konka coffee
KONKA

AMAKURU

UKWEZI

Kagame yiyamamarije i Musanze, byari ibirori by’agatangaza - Amafoto

Kagame yiyamamarije i Musanze, byari ibirori by’agatangaza - Amafoto
26-07-2017 saa 09:25' | By Vincent Nsengiyumva | Yasomwe n'abantu 7172 | Ibitekerezo

Umukandida wa FPR Inkotanyi, Paul Kagame, yakomereje ibikorwa byo kwiyamamaza mu Ntara y’Amajyaruguru n’iy’Iburengerazuba aho kuri uyu wa Kabiri tariki ya 26 Nyakanga ari bugere mu turere twa Musanze, Nyabihu na Rubavu. Mu karere ka Musanze ari bubanzemo, abantu ni benshi ku kibuga cya Kaminuza ya Isaie BUSOGO mu murenge wa Busogo,aho bamutegeranyije ibyishimo bigaragazwa na morare bazindukanye.

Umukandida wa FPR Inkotanyi, Paul Kagame ageze mu Ntara y’Amajyaruguru n’Uburengerazuba nyuma yo kuzenguruka mu Ntara y’Amajyepfo n’Uburasirazuba aho yakirwaga n’isinzi ry’abarwanashyaka b’uyu muryango bahurizaga ku kuba bazamutora 100%.

Mu murenge wa Busogo hari bubere igikorwa cyo kwiyamamaza muri aka Karere ka Musanze, abanti ni benshi cyane bakaba bari kubyina indirimbo zitandukanye zirata ibigwi n’ibikorwa byiza Kagame yabagejejeho.

Abahanzi batandukanye barimo Senderi, King James, Dream Boyz, na Jay Polly bamaze kugera aho ibi bikorwa biri kubera, bakaba batangiye gususurutsa imbaga y’abaturage ba Musanze bamaze kugera ku kibuga bategereje umukandida wabo.

Aka karere ka Musanze kari buberemo ibikorwa byo kwiyamaza ku mukandida wa FPR Inkotanyi, kagizwe n’imirenge 15 n’abaturage bagera kuri 379.510 ku buso bwa Kilometero kare 530.4.

Saa 11:40 nibwo umukandida wa FPR Inkotanyi Paul Kagame ageze ku Kibuga cya Kaminuza ya ISAIE Busogo aho yakiranwe ubwuzu bwinshi n’imbaga y’abari bamutegereje.Akigera imbere y’imbaga y’abari baje kumwakira ibintu byahinduye isura kuri iki kibuga aho buri wese yabaye nk’usubijwemo imbaraga bose batangira gusimbuka bitera hejuru bavuza impundu abandi bashaka kumusimbukira ngo bamukoreho.

Saa 11:50 umwe mu rubyiruko rwo muri aka karere witwa Nshimiyumukiza Theobard witeje imbere yavuze ko FPR yabaye hafi urubyiruko rwo muri aka karere ibafasha kwiteza imbere mu buryo bwinshi butandukanye. Yanavuze ko FPR yakijije abaturage ba Musanze intambara y’abacengezi yari yabayogoje bityo ngo abaturage bo muri aka karere bose bafitiye umuhigo Paul Kagame umukandida wayo bazahigura tariki 4 Kanama.

Saa 12:05 Ushinzwe ibikowa byo kwiyamamaza mu Ntara y’Amajyaruguru Murebwayire Christine yagarutse ku bigwi bya Paul Kagame buri wese wo muri aka karere yirahira, aho nawe yagarutse ku mutekano yazanye muri aka karere nyamara mu bihe byashize bari baratakaje ikizere cyo kubaho kubera abacengezi.

Yanagarutse ku iterambere mu by’ubuhinzi abanyamusanze bamaze kugeraho mu gihe gito cyane, aho umusaruro wiyongereye ku rwego rushimishije kubera politike nziza y’umuryango wa FPR Inkotanyi.

Saa 12: 15 Umukandida wa FPR Inkotanyi yageze imbere y’abari bamutegereje agiye kubagezaho imigabo n’imigambi abafitiye mu myaka 7 iri imbere.

Akimara gusuhuza ibihumbi by’abateraniye kuri iki kibuga yahise ahamagara Dr Habumuremyi Pierre Damien uvuka muri iyi Ntara kugira ngo agire icyo avuga.

Saa 12: 18 Habumuremyi yashimangiye ko iyo abanyamusanze iyo bakunze bakunda koko bityo aboneraho kubihuza n’imbaga yabukereye kwakira umukandida wa FPR Inkotanyi.
Yagize ati" Iyi mbaga iteraniye aha Nyakubahwa iragukunda. Turagukunda. Aba bantu bose mubona hano ni abanyamuryango ba FPR."

Dr Habumuremyi yashimangiye ko amatora bamaze kuyarangiza ndetse ko bose nk’abanyamusanze bamaze kumutora mu mitima ko hasigaye ko itariki igeze maze bakabishyira ku rupapuro rw’itora.


Abayobozi batandukanye bamaze kuhagera


Abantu ni benshi cyane ku kibuga cya Kaminuza ya Isaie Busogo


Abantu ni benshi cyane ku kibuga cya Kaminuza ya Isaie Busogo, bazindukiye gushyigikira umukandida wa FPR


Aya niyo magambo yiganje ku birango n’ibyapa by’abitabiriye iki gikorwa


Morale ni yose ku bitabiriye iki gikorwa, bose bari kunyeganyega n’amabendera yabo hejuru

Abarwanashyaka ba PL bazindukiye gushyigikira umukandida wa FPR Inkotanyi

Ibyishimo ni byose ku banyamuryango ba FPR bo muri Musanze

Urubyiruko narwo rwabukereye kwakira umukandida rushyigikiye, Kuva mu gitondo babyina Amabendera hejuru n’amajwi aranguruye bagira bati ’tuzamutora 100%"

Amafoto: Karangwa Gaspard


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...