konka coffee
KONKA

AMAKURU

UKWEZI

Umunya Mali wasabye Perezida Kagame ko afashwa kuba umunyarwandakazi azaza i Kigali

Umunya Mali wasabye Perezida Kagame ko afashwa kuba umunyarwandakazi azaza i Kigali
12-07-2017 saa 11:05' | By Chief Editor | Yasomwe n'abantu 13610 | Ibitekerezo 6

Umugore ukomoka muri Mali uherutse kubaza Perezida Paul Kagame uko yabona ubwenegihugu bw’u Rwanda mu gihe atahavuka, ntahagire ababyeyi kandi akaba nta mugabo w’umunyarwanda afite, agiye kuza i Kigali kandi yagaragaje ko yishimiye cyane kuba azabonana n’abantu batandukanye by’umwihariko akabonana na Perezida Kagame wamwemereye ko hari inzira nyinshi yabonamo ubwenegihugu bw’u Rwanda, muri izo hakaba harimo no kuba yashaka umugabo w’umunyarwanda mu gihe yaba abyifuza.

Ubwo yari muri Rwanda Day yabereye mu Bubiligi tariki 10 Kamena 2017, Perezida Kagame yagaragarijwe n’uyu mugore wo muri Mali witwa Hawa Dème ko uretse abanyarwanda bamukunda bagakunda n’igihugu cyabo ayoboye, hari n’abanyamahanga benshi bakunda u Rwanda bakanaterwa ishema n’imiyoborere yarwo. Yavuze ko kuva yatangira kumenya iby’u Rwanda no kurukurikirana cyane, amaze kurugeramo inshuro ebyiri kuva muri 2013.

Icyo gihe kandi, uyu mugore Hawa Dème yavuze ko ibyo yigiye ku Rwanda, byatumye we na bagenzi be b’urubyiruko rwo muri Afurika barenga 200 baza mu Rwanda muri 2013, nyuma bashyiraho gahunda bise "Umuganda Africa" ikubiyemo ibikorwa by’indashyikirwa bigiye ku Rwanda, ikaba ari gahunda ihuriweho n’ibihugu bine birimo Mali, Senegal, Guinea na Cote d’Ivoire.

Uyu mugore kandi yabajije Perezida Kagame uburyo yazabona ubwenegihugu bw’u Rwanda nk’umuntu utahavuka, utahagira ababyeyi akaba ataranahashatse umugabo. Mu kumusubiza, Perezida Kagame yagize ati: "Icyo kubona ubwenegihugu bw’u Rwanda, birashoboka, no kubona umugabo w’Umunyarwanda niba utarashaka nabyo birashoboka... Ariko hari uburyo bundi bwinshi bundi bishoboka, si ngombwa kuba warashakanye n’umunyarwanda iteka, hari izindi mpamvu ngirango niwegera abashinzwe ubwo buryo mu Rwanda bazagusobanurira, hari abanyamahanga benshi bamaze kubona ubwenegihugu bw’u Rwanda".

Abinyujije ku mbuga nkoranyambaga, uyu mugore wo muri Mali yatangaje ko yishimiye kuba azaza mu Rwanda, akazaba ahari mu matariki ya 19 kugeza tariki 21 Nyakanga 2017, mu nama mpuzamahanga izahuza abashoramari bakomeye bazaganira n’urubyiruko mu nama ya “Youth Connect Africa Summit’’.

Hawa Dème yavuze ko yatumiwe na Minisitiri Jean Philbert Nsengimana, akaba yishimiye kuzaganira n’abantu bakomeye barimo umuherwe wa mbere mu Bushinwa witwa Jack Ma. icyamamare muri muzika Akon, Dr Akinwumi Adesina uyobora Banki Nyafurika Itsura amajyambere (BAD) n’abandi benshi.

Aha yafataga agafoto k’urwibutso na Minisitiri Jean Philbert Nsengimana

Yavuze kandi ko yishimiye kuzahura na Perezida Kagame afata nk’umugabo w’indashyikirwa, utuma ahorana icyizere ko umugabane wa Afurika uzatera imbere bidasanzwe. Yanaboneyeho kuvuga ko azabona umwanya uhagije wo kugaruka ku mushinga we na bagenzi be bise "Umuganda Africa" ukubiyemo ibyo bigiye ku Rwanda.

Aha yari kumwe na Ambasaderi w’u Rwanda mu Bubiligi; Olivier Nduhungirehe


INKURU ZA :
Tanga Igitekerezo
Ibitekerezo 6
Bizimana Kuya 13-07-2017

Uyu mukobwa ni mwiza kabisa naze hari abahungu bari tayari kumurongora pe!

-xxxx- Kuya 13-07-2017

YO.NAZE.MURWAGASABO.TURAMWISHIMIYE

Rosy Kuya 12-07-2017

Wowe witwa Magorwa uri Magorwa koko no mu bitecyerezo byawe harimo kugorwa kwinshi. Ubu koko usanze nta cyindi gitekerezo watanga atari icyo??? Yewe izina niryo muntu rwose.

jo Kuya 12-07-2017

suko ndongoye umunya mali, naze mufashe ubwenegihugu abubone nanjye mve muri ubu bunyagwa bw’ubugaragu

Magorwa Kuya 12-07-2017

Mamashenge naze tumurongore yokagira Imana!!!

Natacha Kuya 12-07-2017

Uyu mwana nanjye naramukunze, maze kumva ukuntu yifuza ko Africa itera imbere no kumva ukuntu akunda u Rwanda na prezida wacu.

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...