konka coffee
KONKA

AMAKURU

UKWEZI

U Bufaransa bwahaye ijambo undi musirikare uvuga iby’uwahanuye indege ya Habyarimana

U Bufaransa bwahaye ijambo undi musirikare uvuga iby’uwahanuye indege ya Habyarimana
3-10-2017 saa 15:18' | By Chief Editor | Yasomwe n'abantu 13004 | Ibitekerezo 4

Mu mpera z’umwaka ushize ubwo abacamanza b’Abafaransa batangazaga ko bagiye kongera gutangira iperereza ku waba yarahanuye indege ya Habyarimana Juvenal wahoze ari Perezida w’u Rwanda, bemeje ko bazaha agaciro ubuhamya bwa Kayumba Nyamwasa utavuga rumwe n’Ubutegetsi bwa Perezida Kagame ndetse akaba anamushinja kuba ari we wagizemo uruhare mu guhanura iyo ndege. Kugeza ubu ariko, hatahuwe amakuru avuga ko hari n’undi wahoze ari umusirikare mu ngabo z’u Rwanda ariko waje gutoroka igisirikare agahungira mu Bwongereza, nawe wavuze ko yari mu basirikare bagize uruhare mu gutegura ibisasu byarashe indege ya Habyarimana Juvenal.

Ikinyamakuru Jeune Afrique kivuga ko nyuma yo gutangaza ko ubuhamya bwa Kayumba Faustin Nyamwasa buzahabwa agaciro mu iperereza ryo kugaragaza uwahanuye indege ya Habyarimana, ndetse dosiye kuri iyo perereza bagatangaza ko yongeye gusubukurwa, uyu mugabo wigeze kuba Umugaba w’Ingabo z’u Rwanda ariko akaza gushingwa ibyaha akanakatirwa n’inkiko nyuma yo guhunga no gutoroka igisirikare, ubuhamya bwe hashize igihe kirekire butumviswe kubera impamvu zagizwe ubwiru.

Iki kinyamakuru kivuga ko cyamenye amakuru y’uko hari undi musirikare wahoze mu ngabo z’u Rwanda ariko kidatangaza amazina ye, watanze ubuhamya i Paris mu Bufaransa inshuro ebyiri muri Werurwe uyu mwaka ariko ayo makuru akaba yari yaragizwe ibanga. Uyu mugabo wahoze ari umusirikare ariko akaba yarahungiye mu Bwongereza, ngo mu buhamya bwe yivugira ko ari umwe mu bagize uruhare mu kurasa indege kandi ngo yari kumwe n’ingabo zahoze ari iza RPA Inkotanyi.

Iby’iraswa ry’indege ya Habyarimana byo, ubuhamya bwinshi bugaragaza ko yarashwe nande?

Tariki 6 Mata 1994, nibwo indege y’uwahoze ari Perezida w’u Rwanda Juvenal Habyarimana yarashwe, akaba yari kumwe na Perezida w’u Burundi Cyprien Ntaryamira. Ubu imyaka 23 irashize, ariko abantu benshi bagiye bavuga byinshi bitandukanye ku waba yarahanuye iyi ndege, icyabimuteye n’icyo yari agamije. Igihugu cy’u Bufaransa, kiri mu byakomeje gutinda ku by’iperereza ry’uwaba yararashe iyi ndege ndetse mu mpera z’umwaka wa 2016 giheruka gutangaza ko kigiye gusubukura ubushakashatsi, hagashingirwa no ku buhamya butangwa na Kayumba Nyamwasa wahoze ari umugaba w’Ingabo z’u Rwanda ubu akaba atavuga rumwe na Leta y’u Rwanda, uyu we akaba yemeza ko indege yarashwe na Perezida Kagame n’ingabo yari ayoboye zabohoye u Rwanda, gusa ibi bihabanye n’ubuhamya benshi batanga ku waba yarahanuye iyi ndege.

JPEG - 44.8 kb

Kimwe mu bimenyetso byinshi simusiga bigaragaza ko Jenoside yateguwe kare kandi ko uwahanuye indege ashobora kuba yarashakaga gutangira gushyira mu bikorwa ibyari byaragambiriwe, ni amagambo yavuzwe na Col Theoneste Bagosora wavuze mbere y’ihanurwa ry’indege ko mu Rwanda hagiye kuba imperuka y’ibyahishuwe cyangwa se ko hagiye kuba AKANTU. Abandi banyepolitiki b’icyo gihe, bagiye bivugira byeruye ko igihe cyo gutsemba abatutsi cyegereje, ndetse ibitangazamakuru byabikwirakwizaga byo akazi kabyo kari karanogejwe.

Lt Gen Roméo Dallaire wari uri mu Rwanda icyo gihe, agaragaza mu by’ukuri uwahanuye indege ya Perezida Habyarimana, agatanga ibimenyetso n’impamvu ashingiraho. Mu gitabo cye yise «J’ai serré la main du diable», bishaka kuvuga ngo "Nakoze mu kiganza cy’umudayimoni", Lt Gen Roméo Dallaire wari ukuriye ingabo z’umuryango w’Abibumbye zizwi nka MINUAR zabungabungaga amahoro mu Rwanda mbere ya Jenoside no mu gihe yabaga, agaragaza iby’iraswa ry’indege ya Juvenal Habyarimana wari uri kumwe na Cyprien Ntaryamira.

Roméo Dallaire nk’umuntu wari uyoboye ingabo z’umuryango w’Abibumbye zabungabungaga amahoro mu Rwanda, yabashije kwibonera amahano yagwiriye u Rwanda mu 1994 ndetse yageragaje kurwanya ubwicanyi n’ubwo ingabo nkeya n’imbaraga ze bitari kubasha ubwabyo guhagarika ayo mahano. Ibikorwa bye, bivugwa ko byibuze byarokoye ababarirwa mu 30.000. Yagerageje guhamagara imiryango mpuzamahanga ngo itabare ariko ntibyagira icyo bigeraho. Gusa ubu avuga ko iyo abimenya ko gutabaza kwe kutazasubizwa, aho guhamagara kuri telefone aba yarafashe indege akajya gusaba ubutabazi amahanga imbonankubone.

Mu buhamya yatanze mu mwaka wa 2014, Lt Gen Romeo Dallaire yavuze ko ibimenyetso simusiga bihari bigaragaza ko indege ya Perezida Juvenal Habyarimana yarashwe n’abahezanguni bari bafatanyije mu buyobozi bwa Guverinoma y’icyo gihe. Ahinyura cyane ibyagiye bivugwa ko iyi ndege yaba yarahanuwe n’ingabo za FPR Inkotanyi akanagaragaza ibimenyetso ashingiraho.

Romeo Dallaire ati: "Agace indege yarasiwemo kari gacunzwe cyane n’ingabo zarindaga Perezida Habyarimana, hakaba ari hamwe mu hantu bitari gushoboka icyo gihe ko ingabo za FPR zagera. FPR kandi ntabwo bari bafite ibisasu bya ’Missiles Mistral’ byahanuye iriya ndege, ibi bisasu ni iby’Abafaransa kandi Abafaransa ni bo bari inyuma y’ingabo za Leta y’icyo gihe. "

Uyu mugabo akomeza avuga ko amatara yo ku kibuga cy’indege cy’i Kanombe babanje kuyazimya mbere gato y’uko indege ihagera, ibi bikaba byarabafashije kuyirasa mu buryo bworoshye. Lt Romeo Dallaire ati: "Nta gushidikanya na gato kuri mu ntekerezo zanjye, iyo ndebye biriya mu buryo bwa gisirikare n’ubuhanga bukoreshwamo, ndabibona ntashidikanya ko byakozwe n’abahezanguni bo ku ruhande rwa Perezida Habyarimana Juvenal. Ikindi gikwiye kwibazwaho, abasirikare barindaga Perezida bamaze ibyumweru bitatu barabujije abandi basirikare kugera aharasiwe indege, kugirango bayobye uwashaka kuzagira iperereza abikoraho."

Romeo Dallaire agaragaza ko impamvu yatumye abahezanguni bakoranaga na Guverinoma ya Habyarimana bafata icyemezo cyo kumwivugana, ari uko yari avuye mu masezerano y’amahoro ya Arusha yagombaga gutuma ingabo za FPR Inkotanyi zigabana na we ubutegetsi. Kugabana ubutegetsi na FPR, byumvikana neza ko byagombaga gutuma hari bamwe muri abo bahezanguni bari gutakaza imyanya yabo y’ubuyobozi, abandi basigayemo na bo bagakorana n’abantu bari gutambamira umugambi wa Jenoside yari imaze igihe itegurwa.

Muri mwaka wa 2013, Colonel Thierno Athie wo muri Sénégal wari i Kigali mu 1994 mu butumwa bw’ingabo zari ziyobowe na Lt Gen Roméo Dallaire, nawe yatanze ubuhamya buhura neza n’ubw’uwari umuyoboye mu ngabo icyo gihe, ashimangira ko azi neza abarashe indege ya Habyarimana kuko aho byabereye yari ahibereye.

Uyu yivugiye ko mu mugoroba wa tariki ya 6 Mata 1994 yari mu rwakiriro rw’icyubahiro mu kibuga cy’indege cya Kanombe ahari hategerejwe Perezida Juvénal Habyarimana, akemeza ko yashidutse abona abasirikare barindaga Perezida bamugose akabuzwa kumenya ibyari bigiye kuba, bigaragaza ko bari bazi icyo bategereje gukora.

Abandi bagize icyo bavuga ko muntu waba warahanuye iyi ndege, ni abacamanza Mark Trevidic na Nathalie Poux, aba muri raporo yabo bakaba baragaragaje ko indege yari itwaye Juvenal Habyarimana na Cyprien Ntaryamira wari Perezida w’u Burundi, ishobora kuba yararashwe n’intagondwa z’abasirikare ba Habyarimana zitamushakaga.

Indi raporo yakozwe ku ihanurwa ry’iyi ndege ariko ikanengwa cyane kuko uwayikoze atigeze anabasha kugera aho iyi ndege yarasiwe, ni iyakozwe n’umucamanza w’umufaransa Jean Louis Bruguière wavuze ko yarashwe n’ingabo zari iza FPR Inkotanyi. Kuba ari Umufaransa ubwabyo kandi iki gihugu kikaba gishinjwa uruhare rugaragara muri Jenoside yakorewe abatutsi, benshi babihereyeho bagaragaza ko iyi raporo yo nta shingiro ifite, cyane ko nta n’ibimenyetso bifatika yigeze agaragaza akaba atarigeze anakandagira aho indege yarasiwe.


INKURU ZA :
Tanga Igitekerezo
Ibitekerezo 4
Seize Amen Kuya 8-10-2017

Hanyuma se ko bivugwa ko ari number one mu bateguye jenoside byahuzwa bite

Manu Kuya 5-10-2017

Aliko kuki abazungu bigizankana.ubuse imyaka yose ishize ntibaramenya uwarashe iyo ndege?halya satelites zikora iki?hanyuma se boite noir yayo, yo sibo bayifite?Nibatureke ibyacu turabizi,nibarekeraho kuturindagiza aho tugeze turahabona.

J.P. Kuya 3-10-2017

Indege si cyo kibazo. Ahubwo ubugome bwakoreshejwe mu kwica abavandimwe

Pierrot Mugabo Kuya 3-10-2017

Uwarash’iriya ndege wese ydukururiye kabutindi gusa nta kindi. Niba yaranabyungukiyemo we amenyeko ingaruka zabyo twe tuzarwana nazo kugeza iherezo. Gusa hari igihe ukuri kuzager’aho kukajya ahagaragara dore n’abanazi bafashije Hitireri kurmbur’abayahudi ujya kumva ukumva ngo umukambwe w’imyaka ijana wari umuporisi mu budage yatanz’ubuhamya bw’ukuntu yishe abayahudi. Ibi kandi abenshi babivugira ku gitanda mu bitaro bategereje kuvamo umwuka ariko bakabivuga kugirango Bikira Mariya umubyewi w’impuhwe abasabire kuri Yezu bazave muri Prigatori neza. Namwe ntimuzatinda kumvango uwabikoze yavuye ku izima arabitangaza ubundi amagambo agashir’ivuga.

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
BAHO
INKURU ZIKUNZWE
Ibitekerezo
Loading...
IZINDI NKURU WASOMA
Loading...