konka coffee
KONKA

AMAKURU

UKWEZI

Umusaza Rusanganwa aravuga imyato Perezida Kagame na Polisi y’igihugu

Umusaza Rusanganwa aravuga imyato Perezida Kagame na Polisi y’igihugu
25-05-2017 saa 09:34' | By Akayezu Jean de Dieu | Yasomwe n'abantu 1762 | Ibitekerezo

Rusanganwa Augustin avuga ko yari arembejwe n’umwijima, gusa kuri ubu uyu musaza wahawe umuriro ukomoka ku mirasire y’izuba na Polisi y’Igihugu ikorera mu karere ka Kayonza aravuga ko ashimira cyane Leta yUbumwe iyobowe na Perezida Kagame ndetse na Polisi y’u Rwanda yo yatekereje kumukura mu mwijima kuri ubu akaba yaramaze guca ukubiri no gucana agatadowa dore ko rimwe na rimwe byabaga ari ingorabahizi kubona amafaranga yo kugura peterori.

Uyu musaza kimwe n’indi imiryango 101 yo mu midugudu ya Ramiro na Humure, akagari ka Kiyovu, Umurenge wa Ndego ho mu karere ka Kayonza, bahawe umuriro w’amashanyarazi akomoka ku mirasire y’izuba mu cyumweru cyahariwe ibikorwa bya Polisi y’igihugu. Baravuga imyato Polisi y’igihugu na Leta y’Ubumwe bw’abanyarwanda iyobowe na Perezida Paul Kagame.

Mu kiganiro yagiranye n’ikinyamakuru Ukwezi.com, Rusanganwa Augustin yagize ati: "Icyo nishimiye ni Leta y’Ubumwe kuko ikunda abaturage bayo rwose nk’ubu najyaga kubyuka ngashaka agatadowa rimwe na rimwe nkaba ntanabonye amafaranga yo kugura peterori, ikindi kandi nk’ubu abana banjye bigiraga ku gatadowa bakaba abanyuma ariko kuri ubu ntabwo bazongera kuba abanyuma kuko ubu bariga nta kibazo dufite umuriro nijoro turacana bakiga."

Kuri uyu wa 24 Gicurasi 2017, Ubwo hatahwaga ku mugaragaro bimwe mu bikorwa byakozwe na Polisi y’igihugu harimo n’iyi mirasire y’izuba yahawe abaturage bo mu murenge wa Ndego mu cyumweru cyahariwe ibikorwa bya Polisi, Umuyobozi wa Polisi mu Ntara y’Uburasirazuba, ACP Rutaganira Dismas, yavuze ko ibi bikorwa byose Polisi y’igihugu ibikora mu rwego rwo gusohoza ubutumwa bwa Perezida wa Repubulika y’u Rwanda Paul Kagame mu gushyira mu bikorwa imvugo y’umukuru w’igihugu yemereye abaturage ko bagomba gusezera ku gucana agatadowa.

ACP Rutaganira Dismas, umuyobozi wa Polisi mu Ntara y’Uburasirazuba

Murenzi Jean Claude, Umuyobozi w’akarere ka Kayonza yavuze ko n’ubwo bacaniye imiryango 101 gusa atari izi ngo zonyine ziri muri aka karere zikeneye guhabwa umuriro w’amashanyarazi, ahubwo hari gahunda y’uko n’izindi ngo zose zo muri aka karere hari gahunda yo gushaka uburyo zagerwaho n’umuriro nk’uko umukuru w’igihugu aba abyifuriza abaturage.

Icyumweru cyahariwe ibikorwa bya Polisi (Police week) cyatangijwe ku rwego rw’igihugu tariki ya 16 Gicurasi, kikazasozwa tariki ya 16 Kamena 2017, bimwe mu bikorwa bitegerejwe gukorwa mu minsi isigaye hakaba harimo gufasha abaturage mu kububakira, kubahingira ibijumba ndetse no gukomeza kubaha amashanyarazi akomoka ku mirasire y’izuba.


Tanga Igitekerezo
Ibitekerezo
IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA