konka coffee
KONKA

AMAKURU

UKWEZI

Major Dr Aimable Rugomwa ushinjwa gukubita umwana akamwica, yongeye kugezwa mu rukiko

Major Dr Aimable Rugomwa ushinjwa gukubita umwana akamwica, yongeye kugezwa mu rukiko
11-04-2017 saa 13:42' | By Chief Editor | Yasomwe n'abantu 8238 | Ibitekerezo 4

Major Dr Aimable Mupenzi Rugomwa, umusirikare mu ngabo z’u Rwanda akaba n’umuganga mu bitaro bya gisirikare i Kanombe, yongeye kugezwa imbere y’Urukiko rwa gisirikare i Nyamirambo, mu rubanza rwagombaga kuburanishwa mu muzi aho aregwa gukubita umwana akamwica, gusa urukiko rwanzuye ko urubanza rusubikwa n’ubwo habayeho kutabivugaho rumwe hagati y’uyu musirikare n’umwunganira mu mategeko.

Major Dr Aimable Mupenzi Rugomwa,yaherukaga kugezwa imbere y’urukiko kuwa Gatatu tariki 9 Ugushyingo 2016. Icyo gihe akigera mu rukiko yatangarije abacamanza ko atiteguye kuburana kuko hari ikindi kirego kiyongereye ku byo yari asanzwe aregwa yari yashyikirijwe, icyo kikaba ari icy’abo mu muryango w’umwana wishwe bamusaba indishyi z’akababaro. Icyo gihe yasabye urukiko ko yahabwa ukwezi akaba asoma neza impapuro zikubiyemo ibyo aregwa hamwe n’umwunganira mu mategeko. Icyo gihe byarangiye urukiko rwanzuye ko urubanza rusubikwa.

Mu iburanishwa ryabaye kuri uyu wa Kabiri tariki 11 Mata 2017, habaye impaka mu rukiko zishingiye kuri mukuru we Nsanzimfura Mamerito bareganwa hamwe, bitewe n’uko ubwo batangiraga kuburana Major Rugomwa yari yagaragaje ko uyu mukuru we afite uburwayi bwo mu mutwe, hakanzurwa ko hagomba gukorwa ibizamini. Ubushinjacyaha bwagaragaje ko ibyo bizamini bitabashije gukorwa kuko umuganga babishinze hari izindi nshingano yagize, bityo busaba ko urubanza rwasubikwa, ibizamini bikazafatwa kuri uyu wa Gatatu tariki 12 Mata 2017.

Major Rugomwa yasabye ko yaburanishwa wenyine niba ibyavuye mu bizamini bya mukuru we bitaraboneka, ariko umwuganira mu mategeko, Me Joseph Ngabonziza, we ntibabivugaho rumwe kuko we yagaragaje ko kuba ubushinjacyaha bushaka gushingira ku bimenyetso ari byiza, gusa asaba ko byakwihutishwa cyane. Uretse Major Rugomba ubwe, abandi bose bari bashyigikiye ko urubanza rwasubikwa hakihutishwa ibyo gupima uwo mukuru we.

Urukiko byarangiye rwanzuye ko urubanza rusubikwa, rukazasubukurwa mu gihe cy’ukwezi kumwe, kuko ruzongera kuburanishwa tariki 9 Gicurasi 2017.

Kuwa Kabiri tariki 13 Nzeri 2016, Major Dr Aimable Rugomwa yagejejwe bwa mbere imbere y’urukiko, aburana ku bijyanye n’ifunga n’ifungura ry’agateganyo. Yahakanye ko yishe umwana witwa Mbarushimana Theogene, avuga ko ari igisambo barwanye. Yanasabye ko yafungurwa akajya kwikomereza ubushakashatsi bwe, ariko ibi urukiko rwabiteye utwatsi rumukatira gufungwa by’agateganyo iminsi 30.

Aramutse ahamwe n’icyaha cyo kwica umuntu ku bushake, Maj. Dr Aimable Rugomwa Mupenzi yahanishwa igifungo cya burundu nk’uko ingingo y’140 mu gitabo cy’amategeko ahana ibyaha mu Rwanda ibiteganya.

Ku Cyumweru tariki 4 Nzeri 2016, nibwo Dr Aimable Mupenzi yakubise uwo mwana w’umuhungu wari ufite imyaka 19 y’amavuko, wari umunyeshuri mu mwaka wa kabiri w’amashuri yisumbuye, kugeza amwishe. Ibi byabereye mu kagari ka Rubirizi mu murenge wa Kanombe, umwana wakubiswe akaba ari umuturanyi w’uyu musirikare.

Uyu mwana yapfuye nyuma yo gukubitwa. Major Rugomwa avuga ko ari igisambo barwanye

Mbarushimana Theogene wapfuye nyuma yo gukubitwa na Dr Aimable Mupenzi, bivugwa ko yamuzizaga ko yamwibye ibintu mu modoka ye n’ubwo abaturanyi bavuga ko ntabyo bazi ko byaba byarabayeho. Gusa ngo uyu muganga w’umusirikare yajyaga akunda kwibwa ibintu mu modoka akavuga ko uzafatwa azahura n’akaga gakomeye, n’ubwo nta gihamya y’uko uyu nawe koko yaba yari yamwibye.

Nyuma yo kwica uyu mwana, Dr Aimable Mupenzi yahamagaye umuyobozi w’akagari ka Rubirizi, amubwira ko yishe igisambo n’ubwo atigeze agaragaza ibyo yamufatanye. Abaturanyi bavuga ko yahuye n’uyu mwana, akamukurura akamujyana iwe akaba ari ho amukubitira kugeza amumazemo umwuka.

Mu muhango wo gushyingura uyu mwana, amarira n’agahinda byari byose

SOMA INKURU BIJYANYE HANO:

* Kigali: Umuganga ufite ipeti rya Major yakubise umwana aramwica

* Ingabo z’u Rwanda zasuye umuryango w’umwana wishwe akubiswe na Major Mupenzi

* Major Aimable Mupenzi yahakanye gukubita umwana akamwica, avuga ko yarwanye n’igisambo

* Major Dr Aimable ushinjwa gukubita umwana akamwica yakatiwe kuba afunzwe by’agateganyo

* Major Dr Aimable ushinjwa gukubita umwana akamwica, yatanze impamvu zituma ataburana


INKURU ZA :
Tanga Igitekerezo
Ibitekerezo 4
mary Kuya 12-04-2017

manaweeee birababaje asebeje ingabozurwanda koko umusirikare ntaziko kwihanira bitemewe koko muzamuhane mwihanukiriye yatanze urugero rubi as nkumusirikare aribo tubadutezeho amahoro. ndababaye

mary Kuya 12-04-2017

manaweeee birababaje asebeje ingabozurwanda koko umusirikare ntaziko kwihanira bitemewe koko muzamuhane mwihanukiriye yatanze urugero rubi as nkumusirika aribo tubadutezeho amaho.. ndababaye

nakaga Kuya 11-04-2017

Muzamuhane mutange urugero.ntakabeshye Ko murumunawe afite ikibazo cyo mumutwe.ndabazineza.nubwo uwo yishe atazuka ariko nawe ababazwe nkuko ababyeyi bababaye

amina Kuya 11-04-2017

my goodness ko nzi ko ingabo zacu zigira discipline no kubaha ikiremwa muntu ibi bije bite? asebeje igisirikare cyacu ni ahanwe byintangarugero kuko adusebereje igihugu nabandi barebereho

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...