konka coffee
KONKA

AMAKURU

UKWEZI

Ibitavugwaho rumwe bikomeje kuranga urubanza rwa Major Dr Rugomwa ushinjwa kwica umwana

Ibitavugwaho rumwe bikomeje kuranga urubanza rwa Major Dr Rugomwa ushinjwa kwica umwana
7-06-2017 saa 11:06' | By Chief Editor | Yasomwe n'abantu 7278 | Ibitekerezo 5

Urubanza ubushinjacyaha bwa gisirikare bukomeje gukurikiranamo Dr Major Aimable Mupenzi Rugomwa, umusirikare mu ngabo z’u Rwanda akaba yari n’umuganga mu bitaro bya gisirikare i Kanombe, rukomeje kuburanishwa aho ashinjwa gukubita umwana akamwica. Mu miburanishirize y’uru rubanza, uyu musirikare yakomeje kuvuga amagambo ataragiye avugwaho rumwe ndetse yakunze kugarukwaho cyane mu bitangazamakuru no mu bitekerezo by’abantu batandukanye.

Bimwe mu byakomeje kuranga urubanza rw’uyu musirikare akaba n’umuganga bitagiye bivugwaho rumwe, nibyo tugiye kugarukaho muri iyi nkuru.

Dr Rugomwa aburana ari kumwe n’uwitwa Nsanzimfura Mamerito bari kumwe ubwo Mbarushimana yicwaga tariki 7 Nzeri 2016, mu rugo kwa Major Dr Aiamable Mupenzi Rugomwa ruherereye i Kanombe. Nsanzimfura ni mukuru wa Major Dr Aimable, ndetse asanzwe aba aha iwe mu kazu gato kari mu gipangu.

1. Major Dr Rugomwa avuga ko yarwanye n’igisambo

Kwa Kabiri tariki 13 Nzeri 2016, nibwo Major Dr Aimable Mupenzi Rugomwa yagejejwe bwa mbere imbere y’urukiko rwa gisirikare agasomerwa icyaha aregwa cyo kwica umwana w’umuturanyi witwaga Mbarushimana Theogene, ibi byaha akaba yabihakanye ahubwo avuga ko yarwanye n’igisambo nyuma akumva ko cyapfuye.

Major Dr Rugomwa Aimable Mupenzi, yahakanye icyaha cy’ubufatanyacyaha mu kwica, avuga ko yasanze Mbarushimana Theogene arimo gufungura ipine ry’imodoka ye, yamufata ngo amubaze ibyo arimo gukora akamurwanya, ndetse avuga ko yari afite ingufu nyinshi, kuburyo yakubise uyu musirikare umugeri akanamukubita inkokora. Avuga ko barwanye, nyuma akaza kumva bavuga ko yapfuye.

2. Major Dr Rugomwa yasabye ko yafungurwa agafasha abagore b’ingumba kubona urubyaro

Mu iburanisha ryabaye bwa mbere aburanishwa ku bijyanye n’ifunga n’ifungura ry’agateganyo, Dr Rugomwa Aimable Mupenzi yasabye Urukiko ko rwamurekura agakomeza gukurikiranwa n’ubutabera ari hanze, kuko ashaka kurangiza ubushakashatsi yatangiye bufite intego yo gufasha abagore b’ingumba kubona urubyaro, ndetse yashimangiye ko hari abagore 130 yari arimo akorana nabo ubu bakaba baramubuze, ikindi ubushakashatsi akaba atabukorera aho afungiye.

3. Major Dr Rugomwa ntiyemera uburyo hasesengurwa ubuhamya bw’umugore we wamubujije kwica akanga

Mu iburanishwa ryabaye tariki 9 Gicurasi 2017, Ubushinjacyaha bwagarutse ku buhamya bw’umugore wa Dr Rugomwa witwa Uwase Scovia, wiyemereye ko umugabo we yakubise Theogene Mbarushimana igiti mu mutwe, uwo mugore akanagira inama umugabo we yo kutica umuntu akinangira. Icyo gihe ninabwo ubushinjacyaha bwerekanye amafoto y’ikanzu y’umweru uyu musirikare Maj Rugomwa yari yambaye ubwo yakoraga icyaha akurikiranyweho, bigaragazwa ko iyi kanzu yari iriho amaraso ndetse ko ibizamini bya DNA byagaragaje ko aya maraso ari aya nyakwigendera Mbarushimana.

Mu iburanisha ryabaye kuri uyu wa Kabiri tariki 6 Kamena 2017, Dr Rugomwa yavuze ko ubuhamya bwatanzwe n’umugore we busesengurwa igice, kuko mu nyandiko ye bita gusa ku by’aho avuga ko yamubujije kwica umuntu akanga, nyamara ntibarebe ku by’uko yanavuze uko umugabo we yatewe n’umujura bakarwana hanyuma agakomereka bikaza kumuviramo gupfa. Mu buhamya bwinshi bwatanzwe kandi, uyu muganga w’umusirikare ntiyemeranwa na bumwe muri bwo agaragaza ko bushingiye ku makimbirane y’igihe kirekire bari basanzwe bafitanye.

Ku Cyumweru tariki 4 Nzeri 2016, nibwo Dr Aimable Mupenzi yakubise uwo mwana w’umuhungu wari ufite imyaka 19 y’amavuko, wari umunyeshuri mu mwaka wa kabiri w’amashuri yisumbuye, kugeza amwishe. Ibi byabereye mu kagari ka Rubirizi mu murenge wa Kanombe, umwana wakubiswe akaba ari umuturanyi w’uyu musirikare.

Uyu mwana yapfuye nyuma yo gukubitwa. Major Rugomwa avuga ko ari igisambo barwanye

Mbarushimana Theogene wapfuye nyuma yo gukubitwa na Dr Aimable Mupenzi, bivugwa ko yamuzizaga ko yamwibye ibintu mu modoka ye n’ubwo abaturanyi bavuga ko ntabyo bazi ko byaba byarabayeho. Gusa ngo uyu muganga w’umusirikare yajyaga akunda kwibwa ibintu mu modoka akavuga ko uzafatwa azahura n’akaga gakomeye, n’ubwo nta gihamya y’uko uyu nawe koko yaba yari yamwibye.

Nyuma yo kwica uyu mwana, Dr Aimable Mupenzi yahamagaye umuyobozi w’akagari ka Rubirizi, amubwira ko yishe igisambo n’ubwo atigeze agaragaza ibyo yamufatanye. Abaturanyi bavuga ko yahuye n’uyu mwana, akamukurura akamujyana iwe akaba ari ho amukubitira kugeza amumazemo umwuka.

Mu muhango wo gushyingura uyu mwana, amarira n’agahinda byari byose

SOMA INKURU BIJYANYE HANO:

* Kigali: Umuganga ufite ipeti rya Major yakubise umwana aramwica

* Ingabo z’u Rwanda zasuye umuryango w’umwana wishwe akubiswe na Major Mupenzi

* Major Aimable Mupenzi yahakanye gukubita umwana akamwica, avuga ko yarwanye n’igisambo

* Major Dr Aimable ushinjwa gukubita umwana akamwica yakatiwe kuba afunzwe by’agateganyo

* Major Dr Aimable ushinjwa gukubita umwana akamwica, yatanze impamvu zituma ataburana


INKURU ZA :
Tanga Igitekerezo
Ibitekerezo 5
Kubwimana (Kayonza) Kuya 8-06-2017

kdi nyamara ari mu bagomba kuturinda, Muribaza urupfu uyu mwana yapfuye koko!!! Ngaho mutekereze ababyeyi be!!! ibaze ni izi ngirwa manza (imanza) wasanga nta ni impozamarira bazaha cg bahaye umuryango we,
Dusigaye dukorerwa akarengane muri iyi minsi kdi ntaho twabariza.

Kubwimana (kayonza) Kuya 7-06-2017

Ariko ubanza mutajya mwumva radio! Ni keshi abasirikare cg abapolice bicya cg bagahohotere abantu . Vubaha ntimwumvise ibyabaye i Gikondo. Ni aho kumirwa.
Njye mbona n’icyizere twabagiriraga kizagenda kiyoyoka peee!!!
Docteur Mojor utinyuka agakora aya mahano, None muramuretse ngo ajye kuvura, Byonyine iki gikorwa cya bunyamaswa yakoze kigaragazako nta bumuntu agira. Umugore we aramubuza ati have wimwica aranga!!!!!!!

Dorcas Kuya 7-06-2017

iyi nkuru irambabaza cyane,iyo ntekereje umubabaro uwo mwana yagize ubwo yakubitwaga kugera ubwo apfuye.uwo mugabo niba koko yaramwishe gutyo ni umugome cyane,azasabe Imana imuhishurire Yesu amuhindure umutima kuko ntaho yageza igihugu cyacu

Dorcas Kuya 7-06-2017

iyi nkuru irambabaza cyane,iyo ntekereje umubabaro uwo mwana yagize ubwo yakubitwaga kugera ubwo apfuye.uwo mugabo niba koko yaramwishe gutyo ni umugome cyane,azasabe Imana imuhishurire Yesu amuhindure umutima kuko ntaho yageza igihugu cyacu

Dorcas Kuya 7-06-2017

iyi nkuru irambabaza cyane,iyo ntekereje umubabaro uwo mwana yagize ubwo yakubitwaga kugera ubwo apfuye.uwo mugabo niba koko yaramwishe gutyo ni umugome cyane,azasabe Imana imuhishurire Yesu amuhindure umutima kuko ntaho yageza igihugu cyacu

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
BAHO
INKURU ZIKUNZWE
Ibitekerezo
Loading...
IZINDI NKURU WASOMA
Loading...