konka coffee
KONKA

AMAKURU

UKWEZI

RURA yashimangiye ko ibyo kugenzura imbuga nkoranyambaga, Komisiyo y’Amatora bitayireba

RURA yashimangiye ko ibyo kugenzura imbuga nkoranyambaga, Komisiyo y’Amatora bitayireba
31-05-2017 saa 22:39' | By Chief Editor | Yasomwe n'abantu 2962 | Ibitekerezo 3

Nyuma y’uko Minisitiri w’Ububanyi n’amahanga n’ubutwererane akaba n’umuvugizi wa Leta y’u Rwanda, Madamu Louise Mushikiwabo, agaragaje ko adashyigikiye na gato icyemezo cya Komisiyo y’amatora cyo kugenzura imbuga nkoranyambaga cyangwa ibijyanye no kuba bashobora kuzifunga birinda ko zakoreshwa nabi mu gihe cy’amatora, Ikigo ngenzuramikorere mu Rwanda (RURA) cyo cyanashimangiye ko ibyo kogenzura imbuga nkoranyambaga Komisiyo y’Amatora bitayireba.

Kuwa Mbere tariki 29 Gicurasi 2017, Perezida wa Komisiyo y’amatora mu Rwanda, Prof Kalisa Mbanda, yatangarije ibiro ntaramakuru by’Abafaransa AFP ko abakandida biyamamaza ku mwanya wa Perezida wa Repubulika, bazajya babanza kwerekana ibyo bagiye gutangaza ku mbuga nkoranyambaga mbere y’uko babishyira hanze, kugirango bigenzurwe niba nta binyuranyije n’amategeko bashobora gutangariza rubanda birimo kubiba urwango n’amacakubiri cyangwa ikindi cyahungabanya umudendezo wa rubanda.

Ibi kandi byaje bishimangira ibyavugiwe mu kiganiro Komisiyo y’amatora yagiranye n’abanyamakuru kuwa Kane tariki 25 Gicurasi 2017, ubwo hasobanurwaga ibijyanye n’imyiteguro y’amatora, bikemezwa ko mu gihe bizagaragara ko imbuga nkoranyambaga zikoreshwa mu buryo butemewe bishoboka ko zazaba zifunzwe igihe gito ngo zitazabangamira imigendekere myiza y’amatora.

Umuyobozi wa mbere wanenze byeruye iki cyemezo, ni Minisitiri w’Ububanyi n’amahanga n’ubutwererane akaba n’umuvugizi wa Leta y’u Rwanda, Madamu Louise Mushikiwabo. Yagize ati: "Nubaha cyane Komisiyo y’Amatora, ariko sinemeranya nayo ko Abanyarwanda mu matora bagomba ikibari (uruhushya) cy’ubutumwa ku mbuga nkoranyambaga... Gukumira ko imbuga nkoranyambaga zikoreshwa nabi nibyo ariko kuniga ibitekerezo bya rubanda sibyo. Abanyarwanda bagomba kuvuga ibyo batekereza mu bwisanzure mu gihe cy’amatora, amategeko yacu ahana abatukana ntahana abavuga... "

Nyuma ya Minisitiri Mushikiwabo, Ikigo Ngenzuramikorere RURA cyo cyanashimangiye ko ibyo gufunga no kugenzura imbuga nkoranyambaga, bitari no mu nshingano za Komisiyo y’amatora. Itangazo ryashyizwe ahagaragara na RURA rigashyirwaho umukono n’umuvugizi wayo Anthony Kulamba, umuvugizi wa RURA, rigaragaza ko iki kigo nacyo gishyigikiye ko abanyarwanda bisanzura.

Iri tangazo riragira riti: "Nyuma y’ibyatangajwe na Komisiyo y’amatora bijyanye no kugenzura imbuga nkoranyambaga mu gihe cy’amatora mu Rwanda, RURA irashaka kumenyesha buri wese ko hashingiwe ku mategeko agenda ikoreshwa ry’ikoranabuhanga n’amategeko agenga itangazamakuru, Komisiyo y’amatora idafite uburenganzira na bucye bwo kugenzura cyangwa kubuza abenegihugu gukoresha imbuga nkoranyambaga"

Iri tangazo rikomeza rigira riti: "RURA nk’ikigo ngenzuramikorere kibifitiye ububasha, nta biganiro kigeze kigirana na Komisiyo y’amatora ku bijyanye n’iyo ngingo kandi turashaka gushimangira ko abenegihugu bafite uburenganzira mu kwisanzura bagaragaza icyo batekereza ku mbuga nkoranyambaga n’izindi z’ikoranabuhanga, mu gihe cyose bubahiriza amategeko"


INKURU ZA :
Tanga Igitekerezo
Ibitekerezo 3
Rekeraho Kuya 3-06-2017

Ariko se wowe Ikirezi ibyo uvuga urabizi? Louise Mushikiwabo niwe muvugizi wa Gouvernement. Ubimenye nabyo ko biri mu nshingano ze.

uwayo Kuya 1-06-2017

mugenzure ko batatangiye no kubikora ahubwo kuko numvise yaravuze ko bafite n’ibyuma bizabibafasha bivuze ko babiguze mutabizi maze ngo nta n’uwemerewe gukora share y’inkuru yamamaza umukandida mugihe atamwandikishije rwose uriya mugabo bigaragara ko adatanga ubwisanzure yakabaye yegura arajonjorera abanyarwanda se arabona turi impinja baha ibyo banombye?!!??!!??

Ikirezi Kuya 1-06-2017

Nibyo koko ibyo gufunga izi mbuga nkoranyambaga ntibireba iriya comisiyo yamatora.Ariko ntibinumvikana ukuntu minister ushinzwe ububanyi n amahanga ari we utangaza uko leta ibibona.Ndumva ibi byagombaga gutangazwa nurwego rushinzwe ziriya mbugankoranyambaga

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...