabwo ari igikorwa cy’ubupfapfa.Non.I’m lawyer since 13 years, ariko kiriya ni icyaha utavuga ngo ni ubupfapfa.mwongere mutekereze irindi zina.

Koffy Kuya 26-08-2016

Ni igikorwa cy’ubupfapfa pe!!!! Imyitwarire nk’iyi ntiba ikwiriye igifungo kingana kuriya gusa. Uwabikize nyuma yo kurangiza igihano aba akwiye no kujya kwiga kubana neza muri society aho bigishiriza inzerezi kuko uyu nawe aba ari inzererezi mu mutwe. Ihene 33 16 zarizigiye kuvuka ubu nibazishyura kubera ubusazi niho bazumva...tuvaze nibura ihene ku mafrng 30.000frw bizagera muri 1.300.000frw mbega igihombo!!!!! abantu twari dukwiye guhindura imyumvire, tukubaka kubana mu mahoro

Koffy Kuya 26-08-2016

Ni igikorwa cy’ubupfapfa pe!!!! Imyitwarire nk’iyi ntiba ikwiriye igifungo kingana kuriya gusa. Uwabikize nyuma yo kurangiza igihano aba akwiye no kujya kwiga kubana neza muri society aho bigishiriza inzerezi kuko uyu nawe aba ari inzererezi mu mutwe. Ihene 33 16 zarizigiye kuvuka ubu nibazishyura kubera ubusazi niho bazumva...tuvaze nibura ihene ku mafrng 30.000frw bizagera muri 1.300.000frw mbega igihombo!!!!! abantu twari dukwiye guhindura imyumvire, tukubaka kubana mu mahoro

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...