konka coffee
KONKA

AMAKURU

UKWEZI

Havumbuwe ibinyoma kuri raporo yibasiye u Rwanda, hari abo byavuzwe ko bapfuye ari bazima

Havumbuwe ibinyoma kuri raporo yibasiye u Rwanda, hari abo byavuzwe ko bapfuye ari bazima
13-10-2017 saa 17:31' | By Chief Editor | Yasomwe n'abantu 7908 | Ibitekerezo 2

Komisiyo y’Igihugu ishinzwe kurengera uburenganzira bw’ikiremwamuntu, kuri uyu wa Gatanu tariki 13 Ukwakira 2017, yashyize ahagaragara ibyavuye mu bushakashatsi yakoze kuri raporo yasohowe n’Umuryango mpuzamahanga wita ku burenganzira bwa muntu, Human Rights Watch (HRW), bijyanye n’abantu byavugwaga ko bishwe n’inzego z’igisirikare cy’u Rwanda cyangwa igipolisi n’abandi bari mu nzego zitandukanye z’ubuyobozi. Hagaragajwe ko byari bishingiye ku binyoma, kuko bamwe mu bo byavuzwe ko bapfuye ari bazima, mu gihe hari abandi bazize urupfu rusanzwe.

Iyi raporo yasohotse muri Nyakanga uyu mwaka, Human Rights Watch yari yayihaye izina rya "All Thieves must be killed" bishatse kuvuga ko mu Rwanda abajura bose bicwa n’inzego z’umutekano cyangwa iz’ubuyobozi. Muri iyi raporo, hari amazina y’abantu byavugwaga ko bishwe, hakavugwa aho bari batuye n’aho biciwe, ari nabyo byatumye Komisiyo ishinzwe uburenganzira bwa muntu mu Rwanda, ikora ubushakashatsi ngo nayo irebe uburyo abo bantu babuzwa uburenganzira bwabo.

Bamwe mu bantu bagaragara muri raporo ya Human Rights Watch bivugwa ko bishwe, Komisiyo y’Uburenganzira bwa muntu yaje gusanga abayobozi bo mu nzego z’ibanze batabazi. Muri aba bantu, abagera kuri barindwi byavugwaga ko bishwe n’inzego z’umutekano, byagaragaye ko bakiriho ndetse batanze ubuhamya imbere y’abanyamakuru mu kiganiro bagiranye n’iyi Komisiyo kuri uyu wa Gatanu.

Muri abo byavugwaga ko bishwe harimo Nsanzabera Tharcisse ubu ufungiwe muri gereza ya Nyakiriba muri Rubavu kubera icyaha cy’ubujura yahamijwe, hakabamo Majyambere Alphonse wibera iwabo mu murenge wa Boneza mu karere ka Rutsiro, Nyirabavakure Daphrose uba muri Repubulika Iharanira Demokarasi ya Kongo hamwe n’umugabo we, Karasankima Jovan uba mu murenge wa Nyabirasi muri Ngororero, Habyalimana Elias wibera mu Bubiligi kuva muri 2009, Nzamwitakuze Donat ubana n’umugore we muri Uganda na Hanyurwabake Emmanuel uba mu kirwa cy’Idjwi muri Repubulika Iharanira Demokarasi ya Kongo.

JPEG - 43.8 kb

Uyu ni Majyambere Alphonse raporo yavugaga ko yishwe ariko yitangiye ubuhamya imbere y’abanyamakuru, n’abamusabye ibyangombwa yaberetse ko ari we koko

Mu bo Human Rights Watch ivuga ko bishwe kandi, harimo bane bishwe n’uburwayi busanzwe. Abo barimo Uwintwali Thaddé wapfuye amaze igihe kirekire arwaye, ndetse yapfuye mu myaka myinshi ishize, tariki 25 Nzeri 1999 nyamara HRWb muri raporo yayo yavuze ko yishwe tariki 13 Ukuboza 2016 azira kwiba ihene.

Habimana wahoze ari umusirikare mu ngabo z’u Rwanda, yapfuye azize uburwayi tariki 1 Gicurasi 2013 ndetse umugore we Cécile Ntabanganyimana yatanze ubuhamya bw’uburyo yababajwe n’abashinyaguriye umugabo we, muri raporo ya HRW yavuze ko yishwe tariki 17 Gashyantare 2017 azira kurobesha indobani zitemewe.

JPEG - 58.1 kb

Aha Cécile Ntabanganyimana yatangaga ubuhamya ko umugabo we Habimana wari umusirikare, yishwe n’indwara

Mu bantu batangajwe na Human Rights Watch ndetse hakavugwa n’aho bari batuye n’aho biciwe, Komisiyo y’Uburenganzira bwa muntu yagaragaje ko 10 muri bo yagerageje kubashakisha ariko n’abayobozi b’inzego z’ibanze hamwe n’abaturage bakavuga ko batabazi. Muri abo harimo abari bahawe amazina ya Mbarushimana Innocent, Ntahondereye Jean Damascène, Niyigena Emmanuel, Nzabandora Ndayishimiye, Hakuzimana Basabose, Nteziriza Naftal, Buhagarike François, Bemeriki Alexandre, Habiyaremye Jean de Dieu na Nshimiyimana Vincent.

Muri aba bari batangajwe na HRW ko bishwe, harimo batandatu bapfuye bazize impanuka zitandukanye zirimo kurohama mu kiyaga, nyamara HRW yo igatangaza ko bishwe na Polisi, igisirikare cyangwa DASSO. Muri abo harimo Bihibindi Jean de Dieu, Minani Samuel, Bazangirabate Amurani, Ntakingora Djuma, Renzaho Vedaste na Ntamuhanga Emmanuel.

Abandi bantu raporo ya HRW yavuze ko bishwe bitegetswe n’inzego z’ubuyobozi, Komisiyo y’uburenganzira bwa muntu yagaragaje ko ababishe ari abaturage bagejejwe imbere y’ubutabera kandi bagakatirwa n’inkiko hakurikijwe amategeko. Nzitakuze Emmanuel HRW ivuga ko yishwe n’ingabo z’u Rwanda, koko yishwe n’umusirikare Captain Nkurunziza François, ariko yagejejwe imbere y’ubutabera akatirwa imyaka 10 y’igifungo.

Hari abantu bagera ku 10 kandi HRW yavuze ko bishwe n’abasirikare hamwe n’igipolisi cy’u Rwanda mu buryo bw’iyicarubozo, nyamara bararashwe n’abacunga umupaka ubwo bambukaga mu kibaya cya Cyanzarwe, hamwe mu nzira ikoreshwa cyane n’abo mu mutwe wa FDLR bashaka guhungabanya umutekano mu Rwanda. Aka gace, ubuyobozi bwakunze gusaba abaturage kutahaca ninjoro kubera ikibazo cy’umutekano waho.

JPEG - 135.6 kb
JPEG - 80.5 kb

Aba batangabuhamya babeshyuye ibyagaragaye muri raporo ya Human Rights Watch (HRW)


INKURU ZA :
Tanga Igitekerezo
Ibitekerezo 2
Fazil Kuya 17-10-2017

Ariko njye ibya Leta harigihe biducanga. Iyo ari ibivuga ibigwi byayo, ntijya ivuguruza na rimwe ahubwo bahita babikwirakwiza hose. Iyo ari ibinenga, ni afrontement yamagambo. haryako Diane arigishinjwa gukoresha indamngamuntu zabapfuye, uyu munsi bakaba batamuha uburenganzire ngo abinyomoze? Mujye mureka kubshya baba bavuga ukuri rimwe na rimwe. Kunengwa harigihe biba byiza

Kalisa Bosco Kuya 16-10-2017

Ndanenga HRW kuba ikora Raporo igendeye gusa ku binyoma iba yahawe n’abanga u Rwanda hamwe n’abafite inyungu zabo mu gusebya u Rwanda. Bajye baza babanze bakore ubushakashatsi bandike ibyo bahagazeho kuko u Rwanda ni igihugu kigendera ku mategeko.

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
BAHO
INKURU ZIKUNZWE
Ibitekerezo
Loading...
IZINDI NKURU WASOMA
Loading...