konka coffee
KONKA

AMAKURU

UKWEZI

Impaka zabaye ndende mu bujurire bwa Adeline Rwigara na Diane Rwigara

Impaka zabaye ndende mu bujurire bwa Adeline Rwigara na Diane Rwigara
16-11-2017 saa 10:22' | By Chief Editor | Yasomwe n'abantu 17194 | Ibitekerezo 3

Kuri uyu wa Kane tariki 16 Ugushyingo 2017, Diane Rwigara na nyina Mukangemanyi Adeline Rwigara bitabye urukiko rukuru ngo baburanishwe mu bujurire ku bijyanye n’ifungwa n’ifungurwa ry’agateganyo, nyuma y’uko bari bakatiwe gufungwa by’agateganyo iminsi 30 mu gihe iperereza ku byaha bakurikiranyweho rikomeje. Bitabye bambaye imyenda y’ibara rya roza isanzwe iranga imfungwa, iburanisha ritangizwa no gutakamba kwa Adeline Rwigara kubera uburwayi amaranye iminsi maze iburanisha nyirizina ritangiye, impaka ziba ndende hagati y’abaregwa n’Ubushinjacyaha.

Mu iburanisha ryo kuwa Kabiri tariki 7 Ugushyingo 2017, Diane Rwigara yitabye urukiko atariki kumwe na nyina Mukangemanyi Adeline Rwigara. Me Gatera Gashabana wunganira Mukangemanyi Adeline Rwigara, we yageze mu rukiko avuga ko uwo yunganira arwaye, ndetse uregwa yanditse ibaruwa isobanura iby’uko atabonetse kubera uburwayi, ngo yararembye ntiyashobora kugera mu rukiko.

Adeline Mukangemanyi Rwigara imbere y’urukiko n’umwunganira mu mategeko Me Gatera Gashabana

Diane Rwigara akurwamo amapingu n’abacungagereza

Anne Rwigara, murumuna wa Diane Rwigara yinjira mu rukiko ngo akurikirane iburanisha

Musaza wabo nawe yitabiriye iburanisha ryo kuri uyu wa Kane

Mu iburanisha ryo kuri uyu wa Kane, bombi bitabye urukiko ariko iburanisha rigitangira, Mukangemanyi Adeline Rwigara atangira avuga ko akirwaye, ko arimo kunywa imiti ikomeye kuburyo atabasha kuburana. Yavuze ko amaze igihe yivuza kandi ko uburwayi afite yabutewe n’uburyo afunzwemo, ariko ngo ntiyemererwa kwivuza mu bwisanzure kuko ngo hari abantu yivuza bari kumwe ntabone uko yisanzura ku muganga, kandi ngo na nyuma yo kwivuza abo bantu batwara impapuro za muganga kuburyo atanabasha kuzibika ngo azigaragarize urukiko rubone ko arwaye. Yanavuze ko yangiwe kwambara umwenda w’imbeho kandi muganga yaramubwiye kuzajya yifubika.

Ibi yabihuriyeho n’umwunganira mu mategeko, Me Gatera Gashabana, wavuze ko ibanga ry’umurwayi n’umuganga ritubahirizwa kuri Mukangemanyi Adeline Rwigara, ndetse ngo muganga yamwandikiye ko agomba guhabwa ikiruhuko cy’uburwayi ariko ngo ntabwo amakuru y’iby’icyo kiruhuko bafite kuko ubuyobozi bwa gereza ari bwo bwabasha kubona impapuro zo kwa muganga. Mukangemanyi Adeline n’umwunganira, basabye ko iburanisha ryasubikwa kubera izo mpamvu ariko urukiko rukanategeka ko uregwa yakwivuza mu bwisanzure agahabwa ubuvuzi bukwiye.

Ku ruhande rwa Diane Rwigara, we yavuze ko yiteguye kuburana nta kibazo ariko Me Pierre Celestin Buhuru umwunganira we asobanurira urukiko ko Ubushinjacyaha butigeze bwinjiza imyanzuro yabwo mu ikoranabuhanga rikoreshwa n’urukiko bityo ko nibaburana ubushinjacyaha butagomba guhabwa ijambo.

Ubushinjacyaha buhawe ijambo, bwavuze ko uburwayi bwa Mukangemanyi Adeline Rwigara nta kimenyetso cya muganga kibugaragaza, ndetse ko batumva ukuntu yavuga ko atazi niba yarahawe ikiruhuko cy’uburwayi (Repos Medical) kandi ari we uburwayi bwe bureba. Bwasobanuye ko nta kimenyetso na kimwe muganga yigeze amuha kigaragaza ko uburwayi afite yabutewe n’uburyo afunzwemo, cyane ko kurwara ari ibisanzwe n’abadafunzwe barwara, ndetse ngo abacamanza n’abanyamategeko nabo bararwara ibyo birasanzwe. Ubushinjacyaha kandi bwashimangiye ko bwashyize imyanzuro mu ikoranabuhanga, batazi impamvu abaregwa batayibonye. Muri rusange, Ubushinjacyaha bwavuze ko impamvu zitangwa n;abaregwa zose nta shingiro zifite.

Me Gatera Gashabana wunganira Mukangemanyi Adeline Rwigara, yahise ahabwa ijambo maze avuga ko Ubushinjacyaha bwirengagiza kuba uregwa yavuze ko impapuro zo kwa muganga zibikwa n’abandi bantu kandi ko yivuza ari kumwe n’abo bantu, ndetse ko ubuyobozi bwa gereza bumujyana kwa muganga ibyo bubizi. Nyamara ubushinjacyaha buvuga ko abo bantu bamuherekeza nabo ari abaganga kandi ko ibyo batabibonamo ikibazo.

Nyuma yo kumva impaka z’ababuranyi, Inteko y’abacamanza yagiye kwiherera ngo ifate umwanzuro. Nyuma y’iminota hafi 40, Inteko y’abacamanza yatangaje imyanzuro ku nzitizi zatanzwe n’abaregwa. Ku kibazo cy’uburwayi bwa Mukangemanyi Adeline Rwigara, urukiko rwanzuye ko impapuro za muganga zatanzwe n’uregwa zitagaragaza ko ikibazo cy’uburwayi afite cyatuma ataburana. Ikibazo cy’uko imyanzuro y’Ubushinjacyaha itabonetse mu ikoranabuhanga rikoreshwa n’urukiko, nacyo ngo nta shingiro gifite kuko urukiko ruyibona muri iryo koranabuhanga. Urukiko rwahise rutegeka ko iburanisha rikomeza abaregwa basobanura ubujurire bwabo n’impamvu bashingiraho bajurira.

Kuwa Mbere tariki 23 Ukwakira 2017, nibwo mu rukiko rwisumbuye rwa Nyarugenge, hasomwe urubanza ku ifungwa n’ifungurwa ry’agateganyo, ruregwamo Mukangemanyi Adeline Rwigara, Uwamahoro Anne Rwigara na Diane Nshimiyimana Rwigara, umucamanza yemeza ko babiri mu baregwa bagomba gufungwa iminsi 30 y’agateganyo mu gihe iperereza rikomeje ngo hazabone gutangira kuburanisha urubanza mu mizi, naho umwe we asabirwa gufungurwa agakurikiranwa ari hanze.

Abacamanza bagaragaje ko Mukangemanyi Adeline Rwigara na Diane Nshimiyimana Rwigara, hari impamvu zikomeye zituma bakekwaho ibyaha bashinjwa n’Ubushinjacyaha kandi bakagaragaza ko ibisobanuro batanze bidafite ishingiro. Urukiko kandi rwagaragaje ko bashobora gutoroka cyangwa gusibanganya ibimenyetso. Byarangiye urukiko rutegetse ko aba bafungwa iminsi 30 y’agateganyo mu gihe iperereza rigikomeje.

Me Gatera Gashabana wunganira Mukangemanyi Adeline Rwigara, mu iburanisha ryo kuri uyu wa Kane yatangiye agaragaza ubujurire bw’uwo yunganira, ahereye ku kuba ngo urukiko rwisumbuye rwa Nyarugenge rwamuburanishije, rutari rubifitiye urubasha kuko atari rwo rukiko rwari hafi y’aho yafatiwe. Ibi mu rukiko rwisumbuye rwa Nyarugenge ruri i Nyamirambo, byari byagiweho impaka cyane ariko biza kurangira banzuye ko rubifitiye ububasha.

Me Gatera Gashabana kandi yavuze ko umucamanza mu rukiko rwisumbuye rwa Nyarugenge, rwirengagije ibiteganywa n’ingingo ya 23 mu Itegeko Nshinga, ivuga ko umuntu atagomba kuvogerwa, nyamara ngo abo mu muryango wo kwa Rwigara bo barasaswe hakinjirwa mu butumwa bwabo mu buryo ngo budakurikije amategeko.

Iyi ngingo ya 23 igira iti: "Imibereho bwite y’umuntu, iy’umuryango we, urugo rwe cyangwa ubutumwa yohererezanya n’abandi ntibishobora kuvogerwa mu buryo bunyuranyije n’amategeko; icyubahiro n’agaciro ke bigomba kubahirizwa. Urugo rw’umuntu ntiruvogerwa. Ntihashobora gukorwa isakwa mu rugo cyangwa kurwinjiramo kubera impamvu z’igenzura nyirarwo atabyemeye, keretse mu bihe no mu buryo biteganyijwe n’amategeko. Ibanga ry’amabaruwa n’iry’itumanaho ntirishobora kuzitirwa keretse mu bihe no mu buryo biteganywa n’amategeko."

Kuri Diane Rwigara, umwunganira Me Pierre Celestin Buhuru, yavuze ko ibyaha aregwa birimo icyo gukora no gukoresha impapuro mpimbano, urukiko rwisumbuye rwa Nyarugenge rwatinyutse kuvuga ko hari impamvu zikomeye zituma akekwaho icyo cyaha nyamara yaragaragaje ko atari we wigiraga gusinyisha abagombaga kumushyigikira ngo yemererwe kwiyamamaza. Diane Rwigara we ahawe ijambo, yongeye gushimangira ko icyo azira ari uko yashatse kwiyamamariza kuba Perezida w’u Rwanda, ngo ikigamijwe ni ukumucecekesha no kumukura mu ruhando rwa Politiki. Yavuze ko ibyo kuba hari ibintu yatangaje mu kiganiro n’abanyamakuru tariki 14 Kanama 2017, asanga nta cyaha kirimo kuko ahubwo muri icyo kiganiro ngo yagaragazaga ukuri kw’akarengane we n’abantu bari bamushyigikiye bakorerwaga, akanahamya ko yandikiye Polisi na Komisiyo y’amatora abasaba kubikurikirana ntasubizwe. Mu bisobanuro bye, ashimangira ko hari abari bamushyigikiye batotejwe bategekwa kuzamushinja ibyaha atakoze.

Ubushinjacyaha bwo mu kwisobanura kwabwo, muri rusange nta tandukaniro riri hagati y’ibyo bavuga n’ibyavugwaga n’Ubushinjacyaha mu rukiko rwisumbuye rwa Nyarugenge. SOMA INKURU IRAMBUYE HANO: Nyuma y’amasaha 9 yavuzwemo byinshi, urubanza rw’abo kwa Rwigara rwasubitswe

Nyuma y’impaka ndende, umucamanza yavuze ko tariki 21 Ugushyingo 2017 ku isaha ya saa cyenda z’igicamunsi, ari bwo hazasomwa imyanzuro ku bujurire bwa Mukangemanyi A,deline Rwigara na Diane Rwigara.


INKURU ZA :
Tanga Igitekerezo
Ibitekerezo 3
toto Kuya 17-11-2017

umugabombwa aseka imbohe!

njaou Kuya 16-11-2017

jya kubogosha

fif Kuya 16-11-2017

Konarinzi ko abagororwa babogosha nkaba mbona bano bafite frecher?

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...