konka coffee
KONKA

AMAKURU

UKWEZI

Bushishi ni umukene bikabije ariko yari yashyizwe mu cyiciro cy’abaherwe kurusha abandi

Bushishi ni umukene bikabije ariko yari yashyizwe mu cyiciro cy’abaherwe kurusha abandi
11-08-2016 saa 15:46' | By Chief Editor | Yasomwe n'abantu 5307 | Ibitekerezo 9

Bushishi Francis, ni umusaza w’imyaka ibarirwa muri 65 wibana mu kazu gato yubakiwe na padiri nako kava iyo imvura iguye, ntagira isambu cyangwa indi mitungo, nta muvandimwe cyangwa undi umufasha kubaho. Iyo ugeze mu gace atuyemo batakuzi ukavuga ko ushaka Bushishi, buri wese ubyumvise akubaza niba waba ushaka kumufasha kuko bizwi na bose ko ari umukene utera rubanda impuhwe, dore ko ari nabo bamutunze kuko arya ari uko abanje gusaba abaturanyi atibagiwe abahisi n’abagenzi. Igitangaje ariko, yari yarashyizwe mu cyiciro cya Kane cy’ubudehe kibarizwamo abaherwe batunze ibya mirenge.

Ikinyamakuru Ukwezi.com cyamusuye aho atuye mu mudugudu wa Kabasanza, mu kagari ka Gihara ko mu murenge wa Runda mu karere ka Kamonyi, atugaragariza ubuzima abayeho nyamara akaba nta kintu na kimwe afashwa n’ubuyobozi, mu gihe nabwo buzi neza ko ari umukene kurusha abandi, ndetse n’ubu buyobozi bukaba butabishidikanyaho.

Bushishi avuga ko atazi neza imyaka afite, ariko abaturanyi be bamuzi bavuga ko afite hejuru ya 65. Nta mugore yigeze ashaka ndetse nta n’umwana agira, aho aba aribana. Akazu abamo n’ubwo nako kamaze gusaza no kwangirika kuburyo igisenge kirangaye, yari yarakubakiwe n’umupadiri wabaga muri aka gace ariko nawe ntakihaba. Ugeze muri aka kazu, ukareba uko kameze n’uburyo abayeho, hanyuma ukareba Bushishi iwe imbere y’iyi nzu utiriwe unamubaza byinshi, watangazwa no kumva ko yari mu cyiciro cya Kane cy’Ubudehe, gishobora kuba kirimo abayobozi bakuru b’igihugu, abaherwe bafite imiturirwa n’inganda n’indi mitungo ihambaye. Nta bwisungane mu kwivuza agira kuko atari mu cyiciro cya mbere cy’abakennye cyane, nta gahunda ya Leta nka VUP imufasha nk’uko bigenda ku bandi basaza, ndetse nta n’indangamuntu agira kuko habuze uwamufasha kubikurikirana ngo ayibone. Avuga ko arya iyo hagize umugoboka akamuha, bitaba ibyo akaba yaburara akanabwirirwa. Igitangaje kurushaho ariko, abayobozi b’inzego z’ibanze bose bemeza ko uyu musaza akennye bikabije ariko nabo ibye bikamera nk’ibyababereye urujijo.

Bushishi ahagaze mu muryango w’inzu Padiri yamwubakiye

Kayibanda Vincent, ni umukuru w’umudugudu wa Kabasanza. Yabwiye ikinyamakuru Ukwezi.com ko mu by’ukuri Bushishi ubuyobozi bw’umudugudu bumuzi nk’umukene, ariko nabwo bukaba bwaratunguwe no kumubona mu cyiciro cya Kane cy’Ubudehe. Uyu mukuru w’umudugudu cyakora avuga ko iki cyiciro Bushishi yakigaragayemo mu ntangiro z’uyu mwaka bakamuburanira ubu akaba yarashyizwe mu cyiciro cya kabiri cy’Ubudehe, ariko iki nacyo uyu muyobozi yemera ko kitamukwiye, cyane ko nta n’ubwisungane mu kwivuza yakwishyurirwa na Leta. Avuga ko n’ubu bategereje ko bazongera bakamuburanira bakareba ko yashyirwa mu cyiciro cya mbere kijyanye n’ubuzima bw’ubukene bukabije abayemo.

Uku niko igisenge cy’iyi nzu padiri yamwubakiye kimeze

Abdou Mukiga, ni Umunyamabanga Nshingwabikorwa wungirije w’akagari ka Gihara. Yatangarije Ikinyamakuru Ukwezi.com ko Bushishi koko bamuzi nk’umukene cyane muri aka kagari, ariko kudafashwa bakaba nta ruhare babigiramo. Kuba yarabanje gushyirwa mu cyiciro cya 4, avuga ko nabo byabatunguye kuko mu nzego z’ibanze yari yarashyizwe mu cyiciro cy’abakennye cyane, akumva ari mu nzego zo hejuru bashobora kuba baramwibeshyeho, bikongera bikagenda uko ku nshuro ya kabiri ubwo bamushyiraga mu cya kabiri. Ubu ngo barimo kongera gutegura kumuburanira, bakagaragaza ibishoboka byose bishimangira ubukene bukabije afite bityo agashyirwa mu cyiciro kimukwiye.

Ubuyobozi nabwo bwemeza ko Bushishi yagiye ahura n’akarengane mu byiciro by’ubudehe

Naho ku bijyanye n’ubundi bufasha bugenerwa abatishoboye n’abasheshe akanguhe by’umwihariko, Mukiga avuga ko bashatse kuva cyera kumushyira ku rutonde rw’abafashwa na gahunda ya VUP ariko bikaba byaranze bitewe n’uko nta ndangamuntu agira, kandi abafashwa n’iyi gahunda byarasabaga ko baba bafite indangamuntu. Gusa avuga ko ubu muri VUP bemeye ko abantu nk’aba bajya bafashwa n’iyo baba nta ndangamuntu bafite, muri gahunda itaha nawe akaba agomba gushyirwa ku rutonde rw’abazafashwa.

Ni uku Bushishi afunga icyumba aryamamo, ariko abarwa nk’uwifashije

Aha ni mu gice Bushishi abikamo ibintu mu nzu ye, bigaragara ko atabayeho nk’umuntu wifashije

Bushishi ahagaze mu muryango w’inzu ye. Asaba ubuyobozi kuyimusanira no kumufasha akajya abona ikimutunga

REBA HANO VIDEO NGUFI Y’IKIGANIRO TWAGIRANYE:


INKURU ZA :
Tanga Igitekerezo
Ibitekerezo 9
KJ Kuya 13-08-2016

Nta kwubeshya kwabayeho ahubwo ni ya mitwe yo gutekinika imibare ubundi bakatubeshya ko dukize, ko ubukungu bwazamutseho 10%,etc

lock Kuya 12-08-2016

Uyu musaza ndamuzi gusa ndababaye cyane kubwiriya nzu arimo. Sinari nzi ko kamonyi nzi ituye ibamo inzu nkaziriya. Abaturage tubazwa amaf menshi tukayatanga ariko ntawe uratubaza ayo gufasha nkaba bushishi ngo dushyire hamwe tububakire. Gusa ndabizeye rwose tubiigire priority tumufashe.

florh Kuya 12-08-2016

Ariko nkabo bayobozi bagiye bahanwa kuko baba bahaze ntibashobora nokwita kubabibuze ndebera koko nkuriya musaza ntacyo bamariye abaturage rwose

dominique niyomwungeri Kuya 12-08-2016

Vrema ndababaye kubona uyu musaza adafashwa, Ikibabaje ni uko aho atuye atari na kure yubuyobozi...njye ndamuzi cyane i Gihara kuri center kdi ubuyobozi buramuzi pe....Kubijyanye nibyiciro byo ndunva Leta yafata igihe cyirekire cyo gutangira kubishyira mubikorwa...ni igitekerezo cyiza ariko usanga mukugishyira mubikorwa hagaragara akarengane kenshi nigihe gito cyo kubikurikirana

dominique niyomwungeri Kuya 12-08-2016

Vrema ndababaye kubona uyu musaza adafashwa, Ikibabaje ni uko aho atuye atari na kure yubuyobozi...njye ndamuzi cyane i Gihara kuri center kdi ubuyobozi buramuzi pe....Kubijyanye nibyiciro byo ndunva Leta yafata igihe cyirekire cyo gutangira kubishyira mubikorwa...ni igitekerezo cyiza ariko usanga mukugishyira mubikorwa hagaragara akarengane kenshi nigihe gito cyo kubikurikirana

momo Kuya 12-08-2016

ibyiciro byubudehe bifite data zipfuye cyane nizo kwica igenamigambi gusa.ndebere nkuyu musaza vraiment ubu nawe yabariwe mucyiro cyabaherwe kdi akwiye gushyirwa mukiciro cyabatishoboye agafashwa nawe agatera intamwe yo kujya mukiciro cyabishoboye rwose hakwiye gushakwa uburyo bwo kunoza data zubudehe

Frank Ngoga Kuya 12-08-2016

Eeeeeh ! Mana yumva amasengesho ndumiwe koko. Nonese uyu muntu aba mu Rwanda nzi koko. New York aho ntuye ntanzu nkiyi wahasanga. Abayobozi baho wabaha interview rero bagatangira kwivugisha za so, annyway nyinshi......ngo barayoboye !! Bategereje H.E kujyayo akaba ariwe ukemura iki kibazo ,waragowe muzehe wacu. Abanyafulika benshi turacyafite icyo nakwita mental slavely,ibyo byiciro se byo bitareba ukuri kuri terrai(field)bigamije iki ,ninde wungukira mukubeshya ! Munsubize bavandimwe.

Sera Kuya 11-08-2016

Mbega ubuzima buteye agahinda umuntu azagere aho yifuza gupfa abandi bafite amagorofa bakaryama bagasinzira uriya byabura ntibamwubakire nakazu ngo akinge byabura aryame asinzire hari nabamena ibiryo kuki abakire batagira impuhwe zuriya mubyeyi uwangeza mu Rda byabura ngo ngire icyo mwicashiriza.

Charles Kuya 11-08-2016

Mubyukuri numva ijambo ibyiciro ryakurwaho kuko kuva na kera urwanda rubaho Umwana muri primaire yigaga atanga 100frw mugihembwe.muzabaze amaminisitiri nabandi bayobozi Bose bize mbere ya 1997.ibi byiciro ubwabyo ntibisobanutse Cyane Cyane ko nubwo muvuga ko kwiga ari Ubuntu,mbona ntamwana wumukene wiga keretse Wenda abo FARGE yishyurira.abandi bo ubu baricaye .ahubwo se aho uyu musaza study ko mbona amaze igihe kirekire ,buriya koko akarere kakoze iki?

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...