konka coffee
KONKA

AMAKURU

UKWEZI

Kugira ngo dukemure ibibazo byihariye dufite tugomba gukora ku buryo budasanzwe-Kagame

Kugira ngo dukemure ibibazo byihariye dufite tugomba gukora ku buryo budasanzwe-Kagame
31-08-2017 saa 13:35' | By Vincent Nsengiyumva | Yasomwe n'abantu 1435 | Ibitekerezo 2

Perezida Paul Kagame yavuze ko kugira ngo u Rwanda rukemure ibibazo by’ingutu ruhura nabyo, hagomba kubaho imikorere n’imbaraga zidasanzwe ku buryo buri wese agomba guhindura imyumvire agashyira imbaraga zishoboka zose mu mirimo ye.

Ibi Perezida Kagame yabigarutseho ubwo yakiraga indahiro y’Abaminisitiri 20 n’abanyamabanga ba Leta 11 bagize Guverinoma nshya yaraye itangajwe kuri uyu wa 30 Kanama 2017.

Perezida Kagame yavuze ko yizeyeko neza ko abamaze kurahira bumva uburemere bw’inshingano bahawe ashimangira ko bazashyira mu bikorwa ibyo Abanyarwanda babatezeho.

Umukuru w’igihugu yibukije abagize Guverinoma nshya bamaze kurahira ko bagomba kubaka ubushobozi n’imikorere ibibutsa ko u Rwanda rufite ibibazo by’umwihariko bityo bakuzuza inshingano zabo nta kujenjeka.

yagize ati "Turasabwa kubaka ubushobozi n’imikorere itwibutsa ko dufite ibibazo by’umwihariko [....] Iyo utangiye kujenjeka, ukumvako wagezeyo uba wongera ikiguzi cy’ingufu bidutwara kugera aho twifuza."

Kagame yongeye kugaruka ku budasa bw’u Rwanda aho yibukije aba bayobozi bakuru bagiye gukorana muri iyi manda y’imyaka 7 ko ubwo budasa yakunze kugarukaho ko bagomba kubushakira mu mikorere myiza no gushakira ibibazo by’abanyarwanda ibisubizo byabyo.

Yagize ati "[....] Ngira ngo murabizi igihe gishize byose tuvuga ubudasa, ubudasa bw’u Rwanda tubutegereza cyangwa tubushaka, tububona mu mikorere. Ariko gushingira no ku bibazo by’umwihariko igihugu cyacu gifite, byombi bigomba kujyana rero. Uko dukora, n’ibisubizo bigomba kuboneka mu bibazo nabyo biba bifite umwihariko ariwo mwagiye, abantu kenshi mwita ubudasa."

Perezida Kagame kandi yanaboneyeho kwibutsa aba bayobozi bashya kugirana imikoranire myiza hagati yabo nka kimwe mu ntwaro yo guhuza imbaraga bakagera kucyo bifuza kugeraho.

Yagize ati "Kuvugana no gukorana na mugenzi wawe ntabwo bisaba indi nkunga ivuye ahandi, tubyifitemo. Ndifuzako rero ko ibintu bihinduka mu nzego zose. Ubuzima, uburezi, ubuhinzi, ibikorwaremezo, ubutabera n’ahandi."


INKURU ZA :
Tanga Igitekerezo
Ibitekerezo 2
Pastor Emmy Kuya 1-09-2017

Muzehe wacu H.E Akora neza aharanira inyungu z’abanyarwanda bose ariko byagera hano hasi bikazamba. Abagombaga gushyira mu bikorwa gahunda z’igihugu nk’uko zagenwe na President Bakishakira inyungu zabo bwite n’ababo. So, Ministers Mudufashe twubake u Rwanda twifuza.

Philos Kuya 1-09-2017

Nibyo koko u Rwanda ni igihugu cyihariye ku isi tugomba gukora byihariye si non ntaho twagera.dufite umuyobozi udasanzwe Imana yarakoze ku muduha.dukurikize impanuro ze tuzagera kuntambwe ishimishije.

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...