konka coffee
KONKA

AMAKURU

UKWEZI

Iby’ingenzi wamenya ku bantu 9 bambitswe impeta z’Igihango na Perezida Kagame

Iby’ingenzi wamenya ku bantu 9 bambitswe impeta z’Igihango na Perezida Kagame
20-11-2017 saa 12:20' | By Akayezu Jean de Dieu | Yasomwe n'abantu 4689 | Ibitekerezo 1

Ku mugoroba wo kuwa Gatandatu tariki 18 Ugushyingo 2017, Perezida wa Repubulika y’u Rwanda, Paul Kagame, yatanze Impeta z’Ishimwe ry’ubucuti ziswe ‘Igihango’, ku bantu icyenda bagize uruhare rw’ikirenga mu gutera ingabo mu bitugu Abanyarwanda mu rugamba rwo kongera kwiyubaka nyuma y’ibihe bigoye bya Jenoside yakorewe Abatutsi mu 1994.

Nyuma ya Jenoside yakorewe Abatutsi muri Mata 1994, u Rwanda cyari igihugu cyari kimaze gusenyuka bigaragara. Kugira ngo igihugu kibe kigeze aho kiri kuri uyu munsi byasabye imbaraga no gushyira hamwe kw’Abanyarwanda bari bayobowe na Leta y’ubumwe irangajwe imbere na Perezida Paul Kagame.

Ibi byose byagezweho n’Abanyarwanda ariko ntabwo babigezeho bonyine ari nayo mpamvu hari abakomeje kuba hafi no gufasha u Rwanda muri urwo rugendo rutoroshye rwo kongera kwiyukaba. Muri abo harimo abagera ku 9 bashimiwe na Perezida Kagame ubwo yabambikaga Impeta y’Igihango’.

Abahawe izi mpeta z’igihango ni Hezi Bezalel, Howard Buffett, Gilbert Chagoury, John Dick, Paul Farmer, Alain&Dafroza Gauthier, Linda Melvern ndetse na Joseph Ritchie

Icyo wamenya kuri aba bahawe Impeta z’Ishimwe

Hezi Bezalel

Hezi Bezalel ni umunya Israel wavukiye ahitwa Basra muri Iraq nyuma aza kujyana n’umuryango we muri Israel ubwo yari afite imyaka 5 y’amavuko.

Umuryango we wabanje kuba mu nkambi ya Or Yehuda nyuma baza kwimukira ahitwa Ramat Gan. Uyu Besel yaje kujya mu gisirikare cya Israel ubwo barwanaga intambara ya Yom Kippur aho yaje kurangira agahita ajya kwiga ibijyanye n’icungamutungo muri Tel Aviv University.

Akimara guhabwa impamyabumenyi ihanitse muri aya masomo yahise aba umwarimu muri iyi kaminuza akaba yarabifatanyaga no kwigisha muri kaminuza zinyuranye zirimo n’iyitwa Ben Gurion University

Hezi Bezalel ni Umunya-Israel, w’inshuti y’akadasohoka y’u Rwanda na Perezida Kagame by’umwihariko. Afatwa nk’irembo ry’ishoramari ry’abanya-Israel mu Rwanda ndetse akaba n’uhagarariye inyungu z’u Rwanda muri Israel.

Yagize uruhare runini mu kumenyekanisha ibyababye mu Rwanda mu 1994 dore ko yahageze Jenoside igihagarikwa. Yatumye u Rwanda na Israel bigirana umubano ukomeye.

Howard G. Buffet

Howard Graham Buffett yavutse tariki 16 Ukuboza 1954 yavukiye ndetse anakurira I Omaha, Nebraska muri Leta zunze ubumwe za America hamwe n’abavukanyi be babiri umukobwa witwa Susan n’umuhungu witwa Peter.

Haward ni impuguke mu bya Politiki ishingiye ku buhinzi n’ubworozi, muri Kanama 1977 yashyingiranwe na Marcia Sue Ducan.

Uyu Munyamerika w’umuherwe, azwi cyane mu gufasha u Rwanda kwigira, binyuze mu guteza imbere ubuhinzi no guteza imbere ubumenyi mu buhinzi mu Rwanda.
Abinyujije mu muryango yashinze, Buffet azwi mu bikorwa byo kuhira imyaka ku butaka bwa hegitari 1280 muri Nasho mu Karere ka Kirehe n’ishuri ry’ubumenyingiro mu by’ubuhinzi rya Karama mu Karere ka Bugesera.

Paul Farmer

Paul Edward Farmer Yavutse tariki 26 Nzeri 1959, Umunyamerika akaba n’umwe mu bashinzwe Umuryango Partners In Health (Inshuti mu Buzima), ukorana na Minisiteri y’Ubuzima mu kuvura kanseri kuva mu mwaka wa 2006.

Usibye kuba Partners In Health ikorana n’u Rwanda mu mishanga itandukanye y’ubuzima, Farmer ni umwe mu bagize uruhare mu gutangiza ibitaro bivura kanseri bya Butaro.

Alain Gauthier na Dafroza Gauthier

Umufaransa Alain Gauthier n’umugore we Mukarumongi Dafroza wavukiye mu Rwanda bamaze imyaka 15 bakora ubushakashatsi ku madosiye y’Abanyarwanda bakekwaho Jenoside yakorewe abatutsi mu 1994 bacyidegembya mu Bufaransa batarigeze bakurikiranwa n’urukiko.

Muri 2001 Gauthier na Mukarumongi bashyingiranwe mu 1977, bashinze umuryango bise ‘Collective of Civil Plaintiffs for Rwanda’ (CCPR). Kuva mu ntangiro za CCPR, Gauthier n’umugore we bazengurutse mu nkiko, mu magereza no mu barokotse Jenoside bakora ubushakashatsi bwimbitse mu Rwanda.

Aba bafite uruhare kandi mu kunyomoza amakuru avuga nabi u Rwanda ahanini akwirakwizwa n’abahakana bakanapfobya Jenoside yakorewe Abatutsi mu 1994.

Prof.Linda Melvern

Linda Melvern, Umwanditsi akaba n’impuguke mu bya Jenoside, afite uruhare rukomeye cyane mu guhangana n’abahakana bakanapfobya Jenoside yakorewe Abatutsi mu Rwanda cyane cyane banyuze mu itangazamakuru.

Azwiho kwandika ibitabo byinshi kuri Jenoside yakorewe abatutsi, birimo n’icyo yise “A People Betrayed: The Role of the West in Rwanda’s Genocide”, ugenekereje mu Kinyarwanda bishatse kuvuga “Uruhare rw’ibihugu by’Uburengerazuba muri Jenoside n’uburyo abantu batereranye u Rwanda”.

Joseph Ritchie

Ni umwe mu bayobozi ba Komite ngishwanama y’umukuru w’igihugu, akaba yarayoboye RDB mu mwaka wa 2007 kugera 2009.
Nubwo afite ubwenegihugu bw’u Rwanda, akomoka muri Leta ya Illinois imwe mu zigize Leta Zunze Ubumwe z’Amerika. Yagize uruhare rukomeye mu mishanga itandukanye igamije guteza imbere u Rwanda.

John Dick

John Edgar Dick yavutse muri 1954 muri Canada akaba ari impuguke mu bya siyansi yigishje muri kaminuza zinyuranye zirimo na University of Toronto

Mu myaka 50 ishize, Dick ni umwe mu bagize uruhare rukomeye mu guteza imbere ibigo bikomeye by’ikoranabuhanga, ibifite aho bihuriye n’inganda, ndetse n’iby’indege.

Ubwo u Rwanda rwashakaga uko rwakorana n’ibigo bikomeye byo ku isi bitandukanye, uyu mugabo yafashe iya mbere mu kurutega amatwi no gushyira mu bikorwa. Ibi nibyo byabyaye umusaruro w’imikoranire ijyanye n’ishoramari ryatanze umusaruro mu gihugu. Uburyo ahagararira u Rwanda mu mahanga, bituma aruvuga nk’igihugu cye.

Gilbert Chagoury

Gilbert Chagoury ni umugabo ufite inkomoko muri Liban na Nigeria. Yize muri kaminuza yitwa College des Freres Chrestiens yo muri Liban mbere y’uko aza kuba muri Nigeria we n’umuryango we

Uyu mugabo yubatse izina rikomeye mu bijyanye n’ubucuruzi; gusa yamamaye mu bijyanye n’ibikorwa by’ubugiraneza. Yahisemo gusaranganya umutungo we n’abantu bari iruhande rwe, akaba yaragize uruhare runini mu gifasha u Rwanda atitangiriye.

Aba bombi bahawe izi mpeta z’Igihango bigendetye ku biteganywa n’Iteka rya Perezida wa Repubulika rigena imiterere, imitangire n’imenyekanisha ry’Impeta z’Ishimwe. Uretse “Igihango”, izindi mpeta z’ishimwe ni iy’icyubahiro yitwa “Agaciro”, iy’umurimo yitwa “Indashyikirwa”; iy’umuco yitwa “Indangamirwa” hamwe n’iy’ubwitange yitwa "Indengabaganizi".


INKURU ZA :
Tanga Igitekerezo
Ibitekerezo 1
RUKUNDO Kuya 20-11-2017

Prezida wacu areba kure,kuko gushima ni indangagaciro y’urwanda. Mfite inzozi nziza z’urwanda mu gihe kiri imbere ariwe utuyoboye.

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...