konka coffee
KONKA

AMAKURU

UKWEZI

Ruhango: Abaturage baratabaza kubera umugabo umaze gutema abantu 9 ntahanwe

Ruhango: Abaturage baratabaza kubera umugabo umaze gutema abantu 9 ntahanwe
19-10-2016 saa 11:06' | By Chief Editor | Yasomwe n'abantu 10320 | Ibitekerezo 7

Abaturage bo mu midugudu ya Kabeza na Kibanda yo mu kagari ka Gisari mu murenge wa Kinazi wo mu karere ka Ruhango, baratabaza inzego zishinzwe kurwanya ruswa n’akarengane, kubera umugabo utemagura abaturage ariko buri gihe ntahanwe, bagashinja na Polisi ikorera muri uyu murenge kureberera umunyabyaha.

Abaturage bo muri aka gace baganiriye n’ikinyamakuru Ukwezi.com, bavuga ko umugabo witwa Twagirimana Philemon amaze gutema abantu 9 mu bihe bitandukanye akabakomeretsa, ariko akaba akomeza kwidegembya ntabihanirwe. Bavuga ko abo yatemye barimo abo yakomerekeje cyane bakaba bakivuza, gusa ntawe arica n’ubwo batinya ko ari byo bizakurikiraho.

Ngendahimana Aaron, ni umwe muri aba batemwe. Yabwiye ikinyamakuru Ukwezi.com ko tariki 22 Nzeri 2016, Twagirimana Philemon yamutemye mu mutwe, mu mugongo, mu ntoki no ku munwa, akamukomeretsa bikomeye kuburyo umuryango we wamujyanye mu bitaro bya Kinazi bazi ko yapfuye kuko yari yataye ubwenge, gusa ubu ngo arimo koroherwa kuko yavuye mu bitaro akaba yivuza ataha mu rugo.

Ngendahimana avuga ko uwo mugabo yigize ikinani, kandi uwo atemye wese akaba adahanwa kuko ikibazo kirangirira mu nzego z’ibanze, banamufunga agahita arekurwa agataha avuga ko mu murenge ari nk’iwabo kuburyo Polisi y’umurenge ntacyo yamutwara.

Akomeza avuga ko nyuma yo kumutema yagiye yigamba ko Polisi y’umurenge yamugiriye inama yo gucika akazongera kwigaragaza ibikomere bimaze gukira, kuva ubwo akaba yirirwa yihisha n’ubwo ngo rimwe na rimwe ajya ataha iwe ninjoro.

Sibomana Eraste ushinzwe irangamimerere na notariya mu murenge wa Kinazi ari nawe urimo gukora inshingano z’Umunyamabanga Nshingwabikorwa uri mu kiruhuko, yatangarije ikinyamakuru Ukwezi.com ko iby’uwo mugabo utema abantu babizi, ariko ubu akaba yaracikiye mu karere ka Kamonyi bakaba bakirimo kumushakisha bafatanyije n’inzego z’umutekano.

Uyu muyobozi ariko ntiyemera ko abamaze gutemwa ari 9 kuko we avuga ko abagiye kurega ari batatu, gusa Ngendahimana uheruka gutemwa we avuga ko ubuyobozi bw’umudugudu bwanamuhaye urwandiko azitwaza ku Karere agiye kugaragaza akarengane yagiriwe, urwo rwandiko rukaba ruriho abantu 9 bose Twagirimana yatemye.

Uwo mugabo aramutse afashwe akagezwa imbere y’ubutabera agahamwa n’icyaha, yazahanishwa ingingo y’148 mu gitabo cy’amategeko ahana mu Rwanda, iteganya igifungo kuva ku mezi atandatu kugeza mu myaka ibiri ku muntu wahamwe no gukubita no gukomeretsa.


INKURU ZA :
Tanga Igitekerezo
Ibitekerezo 7
nice Kuya 21-10-2016

egoko!!!! ahubwo c konumva wagira ngo ubuyobozi buhakorera nibwo bwamuhaye ikiraka cyo kubatemagura? na polici twizeraga koko!!! nakarere karebera!!!! cg umunyamakuru aratubeshya? ubutabera nibutabare ndumva bikomeye.

dodos Kuya 20-10-2016

arko nkaba bayobozi baracyabaho murwanda sinzi nyakubahwa H E ibajya asoma nkizi nkuru

karenzi Kuya 20-10-2016

icyo Ni ikibazo kitoroshye mu byaro a anti baratemwa bwacya bagataha police ikabarekura rwose uwavuga ko ruswa ariyo ibikora ntiyaba abeshye Uko wambwira ko impamvu badashyikirizwa parole ari iyihe Ni ruswa ibitera ntakindi ejo a antu bamara gupfa ugasanga police ira Ngo tibatangira amakuru kugihe muzumve ko aho bishe umuntu atariko aza bavuga Ngo ari kamonyi ko bahazi se bamufashe kuhagera se byarababaniye ahaa nzaba ndeba

Whike Kuya 19-10-2016

Nukuro rwose amategeko ahana ibyaha byurugomo akwiye kuvugururwa kuko cyane cyane mubyaro umuntu aragutema rwose akakugira intere warega bigapfa ubusa ntamareyo kabiri ,babigize nkumukino

Mucyo Jean Baptiste Kuya 19-10-2016

Ubuyobozi ko bubizi ubwo haraburiki? Nibo babiri inyuma kuko bazi aho ari niyo police yaho nayo ibifitemo uruhare cyane

MUGABO Kuya 19-10-2016

Ababishinzwe bakemure icyo kibazo kuko yazagera aho akagira uwo yica cyangwa se nawe bakazamutinyuka bakamwica.

Ruto Kuya 19-10-2016

Ko numva ubuyobozi buzi aho ari mu karere ka Kamonyi ibwo twavuga ko yatorotse .......

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...