konka coffee
KONKA

AMAKURU

UKWEZI

VIDEO: Barafinda ntaremera, yari yahawe na Komisiyo y’amatora dosiye ya Diane Rwigara

VIDEO: Barafinda ntaremera, yari yahawe na Komisiyo y’amatora dosiye ya Diane Rwigara
10-07-2017 saa 18:41' | By Chief Editor | Yasomwe n'abantu 16255 | Ibitekerezo 11

Nyuma y’uko Komisiyo y’amatora itangaje urutonde ntakuka rw’abakandida bemerewe kwiyamamaza ku mwanya wa Perezida wa Repubulika, Barafinda Sekikubo Fred yagaragaje uburyo dosiye yahawe na Komisiyo y’amatora yemeza ibyangombwa bye bakiriye, atari iye ahubwo ari iya Diane Rwigara, bityo akabishingiraho avuga ko Komisiyo y’amatora ikwiye gusuzuma dosiye ye mu bushishozi ikamwongera ku rutonde rw’abemejwe ko bazahatana.

Kuwa Gatanu tariki 7 Nyakanga 2017, ubwo Komisiyo y’amatora yamaraga gutangaza urutonde ntakuka rw’abakandida, ikinyamakuru Ukwezi.com cyaganiriye na Barafinda avuga ko afite dosiye yahawe n’iyi Komisiyo igaragaraho amazina ya Rwigara Diane aho kuba amazina ye bwite, ariko umunyamakuru agirango ni urwenya kuko uyu mugabo asanzwe akunda gutebya cyane.

Mu gitondo cyo kuri uyu wa Mbere tariki 10 Nyakanga 2017, Barafinda yazindukiye ku biro by’ikinyamakuru Ukwezi.com, yitwaje ibipapuro bigaragaza ko Komisiyo y’amatora yamuhaye dosiye yanditseho amazina ya Rwigara Diane. Kuri iyo dosiye dufitiye kopi, hariho umukono wa Prof Kalisa Mbanda n’uwa Barafinda Sekikubo Fred wakiriye iyo dosiye, nyamara hejuru ku mutwe (Title) bigaragara ko ari iya Rwigara N. Diane.

Barafinda yari yahawe urupapuro rwanditseho ko ari ibya Diane Rwigara

Barafinda yatangarije ikinyamakuru Ukwezi.com ko iminsi y’impera z’icyumweru yamubereye imbogamizi ntahite ajya kuburana muri Komisiyo y’amatora, ariko akaba agomba kujyayo kuri uyu wa Mbere akabagaragariza ko bamwibeshyeho kuko dosiye igaragaza ibyangombwa bye bakiriye iriho amazina ya Rwigara Diane. Avuga ko kuba yaremeye gushyiraho umukono kandi biriho amazina atari aye, yarabitewe n’uko atagombaga kuvuguruza umuyobozi wo ku rwego rwa "Professor".

Barafinda avuga ko mu gihe Komisiyo y’amatora yaramuka imuhakaniye ntimushyire ku rutonde nkakuka rusanzwe ruriho Paul Kagame, Dr Frank Habineza na Philippe Mpayimana, ngo yabyakira ariko bikazajya bituma ahora kuri Komisiyo y’amatora. Mu magambo y’urwenya, avuga ko urukweto rwe rumwe afata nk’imodoka y’akataraboneka ya "Hummer" ndetse n’urundi afata nk’iyo mu bwoko bwa "V8", bizarinda bimushiriraho agikora ingendo kuri Komisiyo y’amatora, kuko bamwibeshyeho mu gihe we yari yujuje ibyangombwa byose nk’uko abivuga.

Mu kiganiro kirambuye ikinyamakuru Ukwezi.com cyagiranye na Barafinda, yadutangarije ibintu byinshi bitandukanye kuri we, birimo ibisekeje n’ibindi anyuzamo ukumva ko byubatse mu buryo asobekamo amagambo nk’umuhanzi mu by’ubuvangazo, ndetse nawe ubwe akihamiriza ko ari umuhanzi udahangarwa.

REBA HANO VIDEO YOSE Y’IBYO TWAGANIRIYE NA BARAFINDA:

Mu kiganiro kigufi ikinyamakuru Ukwezi.com cyagiranye na Prof Kalisa Mbanda uyobora Komisiyo y’amatora, twamubajije icyo avuga ku kuba Barafinda ashaka kujurira kandi ko agaragaza inyandiko iriho amazina atari aye, maze asubiza ko yazagenda akabyerekana nta kibazo.

Icyakoze nyuma y’amasaha macye, ikinyamakuru Ukwezi.com cyamenye amakuru y’uko Barafinda yageze kuri Komisiyo y’amatora, akerekana urupapuro bari bamuhaye banditseho Rwigara Diane, bagahita bamuhindurira ariko bagahindura amazina gusa, mu gihe we yongeye gutangariza ikinyamakuru Ukwezi.com ko agitegereje ko bazisubiraho bakamwongera ku rutonde.

Uru nirwo rwandiko rukosoye Barafinda yahawe kuri uyu wa Mbere


INKURU ZA :
Tanga Igitekerezo
Ibitekerezo 11
nsengimanafrancois Kuya 13-07-2017

kwibeshya ntaho bitaba kd baba bafite akazi kenshi nibabisuzume barebe ukuri niba yujuje ibisabwa bazamwemerera nawe yiyayamamaze gusa banyarwanda muzibuke aho tuvuye naho tugeze ntimuzibagirwe ibyiza byose twagezeho ngo mubiteshe agaciro kandi umuntumwiza yerekanwa nibyo akora nimuze dushyigikire ibyagezweho dutoraneza murakoze

xx Kuya 12-07-2017

Hari akandi gakosa gato; urukosoye bamuhaye narwo ndabona ruriho itariki ya kera

Ganza Kuya 12-07-2017

Ni aya Barafinda !!! Mureke kuturangaza .

Manzi Kuya 11-07-2017

ni igitangaza!
ibi bishoboka bite?!!

Numira Kuya 11-07-2017

Barafinda nawe nibamureke yiyamamarize umwanya wa perezida

ndizeye Kuya 11-07-2017

njye nari nabonye title ngirango ni rwa rwenya rwa barafinda nyuma mbyumvise kuri radio ngiye kureba Koko nsanga aribyo ndumirwa NEC igizwe n’abanyabwenge ni gute basinya ibintu bisa n’inyandiko mpimbano nkizo barega abandi niba baribeshye bagasinya aho batakabaye basinya kuki na sinya z’abandi Wenda batibeshye ku mirongo bagasinya ku izina ritari ryo

Patrice Kuya 11-07-2017

Byaba ari film noneho si NEC si

Barafinda ahubwo murebe uwayimuhaye (naho Agasobanuye karaho)

J.P. Kuya 10-07-2017

Ntimurangazwe n’ibi. Mureke twitorere "Intore izirusha intambwe". Kagame, Oyééé

Ninaa@yahoo.com Kuya 10-07-2017

Hahahahhhh. Barafinda ansetsa nkenda gupfa. Ariko aha ko rwose yavugaga ukuri.

Etienne Kuya 10-07-2017

Birasekeje pe. Ese NEC biriya yabikora cg ni ukwikiza. Diane na mwenedata ntawahawe icya mpayimana cg frank

Etienne Kuya 10-07-2017

Birasekeje pe. Ese NEC biriya yabikora cg ni ukwikiza. Diane na mwenedata ntawahawe icya mpayimana cg frank

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...