konka coffee
KONKA

AMAKURU

UKWEZI

Ingaruka zikomeye zaterwa n’amatora ya Perezida mu Bufaransa ku mubano n’u Rwanda

Ingaruka zikomeye zaterwa n’amatora ya Perezida mu Bufaransa ku mubano n’u Rwanda
26-04-2017 saa 15:48' | By Chief Editor | Yasomwe n'abantu 14650 | Ibitekerezo 4

Kuva mu mpera z’umwaka ushize ubwo abacamanza b’Abafaransa batangazaga ko bagiye kongera gutangira iperereza ku waba yarahanuye indege ya Habyarimana Juvenal wahoze ari Perezida w’u Rwanda kandi bakagaragaza ko bazaha agaciro ubuhamya bwa Kayumba Nyamwasa utavuga rumwe n’Ubutegetsi bwa Perezida Kagame ndetse akaba anamushinja kuba ari we wabigizemo uruhare, umubano w’u Rwanda n’u Bufaransa wongeye kuzamba. Kugeza ubu ariko, mu gihe mu Bufaransa hateganywa amatora ya Perezida azasozwa muri uku kwezi kwa Gicurasi, hari ibimenyetso bigaragaza ko hari ingaruka zifatika azagira ku mubano w’u Rwanda n’u Bufaransa. Izi ngaruka, zishobora kuba nziza cyangwa zikaba mbi bitewe n’ibizava muri aya matora.

Perezida Paul Kagame aherutse gutangaza ko Abafaransa ari bo bakwiye kugezwa imbere y’ubutabera kubera uruhare bagize muri Jenoside yakorewe abatutsi. Ntawabura kuvuga ko ubu umubano w’ibihugu byombi utifashe neza, ndetse mu gihe cy’ubutegetsi bwa Perezida Francois Hollande nta ntambwe igaragara yatewe mu mibanire myiza y’ibihugu byombi.

Ubu mu Bufaransa hari inkundura y’amatora aho Emmanuel Macron ahanganye na Marine Le Pen bahatanira umwanya w’umukuru w’igihugu, nyuma y’icyiciro cya mbere cy’amatora, tariki 7 Gicurasi hakaba hazamenyekana uzayobora iki gihugu agasimbura Francois Hollande. Aba bose kugeza ubu bafite icyo basobanuye ku Rwanda, bitewe n’uzatsinda, hanashingiwe ku cyo u Rwanda n’u Bufaransa bisanzwe bipfa.

Emmanuel Macron aramutse atsinze amatora akaba Perezida w’u Bufaransa, hari ibyerekana ko byaba ari amahirwe y’izahuka ry’umubano w’u Rwanda n’u Bufaransa. Uyu mugabo w’imyaka 39 wakunze kugarukwaho cyane kubera ko afite umugore ukuze cyane w’imyaka 64, ni inkoramutima ya Nicolas Sarkozy wigeze kuba Perezida w’u Bufaransa, ndetse Sarkozy aherutse gutangaza ko amushyigikiye cyane muri aya matora.

Umubano w’u Rwanda n’u Bufaransa, uheruka kuba mwiza ku gihe cy’ubutegetsi bwa Perezida Nicolas Sarkozy. Tariki 27 Gashyantare 2015, Perezida Paul Kagame yagiye mu Bufaransa mu nama yari yateguwe na UNESCO, icyo gihe akaba nta muyobozi mukuru w’igihugu cy’u Bufaransa yabashije guhura na we, ahubwo yahuye anagirana ibiganiro n’uwahoze ari Perezida w’iki gihugu, Nicolas Sarkozy, utavuga rumwe n’ubutegetsi buriho muri iki gihugu, buhagarariwe na Perezida Francois Hollande.

JPEG - 54.8 kb

Ubwo Nicolas Sarkozy, hari intambwe yari imaze guterwa mu mibanire y’ibihugu byombi

Ubwo yabazwaga na Jeune Afrique impamvu yashatse guhura na we, Perezida Kagame yagaragaje ko ashima cyane uburyo Nicolas Sarkozy yari afite ubushake mu kunoza umubano w’ibihugu byombi. Perezida Kagame yagize ati: "Inshuti duhuriyeho zambwiye ko yabonekaga kandi ko dushobora guhura. Igihe yari akiri ku ntebe y’ubuyobozi, Sarkozy yagize ubushake n’ishyaka mu kugabanya ukutumvikana kwari hagati y’u Bufaransa n’u Rwanda. Nashakaga kongera kubimubwira, twabivuzeho byose, tuvuga ku ntera yari imaze guterwa..."

JPEG - 87.3 kb

Emmanuel Macron ni inshuti ya Nicolas Sarkozy

Umubano Macron na Sarkozy bafitanye, ushobora no gutuma bavuga rumwe ku mubano w’u Rwanda n’u Bufaransa, kuko Sarkozy ari we Perezida u Bufaransa bwagize mu myaka micye ishize, wabashije kugira ubushake mu kunoza umubano n’u Rwanda.

Ku rundi ruhande ariko, Marine Le Pen uhanganye na Emmanuel Macron, we aramutse atowe hari ibimenyetso simusiga bigaragaza ko umubano w’u Rwanda n’u Bufaransa wazamba kurushaho. Icya mbere gikomeye, Marine Le Pen ni umwe bagize Inteko Ishinga Amategeko y’u Burayi, kandi iyi nteko ntawashidikanya mu kuvuga ko ifitanye umubano mubi n’u Rwanda ndetse iherutse gutangaza ibintu byababaje cyane Guverinoma y’u Rwanda bikanamaganirwa kure n’Inteko Ishinga Amategeko y’u Rwanda.

Kuwa Kane tariki 6 Ukwakira 2016, nibwo abagize Inteko Ishinga Amategeko y’Ubumwe bw’ibihugu by’u Burayi, barimo n’uyu Marine Le Pen batangaje ko bashishikajwe cyane n’ikibazo cya Ingabire Victoire wakatiwe imyaka 15 y’igifungo ndetse bavuga ko babangamiwe n’ikibazo cy’abantu bafungwa bazira ko banenze ubutegetsi bw’u Rwanda.

Abadepite b’Inteko Ishinga Amategeko y’u Burayi, bavuze ko Ingabire wakatiwe gufungwa imyaka 15 azira ingengabitekerezo ya jenoside, gushaka guhungabanya umutekano w’igihugu no gufatanya n’imitwe y’iterabwoba, yaba yararenganye. Bavugaga ko Leta y’u Rwanda ikwiye kureba uko urubanza rwe rusubirwamo rukaburanishwa mu mucyo.

Bavuze kandi ko hari abantu babuzwa ubwisanzure mu kuvuga ibyo batekereza, hakiyongeraho gufungwa no gutotezwa kw’abatavuga rumwe n’ubutegetsi, abanyamakuru n’abandi bose banenga Guverinoma y’u Rwanda. Basaba ko Leta yakwimakaza amahame ya Demokarasi igezweho, idaheza kandi idakumira buri wese.

Ikindi cya kabiri gikomeye cyane kigaragaza ko Marine Le Pen aramutse abaye Perezida w’u Bufaransa, umubano wabwo n’u Rwanda wazamba, ni uko hari ibikorwa byo gupfobya no guhakana Jenoside yatangiye kugaragaza, bica amarenga ko yazanahakana yivuye inyuma uruhare rw’u Bufaransa muri Jenoside yakorewe abatutsi mu Rwanda.

JPEG - 115.3 kb

Marine Le Pen ari mu bakoze raporo yababaje cyane u Rwanda

Kuri uyu wa Kabiri tariki 25 Mata 2017, Perezida wa Israel; Reuven Rivlin, ari kumwe na Minisitiri we w’Intebe, Benjamin Netanyahu, mu muhango wo kwibuka abazize Jenoside yakorewe abayahudi, yavuze ko yababajwe cyane n’amagambo yavuzwe na Marine Le Pen wiyamamariza kuba Perezida w’u Bufaransa. Uyu mugore, tariki 9 Mata 2017, yahakanye uruhare rw’u Bufaransa muri Jenoside yakorewe abayahudi, ndetse anavuga ko u Bufaransa ari igihugu kitigeze kishora mu bwicanyi bwa Jenoside. Ibi byababaje cyane Israel, kuko aba Perezida bose bayoboye u Bufaransa batigeze bahakana uruhare rwabwo mu ntambara ya kabiri y’isi yose ndetse na Jenoside yakorewe abayahudi muri icyo gihe cy’iyo ntambara.

JPEG - 64.1 kb

Abategetsi ba Israel bunamira abazize Jenoside yakorewe abayahudi, bagaye cyane Marine Le Pen

Guhakana Jenoside yakorewe abayahudi no kuvuga ko u Bufaransa butigeze mu mateka bugira uruhare mu bikorwa bya Jenoside, bishobora kwerekana aho Marine Le Pen ahagaze mu bijyanye no kuba u Bufaransa bushinjwa n’u Rwanda uruhare rufatika muri Jenoside yakorewe abatutsi, ibintu byazatuma uyu mugore abaye Perezida w’u Bufaransa bigorana kumvikana n’u Rwanda.

NB: Iyi nyandiko ni isesengura n’ibitekerezo bwite by’umwanditsi


INKURU ZA :
Tanga Igitekerezo
Ibitekerezo 4
Janvier NT Kuya 27-04-2017

Ariko nk’ubu uba ushatse kuvuga iki koko iyo uvuze ngo Abahutu n’Abatutsi barakindugarana bapfa have mpage!!!! Ubu abari mu nzibutso hirya no hino mu gihugu ni hehe bari bari kuburyo bicwa urwagashinyaguro ngo barashaka kujya mu myanya barimwo!!!Abatutsi biberaga mu byaro abandi bari mu mirimo yo kwirwanaho ngo barebe ko abana ba bo babona icyo kurya abo biciwe iki? Biratangaje kandi birababaje iyo ikoze statment nk’iriya gusa bihita byerekana imyumvire ya we aho iherereye nuko ingana.

gd Kuya 26-04-2017

No Chance with her.

Kato Kuya 26-04-2017

Abadage bishe abayahudi naho abanyarwanda bishe abandi banyarwanda maze abahutu n abatutsi barakindagurana bapfa have mpajye. Iby abayahudi ntaho bihuriye ni by abanyarwanda bahora batikuranira ubutegetsi.

Ngango Kuya 26-04-2017

Abanyarwanda baravugaga ngoi Burundi si i Bugoyi. Mu Bufaransa si mu Rwanda.

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...