konka coffee
KONKA

AMAKURU

UKWEZI

Ishyaka UDPR ryavuze ibigwi Umuryango RPF Inkotanyi wizihiza Isabukuru y’imyaka 30

Ishyaka UDPR ryavuze ibigwi Umuryango RPF Inkotanyi wizihiza Isabukuru  y’imyaka 30
11-12-2017 saa 15:04' | By Akayezu Jean de Dieu | Yasomwe n'abantu 652 | Ibitekerezo

Ubuyobozi bw’Ishyaka Riharanira Ubumwe bw’Abanyarwanda na Demokarasi (UDPR) bwavuze ko hari byinshi biriteye ishema ryo kuvuga ibigwi by’Umuryango RPF Inkotanyi muri iki gihe hizihizwa imyaka 30 umaze ubayeho.

Mu itangazo rigenewe abanyamakuru iri shyaka rya UDPR ryasohoye mu rwego rwo kwifuriza RPF Inkotanyi isabukuru nziza, ryavuze ko rishishikariza abayoboke baryo n’inshuti zabo kwifatanya n’Umuryango RPF Inkotanyi mu kwishimira iyi sabukuru.

Iryo tangazo ryashyizweho umukono na Perezida wa UDPR, Nizeyimana Pie, rigira riti "Muri iki gihe Umuryango FPR-Inkotanyi wizihiza isabukuru y’imyaka 30 umaze uvutse kuva 1987-2017, Ubuyobozi bw’Ishyaka Riharanira Ubumwe bw’Abanyarwanda na Demokarasi (UDPR), burashishikariza Abayoboke baryo n’Inshuti zabo kwifatanya n’Umuryango FPR-Inkotanyi kwishimira ibyiza twagezeho tubikesha imiyoborere myiza ya Chairman w’Umryango Nyakubahwa Paul Kagame."

Muri iri tangazo kandi UDPR ikomeza igaragaza ko hari byinshi biteye ishema ryo kuvuga ibigwi by’indashyikirwa Umuryango RPR-Inkotanyi umaze kugeraho harimo kuba utarigeze utinya aho rukomeye ubwo wiyemezaga kubohora igihugu cyari mu icuraburindi ryo kuvangura abanyarwanda, kudasangira ibyiza by’Igihugu, kwikubira ubutegetsi no kuvutsa abana b’u Rwanda uburenganzira bwa muntu.

UDPR ikomeza ivuga kandi ko Umuryango FPR-Inkotanyi wakuyeho ubutegetsi bubi, uhagarika Jenoside yakorewe Abatutsi mu 1994, urokora benshi mu bacitse ku icumu rya Jenoside yakorewe Abatutsi, ucyura impunzi n’ibindi byinshi umaze kugeza ku banyarwanda na Afurika muri rusange.

UDPR igaruka ku kuba FPR-Inkotanyi ari intwari y’intajorwa aho ivuga ko ibikorwa byayo biteye abanyarwanda ishema n’isheja kandi byahuruje amahanga ayoberwa ibanga ry’abanyarwanda nyamara nta rindi ni ’Ndi Umunyarwanda’, kurwanya Jenoside aho iva ikagera, guha Umunyarwanda wese ijambo, kurwanya ruswa, guteza imbere uburezi kuri bose, guteza imbere imiyoborere myiza n’ubukungu birangwa mo umutekano, ihame ry’uburinganire bw’abagabo n’abagore no kwita ku bantu babana n’ubumuga.

Ishyaka UDPR ni rimwe mu mashyaka 8 yemerewe gukorera mu Rwanda yifatanije n’Umuryango RPF Inkotanyi ndetse agashyigikira Umukandida w’uyu muryango mu matora aherutse kuba mu ntangiro z’ukwezi kwa Kanama uyu mwaka.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...