konka coffee
KONKA

AMAKURU

UKWEZI

Gukura urubyiruko mu bushomeri byagenewe 131.200.000.000 Frw yo guhanga imirimo

Gukura urubyiruko mu bushomeri byagenewe 131.200.000.000 Frw yo guhanga imirimo
31-05-2017 saa 10:16' | By Chief Editor | Yasomwe n'abantu 3019 | Ibitekerezo 1

Ikibazo cy’ubushomeri mu Rwanda ni kimwe mu bihangayikishije abanyarwanda batari bacye ariko cyane cyane urubyiruko. Abayobozi bakuru b’igihugu mu nzego zitandukanye, bagaragaza ko Leta ikwiye kugira icyo ikora ngo hakurweho imbogamizi zituma benshi batabasha kwihangira imirimo. Hagati aho, ingengo y’imari yagenewe kwihangira imirimo nayo igenda yongerwa, ubu yashyizwe kuri 131.200.000.000 z’amafaranga y’u Rwanda.

Kuwa Mbere tariki 29 Gicurasi 2017, Komisiyo y’Ingengo y’Imari n’Umutungo by’Igihugu mu Nteko Ishinga amategeko, umutwe w’Abadepite, yagejeje ku Nteko Rusange raporo ku isesengura ry’inyandiko ya gahunda y’ingengo y’imari y’igihe giciriritse 2017/2018-2019/2020 hamwe n’imibare y’ikigereranyo cy’ingengo y’imari ya leta 2017/2018.

Hon. Mukayuhi Rwaka Constance uyobora iyi Komisiyo, yavuze ko Ubukungu bw’u Rwanda bwitezweho kuzamuka ku gipimo cya 6.2% mu mwaka wa 2017 no ku gipimo cya 6.8% muri 2018, anagaragaza ko Ingengo y’imari y’Igihugu igenda yiyongera umwaka ku wundi, n’iy’Inzego zose ikaba yariyongereye nubwo itaragera ku gipimo kifuzwa. Mu myaka itatu ishize, kuva mu mwaka wa 2014/15-2016/17, yiyongereyeho 7% kandi ko mu myaka ibiri iri imbere, kuva 2017/18 kugeza 2019/20 Ingengo y’Imari y’Igihugu iziyongeraho 7% na 12%.

Hon. Mukayuhi Rwaka Constance (ubanza ibumoso) uyobora Komisiyo y’Ingengo y’Imari n’Umutungo by’Igihugu

Kuba ingengo y’imari yariyongereye mu nzego zose, binasobanura ko amafaranga yashorwaga mu guhanga imirimo mishya izakura abanyarwanda benshi mu bushomeri, nabyo bigenda bigenerwa amafaranga menshi yisumbuyeho. Hon. Mukayuhi Rwaka Constance yavuze ko guteza imbere umusaruro no guhanga akazi ku rubyiruko (Productivity & Youth employment) byagenewe amafaranga y’u Rwanda angana na 131.200.000.000 bingana na 6% by’ingengo y’imari yose ya Leta y’umwaka wa 2017/18.

Ku gicamunsi cyo kuri uyu wa Kabiri tariki 30 Gicurasi 2017 kandi, mu cyumba cy’Inteko Rusange ya Sena yabereye inama nyunguranabitekerezo ku murimo, yitabiriwe n’inzego zose ziteza imbere urwego rw’umurimo. Muri iyi nama, Minisitiri w’Umurimo n’abakozi ba Leta, Judith Uwizeye, yavuze ko Leta yihaye intego y’uko mu cyerekezo 2020, kimwe cya kabiri cy’abakora bazaba bari mu mirimo itari iy’Ubuhinzi kandi ko gahunda ya Goverinoma y’imyaka 7 (7YGP) na EDPRS2 biteganya guhanga imirimo 200,000 itari iy’ubuhinzi buri mwaka.

Inama nyunguranabitekerezo ku murimo yitabiriwe n’inzego zose ziteza imbere urwego rw’umurimo

Muri iyi nama nyunguranabitekerezo, hagarutswe ku kigega cya BDF ubusanzwe gifasha urubyiruko gukora imishinga iruteza imbere mu gihe rutabasha kwibonera ingwate ngo rubone igishoro. Minisitiri Uwizeye Judith ati: "Ubushobozi bwa BDF mu gutanga ingwate ntiburabasha kugera kuri bose"

Minisitiri w’Umurimo n’abakozi ba Leta, Judith Uwizeye

Imwe mu nyanzuro yafatiwe mu Nama Nyunguranabitekerezo ku murimo yaberaga muri Sena irasaba Guverinoma gufata ingamba zituma Urwego rw’Abikorera rugira imbaraga zituma rushobora guhanga imirimo iteganyijwe buri mwaka. Guverinoma yasabwe kandi kurushaho kumenyekanisha serivisi za BDF no gukuraho imbogamizi zituma abagenerwabikorwa bayo batabona ubufasha bukwiye bwo guhanga umurimo.


INKURU ZA :
Tanga Igitekerezo
Ibitekerezo 1
Vuguziga Kuya 1-06-2017

KORA NDORE ! IRUTA VUGA NUMVE !!!!

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...