konka coffee
KONKA

AMAKURU

UKWEZI

Perezida Kenyatta yarahiriye kuyobora Kenya, Kagame ashimangira umubano mwiza bafitanye

Perezida Kenyatta yarahiriye kuyobora Kenya, Kagame ashimangira umubano mwiza bafitanye
28-11-2017 saa 14:00' | By Vincent Nsengiyumva | Yasomwe n'abantu 5340 | Ibitekerezo 1

Perezida wa Kenya Uhuru Kenyatta na Visi Perezida we William Samoei Ruto, bamaze kurahirira kuyobora iki gihugu mu birori byitabiriwe n’ibihumbi byinshi by’abantu ndetse n’abayobozi bo mu bihugu bya Afurika bagiye kumushyigikira.

Mu banyacyubahiro bitabiriye umuhango w’irahira rya Kenyatta harimo na Perezida Kagame washimangiye umubano n’ubushuti bafitanye mu ijambo rito cyane yavugiye imbere y’Abanyakenya bari bateraniye i Karasani kuri Stade ya Moi International Sports Centre.

Mu ma saha ya saa tanu n’igice ku isaha yo mu Rwanda Umukuru w’urwego rw’ubutabera wa Kenya David Maraga yatangiraga umuhango nyirizina wo kurahiza Uhuru Kenyatta na Visi Perezida we William Samoei Ruto bagiye kuyobora Kenya muri manda ya kabiri ari nayo ya nyuma izarangira mu 2022 nk’uko itegeko nshinga muri iki gihugu ribiteganya.

Ibi birori by’irahira rya Perezida Kenyatta byitabiriwe n’abanyacyubahiro batandukanye bari bahagarariye ibihugu bigera kuri 40 barimo abakuru b’ibihugu 13 aribo Perezida Kagame , Yoweri Museveni wa Uganda, Ian Khama wa Botswana, Edgar Lungu wa Zambia, Ismaïl Omar Guelleh wa Djibouti, Hage Geingob wa Namibia, Faure Gnassingbé wa Togo, Mohamed Farmajo wa Somalia, na Minisitiri w’Intebe wa Ethiopia Hailemariam Desalegn.

Ubwo Perezida Kenyatta yamaraga kurahira yumvikanye mu magambo yo gushima Imana aho yavugaga ko yabaye mu ruhande rw’abanyakenya mu bihe by’amatora na nyuma yayo igihugu kikaguma mu mahoro.

Kenyatta kandi yashimiye abanyakenya muri rusange kubwo kuba barashyigikiye ibitekerezo bye bakabitora, abizeza ko nawe azababa hafi ndetse ko azakora byinshi bitandukanye byose bishingiye kukuzamura imibereho y’abaturage b’igihugu cye.

Yasabye abanyaKenya kurangwa n’urukundo, bakabana nk’abavandimwe bakareka amacakubiri, amakimbirane n’inzangano ahubwo bakarangwa n’icyizere kabone n’ubwo bakinjira mu bihe bikomeye.

Perezida Kagame wahawe umwanya muto wo kugira ngo agire ubutumwa bugufi ageza ku banyakenya, yahise avuga amagambo ashimangira imibanire myiza iri hagati yabo. Ati “BanyaKenya naje hano kubashimira. Mwarakoze cyane. Abanyarwanda barabatashya cyane ndetse banabifuriza ishya n’ihirwe ku ntsinzi ikwiye mwabonye mu matora.”

Mu rwego rwo kwakira indahiro y’Umugaba w’Ingabo w’Ikirenga Perezida Kenyatta ingabo z’igihugu cya Kenya KDF zabanje gukora igikorwa cyo kurasa urufaya rw’ ibisasu biremereye cyane .

Umutekano wari wakajijwe mu bice bitandukanye by’iki gihugu cyane cyane mu murwa mukuru wa Nairobi by’umwihariko kuri stade ya Moi International Sports Centre yabereyeho ibi birori,aho inzego z’umutekano zari maso kubera umuvundo w’ibihumbi n’ibihumbi by’abantu bari bahari.


INKURU ZA :
Tanga Igitekerezo
Ibitekerezo 1
kabanda Kuya 28-11-2017

ministri w’intebe wa israheri yicaye he ngo ndebe uko asa?

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...