konka coffee
KONKA

AMAKURU

UKWEZI

Mu minsi 10 gusa, u Rwanda rugenderewe n’abategetsi babiri bazirana urunuka

Mu minsi 10 gusa, u Rwanda rugenderewe n’abategetsi babiri bazirana urunuka
18-07-2016 saa 13:16' | By Chief Editor | Yasomwe n'abantu 8232 | Ibitekerezo 3

Abazi amateka na politiki z’ibihugu bitandukanye ku isi, bashobora kubibona nk’igitangaza, hakaba ababona u Rwanda nk’igihugu kitagendera ku bya ’munyangire’ cyangwa se undi wese akabisobanura ukwe, gusa ukuri ni uko bidasanzwe kuba abayobozi b’ibihugu bibiri bimaze imyaka bizirana, bagenderera igihugu bakasimburanamo mu minsi micye ikurikirana.

Kuva mu mwaka w’1967, Israel na Palestine ni ibihugu bizirana cyane kandi bihora mu ntambara z’urudaca, guhangana bikaba byaratangiye ubwo Abayahudi bari bamaze imyaka myinshi baba hirya no hino ku isi, bajyaga mu gihugu cya Israel bakigarurira ibice binini byari bituwe n’abaturage ba Palestine. Kuva ubwo, umwana wavutse Israel igitangira guhangana na Palestine, agize imyaka hafi 50 atarabona ibi bihugu bicana uwaka.

JPEG - 77.3 kb

Mu ruzinduko rw’umunsi umwe yagiriye mu Rwanda tariki 6 Nyakanga 2016, ministiri w’intebe wa Israel Benjamin Netanyahu ari kumwe na Madamu we Sarah Netanyahu, basuye urwibutso rwa Jenoside rwa Kigali ku Gisozi banagirana ibiganiro na Perezida Kagame.

Nyuma y’iminsi 10 gusa, tariki 16 Nyakanga 2016, Perezida Mahmoud Abbas nawe yageze mu Rwanda ahita asura urwibutso rwa Jenoside yakorewe Abatutsi mu 1994 rwa Kigali rwubatse ku Gisozi. Ubusanzwe Abbas yaje mu Rwanda aje kwitabira inama y’abakuru b’ibihugu bya Afurika ibera i Kigali, inama Palestine itumirwamo nk’indorerezi.

Kuri iki Cyumweru tariki 17 Nyakanga, Perezida Kagame yakiriye Perezida Mahmoud Abbas, ibiro by’umukuru w’igihugu cy’u Rwanda bikaba bitangaza ko baganiriye ku masomo ibihugu byombi bishobora gusangira.

Umubano w’ibi bihugu bizirana, wanagarutsweho mu nama y’abakuru b’ibihugu

Ubwo Perezida wa Palestine yahabwaga ijambo mu nama y’abakuru b’ibihugu bya Afurika, yasabye ko uyu mugabane wafasha igihugu cye kurwanya Israel ibavogera ikava ku butaka bwabo. Yagize ati: “Turizera ko ubumwe bwanyu buzakomeza gufasha abaturage ba Palestine gusubirana ubwigenge, ubusugire no kutavogerwa, ariko ntibyashoboka mu gihe Israel yaguma ku butaka bw’igihugu cyacu batsimbarayeho kuva mu 1967. Israel ikomeje kutubuza ubwigenge ku butaka bwacu kandi igomba kurekeraho, ihagagarika ibyo ikora kandi ntirenge ku masezerano yashyizweho umukono."

JPEG - 84.6 kb

Ibi Mahmoud Abbas yabivuze, azi neza ko arimo kubivugira ku butaka bwari bumaze iminsi micye buvuyeho uwo yatungaga agatoki, dore ko buri ruhande ruba ruhanze urundi amaso. Igihugu cya Israel kandi nacyo cyasabye kuba umunyamuryango w’indorerezi mu muryango w’ubumwe bw’ibihugu bya Afurika, ubu hakaba hibazwa icyazaba mu gihe ibi bihugu birebana ay’ingwe byahurira muri uyu muryango.


INKURU ZA :
Tanga Igitekerezo
Ibitekerezo 3
kabindi Kuya 19-07-2016

biriya bihugu,abemera IMANA bazi neza ko bidashobiraguhuza nkuko amateka yabyo yahoze kuva kuri Ablaham,Sara na hagayi ndetse n’abana babo!
ubworero,mureke ibyavuzwe bisohore!

koko Kuya 18-07-2016

kuri jye ndabona uyu mugabo agaragaza ko n’ubwo atuye imahanga ariko yifatanije na AFRICA kubera ko mu bihugu by’Iburayi yabaye nkuruvu. ariko mbabaze urwanda twabuze imbibi zacu zingana gute? kuki twebwe tutagira ishyaka ryo guharanira imbibi zacu, erega iriya noyo Africa yacu! reka nabo bigenge.Rwanda nzakugwamo.

koko Kuya 18-07-2016

kuri jye ndabona uyu mugabo agaragaza ko n’ubwo atuye imahanga ariko yifatanije na AFRICA kubera ko mu bihugu by’Iburayi yabaye nkuruvu. ariko mbabaze urwanda twabuze imbibi zacu zingana gute? kuki twebwe tutagira ishyaka ryo guharanira imbibi zacu, erega iriya noyo Africa yacu! reka nabo bigenge.Rwanda nzakugwamo.

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA
Loading...