konka coffee
KONKA

AMAKURU

UKWEZI

Ntabwo FPR tujya twirarira , ibyo tutagezeho tuzababwira impamvu _F. Ngarambe

Ntabwo FPR tujya twirarira , ibyo tutagezeho tuzababwira impamvu _F. Ngarambe
12-07-2017 saa 17:34' | By Vincent Nsengiyumva | Yasomwe n'abantu 2765 | Ibitekerezo

Umunyamabanga Mukuru w’Umuryango FPR Inkotanyi, Francois Ngarambe yavuze ko hari ibyo uyu muryango wari wiyemeje kuzakora ubwo bari mu bikorwa byo kwiyamamariza manda igeze ku musozo, avugako bafite gahunda yo kubwira Abanyarwanda impamvu zifatika zatumye bitagerwaho nk’uko bari babyiyemeje.

Ibi yabigarutseho mu kiganiro n’abanyamakuru kuri uyu wa Gatatu tariki ya 12 Nyakanga 2017, ubwo hasobanurwaga uburyo ibikorwa byo kwamamaza Umukandida wa FPR bizakorwa muri buri Karere.

Francois Ngarambe yavuze ko hari byinshi FPR Inkotanyi yagezeho mu myaka imaze ku butegetsi, anashimira abanyarwanda bashyizeho umusanzu wabo bakabishyigikira.

Yagize ati “Ibyo umuryango wa RPF Inkotanyi yagezeho mu gihe gishize ni byinshi cyane kandi birigaragaza.Hari ibigaragara byinshi abantu bagezeho birimo imibereho myiza, umutekano ubutabera n’ibindi. Ibyo tutagezeho ariko si uko byananiranye ahubwo ni uko hari ibikiri gukorwa kandi hari n’ibisaba igihe kirekire.”

Uyu munyamabanga Mukuru w’Umuryango wa FPR Inkotanyi yashimangiye ko hari ibyo bari biyemeje ubwo uyu muryango wiyamamarizaga kuyobora igihugu muri iyi manda igeze ku musozo, avuga ko ibyo bari biyemeje batagezeho bazabwira abanyarwanda impamvu bitakozwe.

Yagize ati “ Ntabwo tujya twirarira cyangwa ngo tubeshye, ibyo tutagezeho twari twemereye abanyarwanda tuzababwira impamvu. Tuzabereka tuti dore inzitizi zabaye izingizi, dore aho tugeze, dore igihe bizakorerwa.”

Francois Ngarambe yanavuze ko Umukandida wa FPR Inkotanyi, Paul Kagame, azagera mu turere twose tw’igihugu yiyamamaza ndetse anageza ku Banyarwanda imigabo n’imigambi abafitiye muri iyi manda. Uyu Munyamabanga anaboneraho gusaba abanyarwanda kuzitabira bakagera aho uyu muryango uzakorera ibikorwa byawo byo kwiyamamaza ari benshi.

Ibikorwa byo kwiyamamaza ku bakandida bose uko ari 3 bizatangira kuwa Gatanu tariki ya 14 Nyakanga, bikaba biteganyijwe ko buri mukandida azazenguruka mu turere twose tw’igihugu. Umukandida w’Umuryango wa FPR Inkotanyi, Paul Kagame, akazatangirira ibikorwa bye byo kwiyamamaza mu Karere ka Ruhango.

Itora rya Perezida wa Repubulika rizaba kuwa 3 Kanama ku Banyarwanda bari mu mahanga no kuwa 4 ku Banyarwanda bari imbere mu gihugu.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
BAHO
INKURU ZIKUNZWE
Ibitekerezo
Loading...
IZINDI NKURU WASOMA
Loading...