konka coffee
KONKA

AMAKURU

UKWEZI

Kayonza: Abarimu bamwe bararira ayo kwarika, umwe ati ‘nzategesha 80.000 mpembwa 40.000?’

Kayonza: Abarimu bamwe bararira ayo kwarika, umwe ati ‘nzategesha 80.000 mpembwa 40.000?’
13-05-2017 saa 10:22' | By Akayezu Jean de Dieu | Yasomwe n'abantu 4021 | Ibitekerezo 7

Bamwe mu barimu b’amashuri abanza n’ayisumbuye bo mu karere ka Kayonza baratakambira abafite mu nshingano uburenganzira bw’umwarimu babasaba kubakemurira ikibazo kivanze n’akarengane bavuga ko bakorewe n’ubuyobozi bw’ibigo bakoragaho bufatanyije n’ubuyobozi bw’aka karere mu guhindurira aba barimu ibigo bakoreragaho bajyanwa ku bindi bigo (mutation). Ibyakozwe bavuga ko byuzuyemo guhonyora uburenganzira bwabo no kwihimura kuri bamwe muri bo cyane ko hari abagaragaje ko abayobozi b’ibigo birengagije itegeko rigenga guhindurira umuntu aho yakoreraga. Hari nk’ugaragaza ko azajya akoresha amafaranga y’urugendo arenga 80.000 ku kwezi kandi ahembwa 40.000 ku kwezi.

Kuva ku wa Gatatu w’iki cyumweru abarimu banyuranye bari kuzindukira ku biro b’akarere ka Kayonza basaba gukemurirwa ikibazo. Benshi muri aba barimu bamaze igihe kirenga icyumweru batagera ku bigo bigishagaho gusa bamwe muri bo bahawe amabaruwa aturutse mu biro by’akarere ka Kayonza abimura ku bigo bakoreragaho bajyanwa ku bindi bigo. Benshi muri aba barimu baganiriye n’Ikinyamakuru Ukwezi.com usanga barabangamiwe n’iki cyemezo cyafashwe n’ubuyobozi bw’akarere bufatanyije n’abayobora ibi bigo by’amashuri aba barimu bakoragaho.

Umugore umwe utarashatse ko imyirondoro ye ijya mu itangazamakuru ku bw’umutekano we, yagize ati: “Nkanjye bampaye ibaruwa inyimura n’umugabo wanjye bamuha ibaruwa, ntabwo twakoreraga ku bigo bimwe ariko twese twakoreraga hano hafi, ikibabaje nibwo twari tumaze amezi nk’atanu tuvuye mu bukode, umugabo ari muri credit (kwishyura ideni rya banki) y’imyaka 15, njyewe ndi umu A2 (Afite impamyabushobozi y’amashuri yisumbuye) nanjye ndimo umwenda wa banki kandi mpembwa ibihumbi mirongo ine (40000Frw), ubwo se koko niba ari bwo twari tugiye kuba mu nzu yacu twari tumaze imyaka myinshi mu bukode, muby’ukuri dufite abana tugomba no gutangira amafaranga y’ishuri tuzabigenza dute? Kugeza ubu banyohereje mu murenge nzajya nkoresha tike y’ibihumbi bine kugenda no kugaruka, umugabo wanjye we aho bamujyanye ntabwo byashoboka ko akora ataha bivuga ngo nanjye sinabona ayo mafaranga y’itike cyane ko umushahara nkorera ntaho bihuriye. Hari umuyobozi nabajije ikibazo cyanjye hano mu karere arambwira ngo hanze aha hari benshi bakeneye akazi”

Iki kibazo gihangayikishije benshi mu barimu cyaduteye kwegera bamwe mu bayobozi b’ibigo muri aka karere ka Kayonza, badusobanurira uko bihagaze. Uwitwa Wencislas uyobora ikigo kiri mu mujyi wa Kayonza cy’Urwunge rw’Amashuri rwa Mukarange (GS Mukarange Catholic) yagize ati “Nanjye hano mfite abarimu batatu bahawe mutation ariko njyewe icyo nagendeyeho nta kindi ku karere bansabye kongerera abarimu amasaha hanyuma haza kubaho bamwe mu barimu basigara ari nk’aho nta kazi bafite kuko bari basigaranye amasaha macye cyane. Rero ubwo nsabwe gutanga abarimu batatu ni abo nahereyeho”

Abajijwe ku kuba barirengagije uburenganzira bwa bamwe mu gutanga aya mabaruwa abimura mu kazi bakoraga, yavuze ko ahanini batagendeye ku mibereho y’umuntu kuko ari ko babisabwaga ndetse avuga ko nta marangamutima we ubwe yashyizemo keretse niba ari ku bindi bigo byaba byabaye

Harelimana Jean Damascene, Umuyobozi w’Akarere wungirije ushinzwe imibereho myiza y’Abaturage, aganira n’ikinyamakuru Ukwezi.com, yagize ati “Mutations zirahari kandi zarakozwe, kuzikora hari impamvu zigenderwaho kandi nizera ntashidikanya ko ari zo twagendeyeho, ntabwo nanjye nashimishwa n’uko umuntu yajyanwe gukorera kure bitewe n’imibereho cyangwa izindi nyungu cyane ko icyo tuba duharanira ari uko umukozi atanga umusaruro tumwifuzaho kandi ntiyawutanga adakoze mu buryo nawe bumworohereza gukora ako kazi… Ariko unyumve neza hari impamvu ebyiri z’ingenzi zatumye ibi byose biba, icya mbere umubare w’amasaha umwarimu agomba kwigisha mu cyumweru wariyongereye kandi birumvikana ntabwo umubare w’abanyeshuri wo wiyongereye urumva n’abarimu bagomba kugabanuka hamwe na hamwe. Ikindi kandi biterwa n’ibyo umwarimu yize kandi n’ubushobozi afite mu kazi n’ubwo ntawe twifuriza kuva mu kazi ariko nyine ni ikibazo kitatewe n’umuyobozi w’ikigo ahubwo ni gahunda ya Minisiteri y’uburezi”

Visi meya Harelimana Jean Damascene kandi yakomeje agira inama aba barimu yo kuba bakwegera ubuyobizi bw’akarere bukabafasha cyane ku baba bafite ibibazo byihariye byatuma batajya gukorera kuri ibyo bigo boherejweho.


INKURU ZA :
Tanga Igitekerezo
Ibitekerezo 7
Alice Kuya 14-05-2017

Naba nabo bararira ko babimuye ubu se ba chaumeurs cg jobless ?Hababaje nyiri ubukozwemo naho uteruranywe n’akebo......

roto Kuya 14-05-2017

kayonza nayo ndabona ifite ibibazo,ngaho abicwa etc

manzi Kuya 14-05-2017

Gutanga inkuru.mukanyonga comments!!! Apuuuuuuu!!!!

manzi Kuya 14-05-2017

Babahe f yurugendo avugwa muri article 24. Statut yabarimu!!! Si ayo kubimura......baravuga ngo uhawe mutation ahabwa f y’ urugendo,abayobozi bashyire mu bikorwa iyo ngingo

Fifi Kuya 13-05-2017

Ariko Mana!!! Baze kwiga imikorere myiza hano i Karongi. Dufite Ubuyobozi bwiza. Usanga abayobozi b’uburezi n’abayobozi b’imicungire y’abakozi babikora neza kuburyo buri wese bagerageza kumushyira hafi yaho atuye. Karongi oyeee!!!

Fifi Kuya 13-05-2017

Ariko Mana!!! Baze kwiga imikorere myiza hano i Karongi. Dufite Ubuyobozi bwiza. Usanga abayobozi b’uburezi n’abayobozi b’imicungire y’abakozi babikora neza kuburyo buri wese bagerageza kumushyira hafi yaho atuye. Karongi oyeee!!!

manzi Kuya 13-05-2017

Statut y’ abarimu article 24 ivuga ko uhawe mutation ahabwa f y’ urugendo,ahubwo bayabahe

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...