konka coffee
KONKA

AMAKURU

UKWEZI

Ingona zije imusozi zikajya muri Nyabugogo no mu mujyi zo zakanga abazunguzayi?

Ingona zije imusozi zikajya muri Nyabugogo no mu mujyi zo zakanga abazunguzayi?
24-08-2017 saa 12:45' | By Chief Editor | Yasomwe n'abantu 12031 | Ibitekerezo 5

Kigali, umujyi mwiza usukuye kandi urangwa n’isuku, Kigali umurwa w’u Rwanda ukundwa na benshi kuburyo n’uwo mu byaro bya kure arota kuhaba n’iyo yahasonzera, Kigali yabanye ngari abatari bacye bayisiragiramo bashaka ubuzima ariko n’uwaburaye akarahira ko atazigera ayivamo, uyu ni umujyi koko ukomeje kuvugwa henshi kandi kenshi kubera impamvu zitandukanye, mu bashaka kuwuvugaho nanjye ndumva ntabura byinshi nsangiza abazi uyu mujyi n’abawumva batarahakandagiza ikirenge cyangwa abawitiranya. Nteruye mvuga iby’uyu mujyi sinarasa ku ntego ngo mpite mvuga ku by’ingona n’abazunguzayi nahereyeho hejuru, n’ubwo hari uwakumva ko ntaho bihuriye nyamara ndagaruka ku cyo bihuriyeho gikomeye.

Ingona n’abazunguzayi nabimburiyeho nandika umutwe w’iyi nyandiko yanjye ishingiye ku bitekerezo bwite nk’umwanditsi, mu by’ukuri mu buzima busanzwe ntaho bihuriye ariko mu nyandiko yanjye nasanze bifitanye isano, kuko muri iyi minsi byombi byabaye ikibazo cyahangayikishije Umujyi wa Kigali kinavugisha abatari bacye, haba mu buyobozi no mu baturage barimo abo kireba mu buryo bw’ako kanya cyangwa abo kiraje ishinga nk’abanyarwanda bakunda igihugu cyabo n’abagituye.

Hashize igihe gito, ingona zo mu mugezi wa Nyabarongo zirya abantu baturiye uru ruzi bajya bavuga ko rwica urwizaniye, ndetse hari n’abataratinye kuvuga ko n’ingona zirurimo zica uzizaniye, kuko abahegera bazi neza ko baba barimo gusuhuzanya n’urupfu, n’ubwo wasanga zitica uzizaniye ahubwo zica uwabuze uko agira akemera kuba aka wa mugani w’inyoni yaritse ku nzira igira iti: "Napfa nakira simbizi".

Ubuyobozi bw’Umujyi wa Kigali cyane cyane mu karere ka Nyarugenge gaturiye Nyabarongo, nabashimiye ukuntu babadukanye imbaraga bagahita batangira kwegereza abaturage amazi meza, kugirango abajyaga baribwa n’ingona bagiye kuvoma bagabanuke, ibyo kuba bitazongera byo sinabihamya mu gihe nzi ko abahira ubwatsi, abaroba n’abandi bashaka imibereho nabo nibajyamo zitazabarebera izuba.

Ubuyobozi bw’akarere ka Nyarugenge n’ubw’umujyi wa Kigali muri rusange, bwagiye butangariza abanyamakuru ko abaturage baribwa n’ingona bagiye kuvoma, ari bamwe batinya kujya kuvoma kure bakemera kwiyahura muri Nyabarongo aho bajya kuraruza bya birohwa bitajya binacya ngo bibe urubogobogo. Cyakoze aha nahise numva ngiriye impuhwe ubuyobozi kuko nibutse ko bwugarijwe n’ibindi bibazo byababanye urusobe, bagahora barahira ko bazabikemura burundu ariko uko babirwanya ukabona niko birushaho kwigaragaza no kwerekana indi sura. Muri ibyo nahise nibuka iby’abazunguzayi bimaze imyaka n’imyaniko, umunyarwenya umwe we aherutse kumbwira ko uko abazunguzayi bamwe babireka ari ko havuka abandi benshi...

Umujyi wa Kigali rero ubu noneho wafashe gahunda yo guca burundu abazunguzayi, ndetse biyemeje gufatanya n’inzego nkuru z’umutekano mu gihugu, cyane cyane Polisi y’igihugu. Umujyi wa Kigali ugaragaza ko abazunguzayi ari ikibazo gikomeye ariko nanjye mbona giteye inkeke, n’ubwo atari cyo cyonyine kiwukomereye kuko hari ibindi byinshi biteye inkeke kurushaho birimo n’ibitera ubwo buzunguzayi.

Ngarutse gato kuri za ngona za Nyabarongo, hari abaturage baherutse kuvuga ko bazitinya cyane ariko babura amazi bibashobeye bakemera kujya gushaka amazi mu ngona nako muri Nyabarongo... Ibi nabihuje n’abazunguzayi babiri, bombi b’abagore, duherutse guhurira ku Muhima bahetse abana banikoreye agataro k’imbuto, ntangazwa n’uko bari baniziritse igitenge ku kaguru, banambaye ikindi. Narababajije bambwira ko iyo babirukankanye, akenshi bamena hasi ibyo bikoreye hanyuma hagira ubafata imyenda bakayikuramo bakayibasigira, bagahita bambara bya bitenge baba bahambiriye ku kaguru, ku gice cyegeranye n’amatako hejuru gato y’amavi.

Mu kiganiro cy’iminota nka 15 twagiranye, bangaragarije ko buri munsi bava mu rugo biteguye ko bashobora kuza kugaruka cyangwa ntibagaruke, kuburyo n’ufite umwana wiga amubwira uko aza kubigenza nava ku ishuri ntahamusange yanategereza bukaza kwira ataraza, akanamubwira uko azabyitwaramo kandi ko adakwiye guhangayika kundi, ko azategereza akarekurwa kuko ubwo bazaba bamutwaye mu nzererezi n’abandi bakora ibitera akajagari mu mujyi wa Kigali.

Nabaye nk’urakarira aba bagore nabonaga bakiri na bato, nkumva badakwiye kubaho gutyo bakora ibitemewe babizi kandi babona ko amaherezo yabyo bizabagiraho ingaruka, badasize n’imiryango yabo. Babonye ntabyumva bambwiye ko agahwa kari ku wundi gahandurika, kuko batajya batekereza ahazaza habo ahubwo babara ubukeye, aka wa muhanzi ngo kuramba ni ukuramuka iby’ejo bibara ab’ejo. Numvise ntanyuzwe, kuko nabonaga bakwiye gushaka ibindi bakora bakareka ubwo buzima bw’imihangayiko.

Ibi ariko naje kubisobanurirwa na bagenzi babo, mu gitondo cyo kuri uyu wa Kane tariki 24 Kanama 2017, nyuma y’amasaha macye ubuyobozi bw’umujyi wa Kigali butangaje ko bugiye kwitabaza Polisi y’igihugu n’ingabo mu kurwanya ubu bucuruzi bw’akajagari. Hari mu gitondo mu masaha ya saa tatu n’iminota nka 40, nahuye n’abazunguzayi bane barimo abasore babiri babunzaga imyenda, umwe wacuruzaga ibikoresho byo ku meza birimo amasahane n’amakanya, hamwe n’umugore wari wikoreye agataro k’imbuto. Hari haruguru y’ahazwi nko kwa Mutangana, buri umwe nta gahunda yari afitanye n’undi ariko bari kumwe kuko aho bari bageze hari hari abantu benshi bashishikarizaga ko babagurira.

Nahise ntangara, numvaga ko byibuze bagiye kuba bahagaritse ubwo bucuruzi kuko bumvise ko bafatiwe ingamba n’Umujyi wa Kigali, maze ndababaza nti: "Ariko mwe ntimujya mukurikira amakuru? Ntimwamenye ko Leta yabahagurukiye ndetse ko na Polisi igiye kuzajya ibafata?... Ntimunabona ko aha muri ari hafi y’ibiro bya Polisi hano haruguru ku Muhima"

Aba bazunguzayi bose basekeye icyarimwe, bangaragariza ko rwose kuva na mbere hose batigeze boroherwa, bambwira ko hari abanyerondo bagiye babakubita abandi bakabambura ibyabo ariko bugacya babisubiramo. Uwo mugore wari wikoreye agataro we ati: "Tuzabakizwa n’iki se ubundi tubayeho? Ngo abapolisi? Nonese ahubwo ayo mahirwe twayakura he ko wenda nta mupolisi wanyambika ubusa cyangwa ngo ibyo nacuruzaga abinyambure abitware? Abo bapolisi se ubwo... azanjyana wenda bamfunge iminsi micye nibanankubita ntibazageza aha DASSO n’abanyerondo ariko ningaruka nzongera ncuruze, aho gukubitwa nibye ngo ngaburire abana nzemera nkubitwe ncuruza ntawuzanseka"

Numiwe, naguye mu kantu ndetse numva mbabariye ubuyobozi bw’Umujyi wa Kigali ariko n’aba bazunguzayi numva banteye agahinda, wa mugani numva ko ari ka gahwa kari ku wundi kadahandurika! Nahise nkoma agatima rero kuri za ngona zirya abantu muri Nyabarongo bagiye kuvoma amazi, ndavuga nti ko babura uko bagira bakajya kuvoma, aba nabo bakemera kujya gucuruza bazi ingaruka bazahura nazo, ubu koko aba bazunguzayi icyo bashobora gutinya ni iki? Za ngona zishoboye kugera imusozi zo zabakanga se niba zitanakanga abashaka amazi y’ibirohwa...?

Nyuma yo gutekereza cyane ariko naje kugira igitekerezo, numva cyazasuzumwa neza n’ubuyobozi bw’umujyi wa Kigali, cyane ko nk’uko nabivuze haruguru nishimiye uburyo bakomeje guha amazi abaturiye Nyabarongo ngo batazaribwa n’ingona bagiye kuvoma... Bagize neza kuko kuvuga ngo barababuza kuvoma muri Nyabarongo batabakuriyeho ikibazo gituma bajyayo, byari kumera ahari nko kubuza umuzunguzayi gucuruza udasuzumye impamvu acuruza mu kajagari...

Ese abazunguzayi kuki bababuza gucuruza mu kajagari bakanga? Ubuzunguzayi se ababukora ni uko basuzugura? Ni uko se ari ubuzima bwiza cyane baba babushakamo bakamera nka bamwe barara amajoro bacukura amabuye y’agaciro bazi ko ibirombe bishobora kubagwira? Cyangwa hari imibereho ituma babura uko bagira bakamera nk’abiyahura?

Igisubizo nihaye maze kwibaza ibyo bibazo, ni uko abazunguzayi atari abanebwe kuko bemera kuvunika bagakora akazi katoroshye n’ubwo katemewe. Ikindi abazunguzayi ntabwo ari abantu badashobotse kurusha abanywa n’abacuruza urumogi, ntibarusha abajura, indaya n’abandi barangwa n’urugomo, bityo bashobora gushakirwa umuti ariko kubirukana byo ntibizigera byoroha, kereka igihe abakora ubuzunguzayi bose bazaba bashakiwe uburyo buboroheye, bujyanye n’ubushobozi bafite ndetse n’ibibazo bafite, bakavanwa ku neza mu bucuruzi bw’akajagari kuko bazaba babona hari ukundi babaho batabukoze!

IZINDI NKURU BIJYANYE HANO:


Tanga Igitekerezo
Ibitekerezo 5
JONO Kuya 28-08-2017

leta yulwanda ndabizine zakonta nakimwe idasho boye niba bafashe kuko ntabwo abazu nguzayi baluta abasaza balimuli,ikigihugu,bahabwa ingoboka.

noa Kuya 27-08-2017

cngz Ku munyamakuru wakoze iyi nkuru, iracukumbuye kandi irimo isomo. abayobozi bakuramo byinshi byabafasha kubujyanye nabazunguzaji

Masumbuko Kuya 25-08-2017

Iyi nkuru inkoze k’umutima abazunguzayi babihorere sibo kibazo dufite kurusha abandi. Ese ubundi Leta ibafunze bose yabasha kubatunga n’imiryango yabo?

Eco Kuya 25-08-2017

Bavandimwe reka duhugurane gato; Wari uziko umubare w’ibiremwa ibyo aribyo byose iyo ari mwinshi bikabije cg muke ahantu runaka, biteza ikibazo? Muribuka mu myaka ishize igihe imibu yabaga myinshi cyane mu majyepfo? Uzi ikibazo cy’inkwavu cg injangwe nyinshi muri Australia? Uzi kera ubwo muri USA bagabanyaga ibirura? Uzi nk’ubu uwamara amasazi yose ku isi uko byagenda? Muri ECOLOGY iyo "Food Chain/ Chaine Alimentaire" ihungabanye biteza ikibazo nka kiriya cy’ingona dufite hariya. Ikibazo dufite nuko hariya ziri ari nyinshi bikabije cyane, kandi ibisanzwe bizitunga bikaba byo bitariyongereye!
Buriya ntiwatangara nyuma y’igihe tubonye ingona munsi y’ikiraro cya Nyabugogo cg Ruriba...

luka Kuya 24-08-2017

Ingona rero ziba zipoweye hari Radibii yazishyize kuko ngo burya ziranahenda ku isoko ry’imigabane ubwo rero niba uzi ko uri ifunguro ry’ingona wikwigora ujyayo
Aka gakuru ni sawa

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...