konka coffee
KONKA

AMAKURU

UKWEZI

Imvugo zikarishye za Dr Leo. Munyakazi ujujubya abacamanza n’impamvu zikomeye zibimutera

Imvugo zikarishye za Dr Leo. Munyakazi ujujubya abacamanza n’impamvu zikomeye zibimutera
16-05-2017 saa 22:00' | By Vincent Nsengiyumva | Yasomwe n'abantu 10718 | Ibitekerezo 1

Dr. Leopold Munyakazi ushinjwa ibyaha bya Jenoside yakorewe abatutsi, yagiye agaragaza imyitwarire idasanzwe mu rukiko, aho yagiye akoresha amagambo akomeye rimwe na rimwe akababaza abashinjacyaha ndetse n’abacamanza bagize inteko imuburanisha. Mu gihe urubanza rwe rutararangira, bigaragara ko iyo agiye kuburana haba hitezwe amagambo akarishye n’ibikorwa bidasanzwe bishobora kumuranga mu rukiko.

Muri iyi nkuru, turagaruka ku magambo adasanzwe Dr Leopold Munyakazi yagiye atangaza mu rukiko, tunagaragaze isesengura ku mpamvu yaba ituma akomeza kwitwara mu buryo busa no gutinza urubanza rwe.

Yabwiye abashinjacyaha ko nta kinyabupfura bagira

Ubwo Dr. Leopard Munyakazi yagezwaga mu rukiko bwa mbere, agihabwa umwanya wo kugira icyo avuga yabwiye abashinjacyaha ko nta kinyabupfura bagira. Ibi Munyakazi yari abishingiye ku kuba batarashyize mu bikorwa ubusabe bwe bw’uko bazazana ibyuma bifata amajwi ibyo avuga byose bikajya bibikwa.

Dr Munyakazi yavuze ko adashaka gukomeza gufungirwa mu musarane kandi afite amazu meza muri Kigali

Uyu mugabo udatinya gukoresha amagambo akomeye cyangwa asesereza iyo arimo kuburana, ubwo yaburanishwaga mu rukiko rw’ibanze rwa Nyarugunga, ubwo yaburanishwaga ku bijyanye n’ifungwa n’ifungurwa ry’agateganyo. Icyo gihe yabajije abacamanza impamvu bashaka kumucumbikira mu mazu yise ko ari ubwiherero (imisarani) kandi ngo ari umuntu w’umugabo wifitiye amazu muri uyu mujyi wa Kigali kandi meza.

Yagize ati “[…] Ese bancumbikira mu musarane bate bazi ko nari mfite amazu abiri muri Rugenge, harimo imwe niguriye indi nkayiyubakira, ayo mazu sinyararemo kandi ari ayanjye…”

Munyakazi yanze gutanga umwirondoro we nyawo, abwira urukiko ko nibawukenera bazajya kuwushakira kuri paruwasi yabatirijwemo kandi ko we atabibabwira batamuhemba

Kuwa Kane tariki 23 Gashyantare 2017, ubwo yagezwaga imbere y’abacamanza mu rukiko rwisumbuye rwa Muhanga, Dr Leopold Munyakazi yagaragaje ko hari imbogamizi nyinshi afite zituma ataburana, harimo no kuba atazi abagiye kumuburanisha abo ari abo n’imyirondoro yabo, aha ninaho yabasabaga ko bamuha ibyangombwa byabo ngo anamenye niba koko ari abacamanza.

Mu bindi yavuze, ni uko umwirondoro watangajwe atari uwe, uretse amazina ye gusa n’ay’ababyeyi, bityo akavuga ko hashobora kuba habayeho kwibeshya ku wo bashaka kuburanisha, aha yashingiraga ahanini ku gihe cy’amavuko cyatangajwe mu mwirondoro we.

Ubwo yasabwaga gutanga umwirondoro we nyawo, Munyakazi yavuze ko atari akazi ke, agaragaza ko yaba ari kwivanga mu kazi k’abashinjacyaha maze ababwira ko ushaka imyirondoro ye azajya kuyireba muri paruwasi yabatirijwemo ya Kamonyi. Asabwe n’urukiko kuvuga umwirondoro we uw’ukuri kandi yashimangiye ko atawuvugira aho kuko bikwiye gukorwa hakoreshejwe ibitabo by’irangamimerere, ikindi bikanakorwa n’abantu babihemberwa kuko we abivuze nta wabimuhembera.

Dr. Munyakazi yanze kuburana ngo kuko mu rukiko hatarimo ifoto ya Perezida

Ubwo Dr Leopold Munyakazi yatangiraga kuburanishwa mu mizi ku byaha ashinjwa, yasabye urukiko rw’i Muhanga rwamuburanishaga ko rwamuha ibimenyetso by’uko aho aburanira ari mu rukiko kuko ngo atahabonaga ifoto ya Perezida wa Repubulika.

Icyumba cy’iburanisha yari agejejwemo, Dr Munyakazi yavuze ko nta birango bya Repubulika y’u Rwanda birimo, ko nta kirango cy’ubutabera kirimo uretse indangaminsi (Calendar) ariko nayo igaragaraho urukiko rw’ikirenga. Yavuze ko nta bendera ry’u Rwanda ririmo kandi nta n’ifoto ya Perezida wa Repubulika abonamo, bityo akavuga ko ntacyamwemeza ko aho bamuzanye ari mu rukiko.

Dr Munyakazi aburana akangana ko yaminuje, yigeze no kugira umujinya asohoka mu rukiko iburanisha ritararangira

Kuwa 3 Gicurasi 2017 ubwo yitabaga Urukiko rwisumbuye rwa Muhanga ngo akomeze yiregure ku byaha akurikiranweho bya Jenoside, Dr Munyakazi wagaragazaga uburakari n’imvugo ikarishye, yongeye gusabwa n’abacamanza kudakoresha amagambo akomeye mu rukiko, maze asubiza ko Ikinyarwanda akoresha akizi neza kuko agifitemo impamyabumenyi y’ikirenga (PhD) kandi akaba ari inzobere mu by’iyigandimi n’icengerandimi. Yavuze ko ufite ikibazo ku byo avuga nabyo yazabishyikiriza urukiko.

Uyu mugabo yaje guhita asaba umucamanza ko yakwisubirira aho afungiye ndetse bidatinze ahita asohoka mu rukiko aragenda ariko abacamanza bakomeza kuburanisha urubanza adahari, nyuma banzura ko ruzasubukurwa tariki 10 Gicurasi 2017.

Perezida w’Urukiko rwisumbuye rwa Muhanga, Udahemuka Adolphe, yakunze kumvikana yihaniza Dr Munyakazi kureka imyitwarire idahwitse mu rukiko aho kugirango uyu mugabo amwumve ahubwo bikarushaho gufata indi sura.

Ni izihe nyungu Dr Leopold Munyakazi yaba afite mu kurusha ubutabera no gutinza urubanza?

Dr. Munyakazi Léopold wirukanywe na Leta Zunze Ubumwe z’Amerika akazanwa mu Rwanda muri Nzeli umwaka wa 2016, yari yarahunze mu mwaka wa 2004 akurikiranyweho kugira uruhare muri Jenoside yakorewe Abatutsi mu 1994 mu karere ka Kamonyi yakomokagamo, mu cyahoze ari Komine Kayenzi. Ni inzobere mu by’iyigandimi n’icengerandimi ndetse afite impamyabumenyi y’ikirenga (PhD). Ibyo akora hari ushobora gutekereza ko ari ukuba ari umunyarwenya bisanzwe ariko hari umunyamategeko wanze ko dutangaza amazina ye kubera uruhare afite mu miburanishirize y’imanza nk’izi mu Rwanda, wadusobanuriye impamvu zikomeye abona uyu mugabo aruhanya agatinza urubanza rwe.

Impamvu ya mbere ikomeye, ijyanye no kuba yifuza gupfa yitwa umwere, bikazarinda byinshi umuryango we mu gihe kizaza. Dr. Munyakazi Léopold w’imyaka ikabakaba 67 y’amavuko, nta gushidikanya ko ageze mu za bukuru. Mu gihe yaramuka akomeje gutinza urubanza rwe akazagera ubwo apfa kubera izabukuru, yaba apfuye ari umwere kuko utarahamwa n’icyaha wese yitwa umwere. Ibi byatuma umuryango we utazagira ingaruka uhura nazo zo kwishyuzwa imitungo ishobora gucibwa uyu mukambwe, kuko nyine yaba yapfuye nta cyaha kiramuhama. Ikindi gikomeye, nta gisebo cyazigera kibajyaho cy’uko Dr Munyakazi yakoze Jenoside kuko nta rukiko rwaba rwaramuhamije icyaha.

Indi mpamvu ya kabiri Dr. Munyakazi Léopold yaba agerageza kurushya ubutabera no gutinza urubanza, ishingiye ku kuba byamufasha guca intege abatangabuhamya bamwe na bamwe bahora batumizwa mu rukiko urubanza rugahora rusubikwa, bityo bakazageraho bakananirwa bakabona ko bikomeza kubarushya cyane kwiruka ku byo gutanga ubuhamya bumushinja. Kubura bimwe mu bimenyetso bimushinja, byamufasha kuba hari ibyaha bitamuhama, akaba yaba umwere cyangwa ibyaha bimuhama bikagabanuka.


Tanga Igitekerezo
Ibitekerezo 1
k c Kuya 18-05-2017

uyu mugabo yamaze gutsinda urubanza ibisigaye naksrengane.

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA