konka coffee
KONKA

AMAKURU

UKWEZI

Ubuhamya bw’agahinda n’inzira y’umusaraba ku banyarwanda bamaze imyaka muri Kenya

Ubuhamya bw’agahinda n’inzira y’umusaraba ku banyarwanda bamaze imyaka muri Kenya
25-06-2017 saa 12:33' | By Chief Editor | Yasomwe n'abantu 11377 | Ibitekerezo 2

Hari umubare munini w’Abanyarwanda bamaze imyaka myinshi mu gihugu cya Kenya, bafatwa nabi, batotezwa kandi badahabwa ibyangombwa nk’abaturage ba Kenya, mu gihe bamazeyo imyaka irenga 70, abandi bakaba barahavukiye bakahabyarira bakanahagirira abuzukuru, abo bose ntibemererwe kwitwa Abanyakenya kandi ntibanafatwe nk’Abanyarwanda, cyane ko abenshi batanazi igihugu bakomokamo. Bagaragaza ubuhamya bw’ubuzima bubi bakomeje kubaho, bagasaba ubuyobozi ko hagira igikorwa.

Elizabeth Nyirabatware w’imyaka 92 y’amavuko, niwe munyarwanda ukuze kurusha abandi uba mu gace ka Kericho muri Kenya. Amaze imyaka 72 muri iki gihugu atagira ubwenegihugu na bumwe kandi abayeho nabi cyane we n’abamukomotseho benshi. Yageze muri Kenya mu 1945 ari kumwe n’umugabo we Joseph Rwasa Nyabenda ariko ubu uwo mugabo we ntakiriho.

Mu 1945, Nyabenda na Nyirabatware bari bafite imyaka 21 icyo gihe, bari bamaze igihe gito bashakanye, bagiye muri Kenya aho bari bizeye kuzabona ubuzima bwiza mu gihugu cy’amahanga. Bajyanywe n’abakoloni b’Ababiligi ngo bajye gukora mu mirimo minini y’icyayi mu duce twa Kericho na Bomet, twari twarigaruriwe n’abakoloni.

Nk’uko The East African dukesha iyi nkuru ibisobanura, Nyirabatware avuga ko Kenya y’icyo gihe yari igihugu cy’amata n’ubuki, kuko we n’umugabo we bafatwaga neza n’abakoloni babahembaga neza bakanabaha ibindi byinshi byabafashaga mu buzima bwabo bwa buri munsi.

JPEG - 61.1 kb

Nyirabatware amaze imyaka myinshi muri Kenya, arahasaziye

Nyirabatware ati: "Twahembwaga neza ariko tukanabona ibindi byinshi birimo guhabwa amafunguro y’ubuntu no guhabwa imyambaro myiza n’abakoloni". Avuga ko n’ubwo akazi bakoreshwaga n’abazungu icyo gihe kari kagoye, bahembwaga neza bakishimira ubuzima bari babayeho.

Nyamara avuga ko nyuma yo kubona ubwigenge kw’igihugu cya Kenya, bahuritse bikomeye kimwe n’indi miryango y’Abanyarwanda barenga 1000 bagiye muri Kenya hagati y’umwaka w’1930 na nyuma gato y’umwaka w’1945. Nyirabatware avuga ko ubu ari we munyarwanda ukuze kurusha abandi mu bajyanywe n’abakoloni gukora muri Kenya, ariko akavuga ko mu myaka myinshi amaze muri iki gihugu abayeho ubuzima bubi aho afatwa nk’utagize icyo ari cyo mu gihe yamaze imyaka myinshi akorera igihugu cya Kenya.

Avuga ko Polisi ya Kenya yagiye ibatoteza kenshi kubera kubura indangamuntu zo muri iki gihugu, na Leta y’u Rwanda uhereye kuri Guverinoma z’aba Perezida bose bayoboye u Rwanda, ikaba yaragiye yanga kubakira ibagaragariza ko atari abanyarwanda nk’abandi.

JPEG - 56.7 kb

Ibyangombwa bihabwa abanyarwanda baba muri Kenya batanitwa abanyarwanda

N’ubwo amaze imyaka myinshi muri Kenya, Nyirabatware avuga neza Ikinyarwanda kimwe n’abandi banyarwanda benshi babana muri Kericho. Asaba Perezida Uhuru Kenyatta na Guverinoma ye ko we n’abandi banyarwanda bamaze imyaka muri Kenya, bahabwa ibyangombwa n’uburenganzira bihabwa abandi baturage bo muri Kenya. Yagize ati: "Mbere y’uko mpfa, ndongera gusaba Perezida Kenyatta na Guverinoma ye ko yampa indangamuntu kimwe n’abandi bagenzi banjye."

Itegeko Nshinga rya Kenya rivuga ko umuturage wese uvukiye muri iki gihugu aba agomba kwandikwa akanahabwa ubwenegihugu bwa Kenya, nyamara aba banyarwanda bo ngo bagiye birengagizwa mu myaka myinshi ishize bimwa indangamuntu kandi kutayigira bifatwa nk’icyaha gihanwa n’amategeko.

Nyirabatware avuga ko kuri we na bagenzi be, ubwigenge bwa Kenya bwababereye intangiriro y’ibibazo byo gutotezwa no gusiragizwa, kuko bagiye birukanwa ntaho bafite berekeza cyane ko no mu Rwanda batemeraga kubakira. Ubu avuga ko yitabwaho n’umwe mu bakobwa be witwa Anna Nyabenda, uyu nawe akaba yaravukiye muri Kenya akahakurira ndetse akaba ari umubyeyi wahabyariye abana batandatu, ariko mu myaka 10 ishize nawe akaba yarapfakaye. Uyu muryango wose, ngo ubayeho mu buzima bubi cyane.

JPEG - 78.6 kb

Nyirabatware n’abana be babiri bavukiye muri Kenya bakaba bashaje batarakandagira mu Rwanda, batanitwa abanyakenya

Gusa Nyirabatware avuga ko atifuza gusubira mu Rwanda, kuko ngo Kenya ari cyo gihugu yumva nk’iwabo akaba ari nacyo agiramo umuryango. Yagize ati: "Umwe mu bahungu banjye yasubiye mu Rwanda mu 1994 aza kwicwa muri Jenoside, Kenya nicyo gihugu ubu mfata nko mu rugo kuko nta n’undi muryango wanjye nzi uri mu Rwanda."

Gerald Ndagijimana Senkomo ni umuyobozi w’ishyirahamwe ry’Abanyarwanda baba muri Kenya (Kenyan Rwandese Association). Avuga ko ababyeyi be bagiye muri Kenya bagiye gukorera abakoloni, we akaba yarahavukiye ndetse afite imyaka 67 y’amavuko kugeza ubu. Yavukiye mu gace ka Kericho ariko amaze icyo gihe cyose nta bwenegihugu agira, kandi ngo nta muntu n’umwe azi mu bakurambere be bo mu Rwanda.

Yagize ati: "Nta cyangombwa cy’uko navukiye muri Kenya nigeze mpabwa, nta ndangamuntu, sinemerewe gufunguza konti muri banki cyangwa kubona ikindi cyangombwa kimwe no guhabwa izindi serivisi sihabwa abaturage, n’iyo naba mfite amafaranga asabwa muri izo serivisi, ntazo bampa kuko nta byagombwa ngira."

Abanyarwanda benshi baba muri Kericho na Bomet, bakomokaga mu cyahoze ari Gitarama, Butare na Gisenyi hose ho mu Rwanda ariko ngo bamwe ntibanazi aho utwo duce duherereye, kuko uretse abavukiye muri Kenya, n’abavukiye mu Rwanda bakagenda ari abana ntibibuka ibyaho kubera imyaka myinshi bamaze muri Kenya.

Abakoloni bahaga abanyafurika bose babaga muri Kenya ibyangombwa nk’abakozi bakora mu buryo bwemewe, ariko guhera mu 1977 byahinduwe na Guverinoma ya Perezida Jomo Kenyatta, nyuma y’ubwigenge bwa Kenya. Kuva ubwo, abanyarwanda batakaje ubunyarwanda, banga no kwakirwa na Kenya, babaho ari abaturage batagira ubwenegihugu na bumwe kandi batotezwa, bagakubitwa bakanasiragizwa n’ubuyobozi bwa Kenya ariko bakabura n’ahandi berekeza. Aho baba kugeza n’ubu, hitwa mu nkambi z’abanyarwanda.

Umwe mu bayobozi ba Ambasade y’u Rwanda muri Kenya, avuga ko bandikiye Guverinoma ya Kenya asaba ko abayobozi b’ibihugu byombi bazaganira kuri iki kibazo bakagishakira umuti. Gusa agaragaza ko bigoye kuba u Rwanda rwabakira mu gihe habura icyangombwa na kimwe cyerekana ko ari abanyarwanda, batanazi aho bakomoka cyangwa imiryango y’abo bamokomaho mu Rwanda.

Hari bamwe muri aba banyarwanda batangiye kugira icyizere cyo gusubizwa, ubwo ambasaderi w’u Rwanda muri Kenya, James Kimonyo, yabasuraga muri Gashyantare uyu mwaka. Yabijeje ko u Rwanda na Kenya bagomba kuganira ku kibazo cyabo bakagishakira umuti.


INKURU ZA :
Tanga Igitekerezo
Ibitekerezo 2
Peter mugabo Kuya 26-06-2017

iyi nkuru ni ukuri .mfite amakuru arambuye kubandi banyarwanda batahutse kuva Kenya bari bagiye muri ubwo buryo

Abdul Kuya 25-06-2017

yooo,birababaje!baziyizire mu Rwanda n’ubundi nta keza k’amahanga

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...