konka coffee
KONKA

AMAKURU

UKWEZI

Leta y’u Rwanda irasabwa impozamarira ku muryango w’umunyeshuri wapfiriye muri Israel

Leta y’u Rwanda irasabwa impozamarira ku muryango w’umunyeshuri wapfiriye muri Israel
15-06-2017 saa 08:27' | By Chief Editor | Yasomwe n'abantu 13549 | Ibitekerezo 9

Umusore w’umunyarwanda wari waroherejwe muri Israel mu mujyi wa Tel Aviv aho yakurikiranaga amasomo ye ajyanye no kwimenyereza umwuga mu by’ubumenyi mu buhinzi, yapfuye urupfu kugeza ubu rukiri amayobera, aho bikekwa ko yaba yarishwe atewe icyuma cyangwa we ubwe akaba yaba yiyahuye akoresheje icyuma. Hagati aho arimo, umuryango wa nyakwigendera hari ibyo usaba Leta birimo no kubaha impozamarira.

Uyu musore yitwaga Nkundimana Joel, akaba yari yararangije kwiga muri Kaminuza y’u Rwanda mu cyahoze ari Umutara Polytechnic University, nyuma yoherezwa muri Israel na Leta y’u Rwanda ibinyujije muri Minisiteri y’Ubuhinzi n’Ubworozi, aho yakoraga nk’uwimenyereza umwuga mu masomo y’ubumenyi mu by’ubuhinzi (Agrostudies internship).

Nkundimana Joel yapfuye urupfu rukomeje kuba amayobera

Umwe mu biganye na Nkundimana Joel, kuwa Kabiri tariki 13 Kamena 2017, yari yabwiye ikinyamakuru Ukwezi.com ko uwo mugenzi we yasanzwe yapfiriye iwe mu rugo aho yari acumbitse mu mujyi wa Tel Aviv mu gihugu cya Israel, bikaba bigaragara ko yatewe icyuma agakatwa ijosi ariko hakaba hakiri amayobera mu bijyanye no kuba byakwemezwa ko yaba yaratewe icyuma n’abagizi ba nabi cyangwa niba yariyahuye.

Nsanzimfura Théogène, se wa nyakwigendera Joel Nkundimana, yabwiye ijwi ry’Amerika ko ibyo kuba umwana we yariyahuye batabyemera, ndetse akagira n’ibyo asaba Leta y’u Rwanda birimo kwihutisha kuzana umurambo no guha umuryango we impozamarira kuko ngo yari mu maboko ya Leta.

Nsanzimfura Théogène ati: "Icyo twasaba Leta ni uko yakurikirana neza iby’urupfu rwe, kuko nta muntu ushobora kwiyahura ngo yikebeshe icyuma ijosi riveho kandi nta n’impamvu yari kwiyahura kuko yari umwana tuziho ubunyangamugayo, ibyo kwiyahura ntiyari kubirota kuko ntakindi kibazo yari afite mu muryango, iyo aza kuba agifite aba yaratubwiye. Noneho rero Leta nidufashe gukurikirana no kumenya neza iby’urupfu rwe, bakaduha amakuru nyayo y’imvaho. Ikindi nanone twifuza ni uko umurambo watugeraho vuba cyane tukamushyingura, tukamenya ko tumushyinguye. Gusa nk’umwana wajyanywe na Leta, wari mu maboko yabo, bashaka n’impozamarira y’ababyeyi kuko uwo mwana yaguye iyongiyo ari uwabo bamujyanye, ubwo rero yaguye mu maboko yabo kandi umwana yari afite igihe kirekire cyo gufasha umuryango, twari dufite icyizere ko azaza akadufasha no kugura n’agasabuye, ubwo urumva ubuzima bwose bwasubiye hasi bwahagaze, bityo Leta ikaba yagira ikintu igena kuko ntibyumvikana ukuntu umwana apfa ari mu gihugu tuzi neza ko umutekano wagombye kuba uhari, tuzi ko ari kumwe n’abandi bantu mu kigo, tuzi neza ko ari mu gihugu cyateye imbere umuntu adashobora gupfa bene ako kagezi azize amaherere..."

Ange Soubirous Tambineza, umuyobozi w’ishami rishinzwe gukusanya no gusakaza amakuru muri Minisiteri y’Ubuhinzi n’Ubworozi ari nayo yohereje Nkundimana Joel kwiga muri Israel, we yatangaje ko kugeza ubu iby’urupfu rw’uwo mwana bikiri amayobera, agira n’icyo avuga ku bijyanye n’ibyo umuryango usaba Leta y’u Rwanda.

Ange Soubirous Tambineza ati: "Iperereza ntabwo twe twakwemeza ahantu rigeze, ariko icyo twemeza ni uko ririmo rirakorwa. Umurambo wajyanywe kwa muganga kugirango hakorwe ibipimo bigaragaza icyo umuntu yazize, nk’uko bisanzwe kwa muganga. Raporo igomba gukorwa hashingiwe kuri ibyo bizami ntiraboneka... Ubu duhangayikishijwe no kumenya ko umuntu yitabye Imana... cyane cyane ko urwo rupfu rwe nyine, birashoboka ko umuntu yarwibazaho byinshi. Yasanzwe mu cyumba aryamye hari n’umuvu w’amaraso, afite icyuma mu ntoki bigaragara ko icyo cyuma gishobora kuba ari cyo cyamwishe, ntawamenya rero ngo ninde wakimwicishije, cyangwa se niwe wakiyicishije... Urumva nta makuru n’amwe dushobora guhamya, ayo duhamya gusa ni ay’urupfu rwe kandi ko yapfuye bitunguranye, atarwaye ngo tumenye iby’indwara ye, ibyo rero kwa muganga bazagaragaza muri raporo nibyo bizemezwa byaherwaho abantu bafata umwanzuro. Ambasade y’u Rwanda muri Israel, iravugana umunsi ku wundi na Minisiteri, bakaba baganira babivuganaho, barabikurikirana, turakurikirana nk’umunyarwanda nyine, cyane cyane umunyeshuri wigaga iby’ubuhinzi kandi wari ukirimo kwimenyereza mu by’ubuhinzi kugirango azagaruke mu Rwanda atange ubwo bumenyi, ntabwo twaterera iyo."

Ange Soubirous Tambineza, umuyobozi w’ishami rishinzwe gukusanya no gusakaza amakuru muri MINAGRI

Ange Soubirous Tambineza kandi yagize icyo avuga ku byifuzo by’umuryango bijyanye no kwihutisha kugeza umurambo mu Rwanda no gutanga impozamarira. Aha yagize ati: "Ibyo kwihutisha kugeza umurambo mu Rwanda, ibyo si ikibazo cyabo bonyine. Ni icyifuzo cy’umuryango ariko ninacyo cyifuzo cya Minisiteri. No mu byo tuganira na Ambasade, tunaganira n’abo muri Israel, icyo twifuza natwe ni uko yagezwa mu Rwanda vuba, erega natwe turi mu kiriyo. Niba abavandimwe be barahagaritse imirimo bakaba bari mu kiriyo cye, bigomba kugira igihe kizarangirira, abantu bamusezeye bamushyinguye, n’umuco urabidutegeka gushyingura no guherekeza abantu bacu. Iby’impozamarira rero, ibijyanye (principe) yo guhoza amarira sinzi ikintu igenderaho, iyo ntacyo nayivugaho, nta mpamvu ndimo kubona n’imwe inyemerera kuvuga ku ndishyi kuko ubundi uriha ikintu wangije, mu gihe rero tutarabona umuntu n’umwe ushobora kuryozwa urwo rupfu rwe cyangwa se uwaruteye, ntabwo iby’impozamarira numva aho byaturuka."

Joel Nkundimana yari umusore ukiri muto, akaba yakomokaga i Karongi mu Ntara y’Uburengerazuba bw’u Rwanda. Yari yaragiye muri Israel muri Nzeri umwaka ushize, akaba yagombaga kumara umwaka umwe muri icyo gihugu, bivuga ko yaburaga amezi abarirwa muri atatu ngo arangize amasomo ye agaruke mu Rwanda.


INKURU ZA :
Tanga Igitekerezo
Ibitekerezo 9
Ukwimanishatse Eric Kuya 17-06-2017

Joel ntabwoyapfuye yasinziriye, mugitondo cyumuzuko tuzamubona,mfite ibyiringiro ko muri Krisito yesu turikumwe,inama yangiraga nzazikurikiza kugeza mvuye mwuno mubiri :gura Yesu azimpamvu.

Didi Kuya 16-06-2017

Ariko nanjye ndumiwe pe, umuntu ntibaramubona ngo bamushyingure none batangiye kwaka amafrw yindishyi, naho basabye Leta ikamugeza mu Rwanda ikanabafasha kumushyingura mucyubahiro ngo indishyi.Ahaa urukundo rwarabu

Imboni Kuya 16-06-2017

Nyamara uwo muryango uravuga ukuri,uriya musore yaguye mutumwa yohetejwemo na reta.
jye ndumva reta igomba kugira ukwo igenera uriya muryango wabuze umuntu.
nkukwo imiryango yabasirikare baguye mubutumwa bagenzwa. uwo musore ntabwo yaguye mumirimo ye bwite cg imirimo yumuryangowe. kandi iyo aguye harabamwoherejeyo. bagomba gutanga impoza marira kumuryango wuwa pfuye. Lambortus wavuze nabi.

-xxxx- Kuya 15-06-2017

Gusa Uwomuryango Wihangane Kandi Ukomere Yesu Arabizi ,naho Abantubo Mubarekebivugire Ibyobashatse ?Mugire Ibyiringiro Ko Mugitondo Cyumuzuko Muzamubona .Mwizer’Imana harimpamvu izasohoza amasezerano yabayikoreye ,IMANA Yaramwakiriye mubayo ndabyizeye.%

-xxxx- Kuya 15-06-2017

Ibyaribyobyose Urumushinyaguzi Urumva Ibintu Uvuze Leta Igukurikirane Kbs?

-xxxx- Kuya 15-06-2017

Ibyaribyobyose Urumushinyaguzi Urumva Ibintu Uvuze Leta Igukurikirane Kbs?

Timoty Kuya 15-06-2017

REST IN PEACE

Lambortus Kuya 15-06-2017

Ewana Ange Soubirrous ararenze kbsa!

lg Kuya 15-06-2017

ARIKO ABANTU BABAYE BATE UMUNTU NTACYO ABABWIYE, BIRUKIYE GUSABA IMPOZAMARIRA AMAFARANGA, UMUNTU NTARAZA, NTARASHYINGURWA NONE NGO NI MARI MUTEGEGEREZE AZE ASHYINGURWE, NIBIRANGIRA MUGE MURUKIKO MUREKE KO LETA YABICIYE, UMUNTU NIMUTSINDA, MUSABE, INDISHYI MUREKE UMURURUMBA

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA