konka coffee
KONKA

AMAKURU

UKWEZI

Kagame yanenze Abaminisitiri bakorana batavugana, bamwe abasaba ko banashaka ibinini

Kagame yanenze Abaminisitiri bakorana batavugana, bamwe abasaba ko banashaka ibinini
31-08-2017 saa 17:21' | By Vincent Nsengiyumva | Yasomwe n'abantu 8306 | Ibitekerezo

Perezida Kagame yanenze imikorere ya bamwe mu ba Minisitiri bagiye gukomeza gufatanya muri guverinoma nshya, ababwira ko imikorere yabaranze mu bihe bishize bagomba kuyihindura mu maguru mashya ngo kuko Minisiteri bayoboye zagiye zigaragaramo amakosa atandukanye kandi adakwiye kwihanganirwa.Hari n’abo yasabye gushaka ibinini bakivura kuko abona ari nk’icyorezo cyabibasiye.

Umukuru w’Igihugu avuga ko mu baminisitiri harimo ikibazo gikomeye kijyanye n’uko ibyo baba baganiriye mu nama zitandukanye ndetse no mu myiherero bakora batabiha agaciro kuko batabikurikiza.

Avuga ko igitangaje ibituzuzwa ari ibiba byoroshye kandi ugasanga ari nabyo bigira ingaruka zikomeye bitewe n’uburyo igihugu cyacu gifite umwihariko wacyo.

Yavuze ko hari Minisiteri ziba zifite abayobozi bayobora Minisiteri imwe, bakorera mu nzu imwe ariko batavugana.Aha yibajije uburyo abayobozi nk’aba bakora inshingano bate mu gihe badakorera hamwe.

Yagize ati "Minisiteri imwe ugasanga irimo aba Minisitiri batatu (ni ukuvuga Minisitiri n’Abanyamabanga ba Leta) mukaba muri aho ugasanga ukwezi, amezi atandatu,umwaka barasa nk’aho badakorana, no kuvugana bikaba ari ikibazo."

"Bari mu nzu imwe, bayobora minisiteri imwe, ariko ubwo rero birumvikana. Ba baminisitiri batavugana, ubwo abaminisitiri bavugana n’abakozi babo? Ubwo se imirimo ikwiriye kuba ikorwa, yuzuzwa n’iyo minisiteri, ubwo irakorwa?”

Umukuru w’igihugu yavuze ko atari ubwa mbere cyangwa se ubwa kabiri agaruka ku bibazo nk’ibi ngo kuko nta nama cyangwa umwiherero w’abayobozi bakuru atabigarukaho.

Ati "Mbivugiye aha mu ruhame kubera ko ntabwo tutabivuga, twabanje mu mwiherero, abantu babwizanya ukuri, imyiherero ibaye muzi uko ingana murayizi? Nta nama ya Leta turangiza ibyo tutabivuze nta ruhame nk’uru bitavugwamo, nagira ngo rwose mbisubiremo uyu munsi. Ubutaha, ubundi umuntu agenda nyine buhoro agerageza, ubutaha ubwo ni ukuzavuga amazina, tukavuga n’ibihe, twarangiza twese tugashakira abantu nk’abo umuti.”

Perezida Kagame yahise avuga ko Minisiteri y’Ubuzima n’iy’Uburezi ari zimwe mu zigaragaramo ibi bibazo anabahishurira ko nibatabikosora vuba na bwangu hazafatwa izindi ngamba ku buryo bwihuse.

Yanasabye Minisitiri w’Ubuzima gukora ibishoboka byose kugira ngo ibibazo bikigaragara muri iyi Minisiteri birangira.

Ati " Minisiteri y’Ubuzima ubundi namwe muzabanza mwishakire umuti, mwihereho mushake ibinini.Ndifuza ko ibintu bihinduka byanze bikunze nibinanirana tumenye ko byananiranye."

Yahise agaruka kuri Minisiteri y’Uburezi, nayo ayisaba ko yahindura imikorere cyane ko irangwamo ingeso yo kudakorana ku bayobozi bayigize, ababwira ko bagomba kwimika umuco wo kuganira no gukorera hamwe kugira ngo uburezi butezwe imbere.

yagize ati "[....] Uburezi, Minisiteri y’Uburezi, mubihindure kandi impinduka nizo tubasaba. Nta muntu n’umwe ndasaba gukora ibidashoboka, mubifitiye n’ubushobozi.”

Perezida Kagame yanasabye ko n’ibibazo biri mu rwego rw’ubuhinzi n’ubworozi urw’Ibikorwa remezo, abanyereza imitungo ya Leta ko nabyo byakemurwa vuba na bwangu.

Minisitiri w’Ubuzima Dr Dianne Gashumba yasabwe impinduka mu mikorere muri Minisiteri ayoboye
Minisitiri w’Uburezi Dr. Papias nawe yanenzwe kudakorana neza n’abo bakorana muri iyi minisiteri
Ubwo Perezida Kagame yahaga impanuro abayobozi bahawe inshingano muri guverinoma nshya
Abayobozi bo mu nzego zitandukanye bitabiriye uyu muhango w’irahira
Dr Frank Habineza wari mu bahataniraga umwanya w’umukuru w’igihugu nawe yari yitabiriye uyu muhango.

Abagize guverinoma nshya barahiriye kuzuzuza neza inshingano bahawe
Imiryango n’inshuti z’abayobozi bashya bitabiriye umuhango w’irahira ryabo Umuhango w’irahira wabereye mu cyumba cy’Inteko Ishinga Amategeko


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...