konka coffee
KONKA

AMAKURU

UKWEZI

Polisi yihanangirije abakirisitu bajya gusengera mu butayu

Polisi yihanangirije abakirisitu bajya gusengera mu butayu
16-11-2017 saa 08:49' | By Akayezu Jean de Dieu | Yasomwe n'abantu 3712 | Ibitekerezo 1

Polisi y’u Rwanda yaburiye abakirisitu bakunze kujya gusengera ahantu hitaruye, ahantu hakunze kwitwa mu butayu aho ahenshi muri ho byagaragaye ko hateza ibyago k’ubuzima bw’ababa bagiye kuhasengera ndetse bamwe bagapfa bitewe n’imiterere yaho.

Mu butumwa Polisi y’u Rwanda yanyujije ku rubuga rwayo yavuze ko usanga abo bakiristu bajya gusengera mu buvumo, amasumo, amashyamba, ibitare, ku misozi ihanamye, ku nkengero z’ibiyaga, imigezi, inzuzi n’ahandi hantu hashobora gushyira ubuzima bwabo mu kaga.

Bamwe mu bakirisitu bajya gusengera muri ubwo butayu bavuga ko babiterwa n’impamvu zitandukanye zirimo imyemerere, imyumvire hakaba n’abavuga ko bagendera mu kigare. Hari ahantu henshi hakunze gukorerwa aya masengesho nko muri Gicumbi ahari ishyamba n’isumo riri mu Murenge wa Mwange hari umugabo uherutse kuhapfira, si aho gusa kuko no muri Burera naho hari abantu babiri bigeze kurohama mu nkengero z’ikiyaga cya Burera nabo bakaba bari bari muri aya masengesho.

Abahagarariye amadini n’amatorero arimo Kiliziya Gatorika n’Itorero ry’Insanamitima (Evangilical Restoration Church) bo bavuga ko hari ahantu hateganijwe kandi hakozwe neza ku buryo hadashobora guteza impanuka abakirisitu bajya kuhasengera.

Polisi y’u Rwanda nk’urwego rwa Leta rushinzwe gukumira icyahungabanya umutekano w’abaturage ikanareba ko amategeko yubahirizwa, irakangurira abaturarwanda kwirinda gusengera ahantu hose hanyuranyije n’amategeko no gutanga amakuru yerekeye abantu basengera ahantu hashobora gushyira ubuzima bwabo mu kaga.

Abasengera mu butayu bavuga ko aribwo Imana ibumva cyane.

Umuyobozi w’Ishami rya Polisi y’u Rwanda rishinzwe imikoranire yayo n’abaturage ndetse n’izindi nzego hagamijwe ubufatanye mu gukumira ibyaha, ACP Damas Gatare yavuze ko hirya no hino mu gihugu hajya humvikana inkuru zibabaje zerekeye abantu bapfa n’abakomereka igihe barimo gusengera mu buvumo, ibitare, amashyamba n’ahandi hashyira ubuzima bwabo mu kaga.

Umuyobozi muri RGB uyobora Ishami rishinzwe imitwe ya Politiki n’imiryango itari iya Leta, Kangwagye Justus yavuze ko amasengesho agomba gukorerwa ahantu hemewe kandi hatateza ibibazo ku buzima bw’abakristo n’abanyarwanda muri rusange.

Itegeko N°06/2012 ryo ku wa 17/02/2012 rigena imitunganyirize n’imikorere by’imiryango ishingiye ku idini mu ngingo yaryo ya 3 ivuga ko umuntu wese afite ubwisanzure bwo gusenga kandi ko butabanza gusabirwa uruhushya; ariko na none ko ubwo bwisanzure bukoreshwa hakurikijwe ibiteganywa n’amategeko.

Iyi ngingo ikomeza ivuga ko uburenganzira bwo kugaragaza ibyo umuntu yemera mu muryango ushingiye ku idini yihitiyemo bukurikiza amategeko; kandi ko butagomba kubangamira umutekano, ituze n’ubuzima bya rubanda, umuco mbonezabupfura cyangwa se ubwigenge n’uburenganzira shingiro by’abandi.

Ingingo ya 10 y’iri tegeko ivuga ko imiryango ishingiye ku idini, mu mikorere n’imigenzo yayo itagomba kunyuranya n’amategeko agamije kubungabunga umutekano wa rubanda, ubuzima bwabo, imyitwarire myiza hamwe n’uburenganzira bw’abaturage.

Nubwo Leta, inzego z’umutekano ndetse n’abayobozi b’amadini n’amatorero bemeza ko hari ibirimo gukorwa kugira ngo abakirisitu bahindure imyumvire yo kujya gusengera ahantu habatwarira ubuzima, biracyagaragara ko ubukangurambaga kuri iki kibazo bukwiye kwiyongera ku nzego zose kireba kugira ngo abagifite imyumvire yo gusengera ahantu habatwarira ubuzima babireke


INKURU ZA :
Tanga Igitekerezo
Ibitekerezo 1
niyonku Kuya 24-11-2017

Nibyo ntagukemura ikibazo uteza ikindi babihagarike rwose!!!!!murakoze

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...