konka coffee
KONKA

AMAKURU

UKWEZI

Inkomoko y’amafaranga ya FPR, uko yambitse Twagiramungu, Minisitiri wayibye n’ibindi

Inkomoko y’amafaranga ya FPR, uko yambitse Twagiramungu, Minisitiri wayibye n’ibindi
25-06-2017 saa 23:37' | By Chief Editor | Yasomwe n'abantu 9956 | Ibitekerezo 8

Ubwo yari mu kiganiro kuri Radiyo ya Televiziyo y’u Rwanda, Perezida Paul Kagame yagarutse ku by’abanenga FPR ngo yinjiye mu bucuruzi, agaragaza ishusho nyayo y’uko byari byifashe nyuma yo kubohora u Rwanda, uburyo abo FPR yafashije bamwe bayivuga nabi abandi bakaba baranayibye n’ibindi byinshi byerekana ishusho y’intambwe idasanzwe yatewe.

Ubwo yagarukaga kuri ibi, Umukuru w’igihugu yageraga aho agaseka, akagaragaza ko aho u Rwanda rwavuye ubu nawe ahareba akabona ko ari kure. Perezida Kagame ati: “Ndibuka guverinoma ya mbere twagize mu gihe twageragezaga kwisuganya muri Nyakanga 1994, ndi kugerageza kubyibuka neza uko byari bimeze ariko ndatekereza ko, ndumva mu nshingano nari nahawe, naratiye ikote cyangwa se kositimu... (Aseka)”

Perezida Kagame yagaragaje uburyo mu byambere byakozwe mu gihe cy’urugamba rwo kubohora u Rwanda, harimo gukusanya imisanzu y’abari bashyigikiye FPR Inkotanyi, kandi amafaranga y’imisanzu akaba ari nayo ubuyobozi bushya bw’igihugu bwahereyeho mu kubaka ibyari byarangiritse badafite ikindi baheraho.

Yagize ati: “Muri macye icyo twakoze, icyo gihe twajyaga dukusanya imisanzu mu banyarwanda hirya no hino kugirango tubashe gukora icyo twari twiyemeje, mu byo twakoze mbere harimo gushaka abadushyigikira. Ubwo urugamba rwasaga n’urugeze ku musozo, twari tugifite kuri ubwo bushobozi, amafaranga yari aya FPR... Bamwe muri mwe mwumvise bavuga iby’uko FPR yakoze ubucuruzi (Business), bamwe batekereza ko ari bibi kuba byarakozwe ariko inkomoko y’ayo mafaranga amakompanyi ya FPR yagiye akoresha ishoramari, ni ay’icyo gihe... Gusa ibyo nashakaga kuvugaho si ibyo, ahubwo nashakaga kubabwira ko tumaze gufata inshingano, nta kindi cyari gihari.”

Umukuru w’igihugu, avuga ko nta n’ahantu abaturage bashoboraga kugura isabune cyangwa umunyu, ariko amafaranga yakoreshejwe ngo byongere kugerwaho akaba ari ayo FPR yari yarakuye mu misanzu y’abari bayishyigikiye. Yagize ati: “Nta n’amaduka yari ahari, habe n’utubutiki dusanzwe tugurisha amasabune... Icyo twakoze, twasabye bamwe mu banyarwanda bari bazi neza aka karere, twabahaye igice kimwe cy’ayo mafaranga, turababwira tuti mujye mu Burundi, mujye muri Uganda, abandi mujye muri Tanzania, abandi muri Kenya, mugure ibyo bintu; amasabune, umunyu, peteroli n’ibindi bintu nk’ibyo, ibintu gusa byo gukoresha mu buzima bwa buri munsi. Ni uko twatangiye ubuzima, umuntu ntiyashoboraga no kubona peteroli ngo acane agatadowa…”

Yakomeje agira ati: “Murumva abo bantu baragiye bazana ibyo bintu babishyira mu maduka, ayo ni amafaranga yavuye mu misanzu y’abari bashyigikiye FPR. Ikindi gice cy’ayo mafaranga, ni icyo twashoye mu bindi bintu. Reka nanababwire ko mu 1998, ni nyuma y’imyaka ine ubwo, iyi MTN mubona ikoresha ibya telefone, yazanywe na FPR, nabwo kandi ni muri ayo mafaranga twakoresheje mu kugura imigabane muri MTN, yo yari yabanje kwanga kuza mu Rwanda, bati ni gute dushora amafaranga muri iki gihugu kimeze gutya? Natwe turababwira tuti, turashaka gufatanya namwe urwo rugamba (Risks), icyo gihe twaguze 51% by’imigabane, bo bari bafite 49%, turangije tubaha no kubicunga… Hari bamwe muzumva bababwira, ngo ni gute ishyaka rya Politiki rikora ubucuruzi, ni gute Guverinoma ijya mu bucuruzi… Ibyo byose ni umwanda, ntimukabyumve. Ni gute? Ni uko nyine, kandi uko kuntu si ibijyanye no kuvuga ngo mu buryo bwa tekinike ni gute bikorwa, ahubwo ni ukuvuga ko ari uko bikorwa mu gihe ari byo bikenewe.”

Umukuru w’igihugu, yanagarutse kuri bamwe mu batuka abayobozi bakuru b’igihugu cyangwa FPR Inkotanyi, nyamara barafashijwe byinshi n’amafaranga yayo barangiza bakanayihemukira. Yagize ati: “Bamwe muri aba bantu mubona badutuka, muri guverinoma ya mbere nyuma ya Jenoside, Minisitiri w’Intebe wa mbere, uyu mugabo uba mu Bubiligi (Twagiramungu Faustin), utagira ikintu cyiza na kimwe atuvugaho, na kositimu ya mbere yambaye, yari yaraguzwe muri ayo mafaranga y’imisanzu y’abari bashyigikiye FPR. N’umuntu wa mbere hano witwaga Jean Marie Vianney Ndagijimana, wabaye Minisitiri w’Ububanyi n’amahanga, uriya we uretse kuba yaragiriwe akamaro n’ayo mafaranga, we ahubwo yaranayibye. Umunsi umwe yagiye, ndumva yarahawe amadolari 200.000, ngo agende atangire afungure za ambasade, ayo nayo yari muri ayo mafaranga. Uwo mugabo yaragiye, agumana n’ayo mafaranga, sinzi icyo yamugejejeho, gusa nta byinshi mbona afite… Ndimo kugerageza kubereka mu buryo bufatika, ko uko wakora ikintu kose utabikoze mu buryo bunyuranyije n’amategeko kandi kigatanga umusaruro…”

Perezida Paul Kagame arongera ati: “Ubwo ndashaka kuvuga kuri bamwe bavuga ngo FPR yinjiye mu bucuruzi, ndimo ndabereka uko twahereye ku busa. Ikindi kintu nababwira, abasirikare ba RDF ubungubu, bahoze bitwa aba RPA, nta mushahara bigeze babona kugeza mu 1996, batangiye guhembwa nyuma y’imyaka ibiri kuko nta mafaranga yari ahari mbere… Twagiraga ikibazo wenda ku bandi twakoranaga, ariko abo barwanyi ba FPR bo twicaye hamwe, turababwira tuti tumaze imyaka ine mu mashyamba turwana, twigeze tubona imishahara? Mureke tuvuge ko n’ubundi tutaragera muri guverinoma, tubifate nk’aho tukiri mu ishyamba, dukomeze turwane… Abantu batondaga umurongo bagahabwa iposho, ukajya ku murongo bakaguha ibiro bibiri by’impungure, hanyuma n’ibishyimbo, bakagenda bakabivanga, bakabiteka ubundi ukagenda ukamara ukwezi…”

Perezida Kagame yagaragaje ko ibyabayeho ari ukwitanga gukomeye no gutekereza mu buryo budasanzwe, kandi yerekana ko umusaruro ufatika wavuyemo ugaragara. Yagize ati: “Habayeho kwitanga kwinshi ariko hejuru ya byose habagaho iyo mitekerereze irenze isanzwe, ukumva ko niba utangiye kwishyura abasirikare, unareba ko hari amafaranga, ariko nta mafaranga yari ahari… Nyuma twatangiye kubona ibyangombwa by’ibanze, ubukungu butangira kuzahuka, abacuruzi batangira kugura ibintu no kugurisha ibindi, nyuma dutangira uburyo bwo gukusanya amafaranga macye mu misoro, ingengo y’imari yacu ya mbere, ndumva hari mu 1995, yari miliyari 56 z’amanyarwanda, ugereranyije n’ubu, irarenga tiriyari ebyiri z’amanyarwanda (yiyongereyeho arenga 1100%)”


INKURU ZA :
Tanga Igitekerezo
Ibitekerezo 8
Dinezol Kuya 27-06-2017

Bravo Inkotanyi

Munyembabazi Diogene Kuya 27-06-2017

igihe RPF yabohoraga igihugu nari Mu misozi ya byumba ahagenzurwaga nayo,ndabyibuka ubuzima wabonaga utazi iyo buzerekera,wabonaga ingabo zifite umurava,nta kunyu,nta gasabune,nta soko byahabaga ariko bakoraga uko bashoboye tukagira ubuzima bwiza kugeza igihugu kibohojwe cyose.ibyo HE avuga nibyo,RPF yarakoze kandi iracyakora,izanakomeza ikore kuko imbaraga zariho icyo gihe zimaze kwikuba inshuro zitabarika,utabona ibyo,udashima ibyo,utasigasira ibyo sinzi uko nye namwita.u Rwanda rugeze heza habereye buri wese.

Niyibiruta Venuste Kuya 27-06-2017

Nimureke twiyubakire urwatubyaye!

Ndayishimiye Ephrem Kuya 27-06-2017

Erega uRwanda ni uRwabanyarwanda,dukomeze tubiharanire( kuba abo turibo) nabaturwanya bazicwa n’ibimwaro batugarukire ariko bashatse bareka kwikerereza . bakatwisunga tukajyana mwiterambere. Kandi amahitamo twahisemo dukomeze tuyabungabunge .

uwayo Kuya 26-06-2017

kwambara ikoti waguriwe ndumva nta kibazo kirimo cyane ko FPR urugamba yarwanaga ruri mubyatumye Twagiramungu asahurwa aranatwikirwa naho ubundi nta muntu utakwigurira ikoti wakwandikwa mu masezerano ya Arusha ngo ahabwe umwanya ukomeye wo kuyobora government

Kyamuhitira Kuya 26-06-2017

FPR Oyeeeeeeeeeeeee! !!!!!!!

K Kuya 26-06-2017

Kuba RPF yacuruza nta kibazo jye mbibonamo; nonese ko ndimo kubona hari ibintu irimo gushyira ku murongo byari byarananiye abandi abacuruzi…? (Izacuruze nayibwira iki, ipfa kutwihera akazi)
NB; na PL itangiye gushora imali, hari hotel bafite ku mazi muri Rutsiro. PSD, GREEN-PARTY,…, zo ndumva nta na Boutique zazo nzi.

dada Kuya 26-06-2017

Ntawashimish’abantu 100% ariko mubyukuri kugirango urwanda rube rugeze kuriyi ntera,ingabo zurwanda zemeye kubabazwa.ntacyo umuntu ashobora kugeraho atababaye.FPR songambere nubucurizi abafite ibitekerezo bizima barabona umusaruro uvamubucuruzi.Abavugabo bazavuba baruhe.

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...