konka coffee
KONKA

AMAKURU

UKWEZI

Urukiko rwategetse ko mu bo kwa Rwigara, umwe afungurwa abandi bagakomeza gufungwa

Urukiko rwategetse ko mu bo kwa Rwigara, umwe afungurwa abandi bagakomeza gufungwa
23-10-2017 saa 16:35' | By Chief Editor | Yasomwe n'abantu 14720 | Ibitekerezo 3

Kuri uyu wa Mbere tariki 23 Ukwakira 2017, nibwo hasomwe urubanza ku ifungwa n’ifungurwa ry’agateganyo, ruregwamo Mukangemanyi Adeline Rwigara, Uwamahoro Anne Rwigara na Diane Nshimiyimana Rwigara, umucamanza yemeza ko babiri mu baregwa bagomba gufungwa iminsi 30 y’agateganyo mu gihe iperereza rikomeje ngo hazabone gutangira kuburanisha urubanza mu mizi, naho umwe we akaba agomba gufungurwa agakurikiranwa ari hanze..

Diane Rwigara wenyine akurikiranyweho icyaha cyo gukora no gukoresha inyandiko mpimbano ariko bose uko ari batatu bahurira ku cyaha cyo kugambirira guteza imvururu cyangwa imidugararo muri rubanda hakoreshejwe ibiganiro byagiye bihererekanywa mu bihe bitandukanye. Umubyeyi wabo Mukangemanyi Rwigara Adeline we yihariye icyaha cy’ivangura no gukurura amacakubiri.

Mu rukiko rwisumbuye rwa Nyarugenge, ku isaha ya saa cyenda n’iminota 11, ku gicamunsi cyo kuri uyu wa Mbere tariki 23 Ukwakira 2017, nibwo umucamanza yatangiye gusoma imyanzuro y’urukiko ku ifungwa n’ifungurwa ry’agateganyo. Yatangiye avuga icyifuzo cy’Ubushinjacyaha cy’uko abaregwa bakurikiranwa bafunzwe, ndetse anasobanura ibyaranze iburanisha ryose muri rusange.

Abacamanza bamaze igihe kirenga isaha n’igice basimburanwa gusoma imyanzuro y’Urukiko, aho bavuze ko nyuma yo kubisuzuma, abacamanza bagize inteko iburanisha basanze abaregwa barafashwe mu buryo bukurikije amategeko, bagasakwa mu buryo bukurikije amategeko ndetse telefone zabo nazo zikaba zarafashwe zigakurwamo amajwi yari akubiyemo ibimenyetso, nabyo ngo byakozwe mu buryo bukurikije amategeko.

Abacamanza bagaragaje ko Mukangemanyi Adeline Rwigara na Diane Nshimiyimana Rwigara, hari impamvu zikomeye zituma bakekwaho ibyaha bashinjwa n’Ubushinjacyaha kandi bakagaragaza ko ibisobanuro batanze bidafite ishingiro. Urukiko kandi rwagaragaje ko bashobora gutoroka cyangwa gusibanganya ibimenyetso. Byarangiye urukiko rutegetse ko aba bafungwa iminsi 30 y’agateganyo mu gihe iperereza rigikomeje. Aba bombi bahise bajuririra iki cyemezo.

Urukiko kandi rwagaragaje ko kuri Anne Rwigara Uwamahoro, ibyashingiweho n’Ubushinjacyaha mu kumushinja icyaha akurikiranyweho, nta shingiro bifite. Aha urukiko rwahise rutegeka ko Anne Uwamahoro Rwigara afungurwa agakomeza gukurikiranwa ari hanze.

Ubushinjacyaha mu gihe cy’iburanisha, bwari bwasabye ko abaregwa bafungwa kuko bakomeje gukurikiranwa bari hanze bashobora gutoroka cyangwa bagasibanganya ibimenyetso. Nyuma icyo gihe umucamanza yahaye ijambo Adeline Mukangemanyi Rwigara maze ati: "Nyakubahwa mucamanza, twatoroka dute? Twagenda n’amaguru? Nta cyangomwa na kimwe dufite, nta n’indangamuntu, baraje ibintu byose baratwara, icyitwa igipapuro cyose, amafaranga yose twari dufite mu rugo barayatwaye na konti zacu zose barazifunga, ubwo twatoroka dute koko? Twagenda n’amaguru... Dore aho duhagaze aha nyakubahwa mucamanza, nta cyaha dufite twishinja, ni uko nyine tutirenganya, iyo dushaka gutoroka tuba twaratorotse tugifite ibyangombwa, njyewe maze imyaka 5 ntarava muri uyu mujyi na rimwe"

Diane Rwigara nawe yavuze ko adashobora gutoroka cyangwa gusibanganya ibimenyetso kuko kuba nta cyangombwa na kimwe afite, nta n’indangamuntu, atumva aho yatorokera n’uko yatoroka. Yavuze kandi ko urugo rwabo rusanzwe rugoswe, ngo akaba atanafite telefone yatuma abasha kugira abo avugana nabo, akaba atari nawe washyize amashusho kuri Youtube kuburyo yayakuraho, ngo yumva akwiye gufungurwa kuko arengana.

Anne Rwigara nawe mu iburanisha yavuze ko kuba we na nyina n’umuvandimwe we bamaze hafi amezi abiri bafunzwe bazira ubusa, ngo urukiko rudakwiye kubafungura by’agateganyo gusa ahubwo ngo rukwiye kubafungura burundu bikarangira bagasubira mu buzima busanzwe, akavuga ko yizeye ko ubutebera babuze kuva kera noneho bwaba bugiye kuboneka.

Me Buhuru Pierre Celestin, ahawe ijambo mu gihe cy’ibiranisha, nawe yavuze ko abo yunganira barengana, agaragaza ko ibyo Diane Rwigara aregwa bishingirwa ku byo yavuze mu kiganiro n’abanyamakuru, nta na hamwe hagaragaramo icyateje imvururu muri rubanda, ndetse ko icyo gukora no gukoresha impapuro mpimbano, yagisobanuye bihagije ko kidakwiye kumuhama. Muri rusange, yari yasobanuye ko umucamanza akwiye gufata icyemezo, abaregwa bakarekurwa nta yandi mananiza.


INKURU ZA :
Tanga Igitekerezo
Ibitekerezo 3
John Kuya 26-10-2017

Nabandi bazataha imana niyo nkuru

isirikoreye jean de la terre Kuya 24-10-2017

ntabwo ari bo bamurekuye ni AMERIKA yabitegetse kuko uriya ANNE RWIGARA ni umunyamerika trump yandikiye president ngo amurekure kdi ko atanizeye ko azabonera ubutabera mu rwanda kandi nawe urabizi

ndayambaje vedaste Kuya 23-10-2017

ariko ibyisi namayobera matagatifu koko ubu agiye kwidegembya nkatwe ntawumufashe I buryo nibumoso.

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...